Кога Турција почна офанзива насочена кон расчистување на североисточна Сирија од курдските борци, беа заробени и борци на Исламската држава. Многу од нив веќе долго време се затворени во курдските затвори, а еден од тие објекти се наоѓа во сирискиот град Хасака. Новинарите од агенцијата АФП влегле во една од ќелиите, при што пренесоа ексклузивна приказна за милитантите, сега во портокалови затворски костуми.

Ќелијата се наоѓа во сирискиот град Хасака. Во неа се наоѓаат десетици затвореници чии матични земји не сакаат тие да бидат слободни граѓани, но исто така не сакаат да ги примат назад.

Уште 5.000 затвореници – Сиријци, Ирачани, но и Британци, Французи и Германци се наоѓаат во затворот. Групата е обвинета за злосторства на територии што некогаш биле контролирани од Ирак и Сирија, вклучително и масовни егзекуции, силувања и тортура. За најголем дел од злосторствата има и снимки.

„Сакам да го напуштам затворот и да одам дома кај своето семејство“, вели Асил Матан (22).

Тој го напуштил својот дом во Велс кога имал само 17 години за да му се придружи на својот брат во Мосул, северен Ирак, каде што се формира калифатот на Исламската држава.

Кога неговиот брат бил убиен, тој се префрлил во Рака во Сирија, второто најважно терористичко упориште.

„Сакам да се вратам во Велика Британија“, изјавил тој за АФП додавајќи дека жали што дошол.

Речиси третина од затворениците се пациенти на кои им е потребна итна медицинска помош.

Тие страдаат од тешки болести, како сида и хепатитис, а многу од нив имаат отворени рани на телото.

Лекарското одделение на затворот има капацитет од 300 легла.