Свет
„Не се само ракети, напади има и на улиците“ – поранешен играч на „Партизан“ се огласи од Израел

Милитантната исламистичка група Хамас од Појасот Газа денеска влезе на југот на Израел и истрела илјадници ракети во таа земја, најавувајќи почеток на нова операција.
Десетици израелски воени авиони во моментов гаѓаат бројни цели на организацијата Хамас во Појасот Газа.
„Во војна сме и ќе победиме“, порача израелскиот премиер Бенјамин Нетанјаху во пораката до Израелците.
Се огласи и поранешниот фудбалер на Партизан, Никола Терзиќ, кој моментално настапува во Израел.
„Се чувствувам безбедно, пред се’ затоа што сум на 40 минути од Тел Авив и сега кај мене нема тревога, се надевам и дека ќе нема“ изјави Терзиќ за „Спортал“ и потоа додаде:
„Требаше да почнеме, но немавме тренинг. Чекаме да видиме што ќе се случи. Ги следам вестите од минута во минута за да видам што се случува. Видов дека се испукани овие 5.000 ракети, израелската армија вели дека не се толку многу туку 2.500. Сè уште е некако свежо, овие напади само се случуваат, можеби сè ќе престане“, вели тој.
Вели дека не се само ракети.
„Она што го видов низ видеата е дека излегуваат луѓе во џипови, камиони, 5-6 од нив, војниците на Хамас одат по улица и напаѓаат полициски автомобили, пукаат во нив. Значи има и напади на улица. Исто така, она што успеав да го прочитам е дека има киднапирање. Дека војниците ги земаат како затвореници, тоа е единственото нешто што успеав да го прочитам и да го видам на видеата“, рече Терзиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Фото) Аеродромот во Загреб затворен за сообраќај – мал авион слета надвор од пистата

Аеродромот „Фрањо Туѓман“ во Загреб денеска попладне беше затворен за сообраќај поради инцидент со приватен авион кој се излизгал од пистата, пишува Индекс.
Како што потврдија од аеродромските служби, инцидентот се случил околу 15:21 часот, при слетување на приватен авион од типот Cessna 525. Леталото при слетување проклизнало и завршило на тревната површина покрај пистата.
Според информации од авиокомпанијата, авионот бил празен и во инцидентот нема повредени.
Во моментот се преземаат мерки за отстранување на леталото од пистата, а аеродромот останува затворен до понатамошно известување.
Од Аеродромот „Фрањо Туѓман“ се извинија на патниците за доцнењата на пристигнувачките и поаѓачките летови и најавија дека јавноста ќе биде навремено информирана кога сообраќајот повторно ќе биде воспоставен.
Свет
Масовни протести во Шпанија против корупција

Повеќе од десетици илјади луѓе се собраа денес во Мадрид на демонстрации организирани од главната конзервативна опозициска партија, против владата на социјалистичкиот премиер Педро Санчез, обвинувајќи ја за корупција.
Демонстрантите се собраа на Шпанскиот плоштад во центарот на главниот град, велејќи му на Санчез да „поднесе оставка“.
Народната партија го свика собирот откако протечените аудио снимки наводно покажуваат дека член на Социјалистичката партија води кампања за клевета против полициска единица што истражува обвинувања за корупција, во која наводно се вклучени сопругата, братот и поранешната десна рака на Педро Санчез.
Социјалистичката членка ги негираше обвинувањата, кажувајќи им на новинарите дека спроведувала истражување за книгата и дека не работи во име на партијата или на Педро Санчез, а потоа ја напуштила Социјалистичката партија.
Лидерот на Народната партија, Алберто Нуњез Феихо, ја обвини владата за „мафијашки практики“ во аферата, тврдејќи дека Санчез е во центарот на повеќе корупциски скандали.
Народната партија процени дека повеќе од 100.000 луѓе присуствувале на денешниот митинг под слоганот „Мафија или демократија“.
Владин претставник во Мадрид процени дека на демонстрациите имало помеѓу 45.000 и 50.000 луѓе.
Свет
Тропската бура Барбара се формираше покрај брегот на Мексико

Тропската бура Барбара се формираше покрај југозападниот брег на Мексико, соопшти Националниот центар за урагани во Мајами рано утрово. Не се издадени предупредувања за крајбрежна опасност.
Брзината на ветерот беше околу 75 километри на час со повремени силни налети. Се очекува бурата да прерасне во ураган во понеделник.
Во делови од мексиканските држави Гереро, Мичоакан, Колима и Халиско можни се обилни врнежи од дожд од 5 до 10 сантиметри, а на некои места и до 15 сантиметри. Врнежите од дожд можат да доведат до поплави и лизгање на земјиштето.