Европа
Новиот вид на коронавирус и натаму се шири, потврден уште во две земји
Израелски, како и северноирски официјални лица соопштија дека кај нив биле откриени случаи на инфекција со новиот вид на коронавирус, откриен неодамна во Велика Британија.
Израелското Министерство за здравство истакна дека од четворица, тројца пациенти пристигнале неодамна од Велика Британија, а потеклото на четвртиот сè уште не е утврдено.
„Во последните два дена се обидувавме да провериме дали мутацијата од Велика Британија се инфилтрира и во Израел. До пред неколку минути бевме оптимисти, а сега расположението опадна поради информациите што доаѓаат од нашата лабораторија“, изјави министерката за здравство Џули Еделштајн.
Израелскиот премиер Бенјамин Нетанјаху рече дека откривањето на новите случаи само ја потврдува одлуката на властите дека треба да се прекине воздушниот сообраќај од и кон Велика Британија.
Експертите ги повторија изјавите на колегите од други земји, велејќи дека вирусот, иако позаразен, не е посмртоносен од оригиналната варијанта и дека нема причина да се верува оти регистрираните вакцини нема да бидат ефикасни против него, пишуваат локалните медиуми.
Северна Ирска исто така потврди дека земјата регистрирала позитивен тест за новата варијанта на вирусот.
Министерството за здравство на Северна Ирска објави дека оваа варијанта на вирусот била во тој регион веќе некое време.
„Нема докази што сугерираат дека новата варијанта на вирусот предизвикува посериозно заболување или поголема стапка на смртност“, се вели во соопштението.
Новата варијанта на коронавирусот брзо се шири во Велика Британија и предизвикува голема загриженост во Европа, каде што неколку земји ги блокираа сообраќајните врски со островската земја.
Во соопштението се додава дека мутацијата на вирусот не е невообичаена, но брзината со која се шири новата варијанта предизвикува сериозна загриженост.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Британска компанија ги тужи „Фајзер“ и „Бионтек“: Ја украдоа нашата технологија за вакцина против Ковид
Британската фармацевтска компанија GlaxoSmithKline (GSK) денеска поднесе тужба пред федералниот суд во Делавер против американскиот Pfizer и германскиот BioNTech, тврдејќи дека тие ги прекршиле нејзините патенти за технологијата на гласник РНК (mRNA) во нивните вакцини против Ковид-19.
Вакцините Comirnaty на Pfizer и BioNTech ги прекршуваат иновациите на GSK заштитени со патент во mRNA вакцините, развиени „повеќе од десет години пред“ пандемијата на ковид-19, се вели во тужбата.
Патентите ја покриваат технологијата за пренос на нестабилна гласничка РНК во човечки клетки, која научниците почнаа да ја развиваат во 2008 година, а GSK стана сопственик кога го купи бизнисот со вакцини на Novartis во 2015 година, се додава.
Британската компанија бара парична отштета од Pfizer и BioNTech, вклучително и такси за патент, без да наведе износ.
Портпаролката на Pfizer во соопштението нагласи дека компанијата е „сигурна во својата позиција во однос на интелектуалната сопственост поврзана со Comirnaty“ и дека има намера „енергично да се брани“ од тврдењата на GSK. Портпаролот на BioNTech одби да ја коментира тужбата.
Портпаролот на GSK рече дека компанијата верува дека нејзините патенти „ја обезбедуваат основната технологија што се користи во mRNA вакцините на Pfizer и BioNTech против ковид-19“. GSK е „подготвен да ги лиценцира овие патенти под комерцијално разумни услови за да обезбеди пристап“ до вакцините.
Европа
(Видео) 19-годишна девојка во Украина се обидела да го продаде синот, барала 23.500 евра
Во украинскиот град Днипро, 19-годишна девојка се обидела да го продаде сопствениот двегодишен син, соопшти локалната полиција, пренесоа украинските медиуми.
Девојката наводно побарала еден милион гривни, што е околу 23.500 евра за своето дете. 19-годишната девојка наводно му го понудила детето на својот познаник и договорила средба со него. Во вторникот полицијата приведе маж додека носел пари на договорена локација.
Девојката наводно рекла дека не сака да се грижи за својот син, па решила да го продаде. Со парите што ги добила планирала да отвори сопствен бизнис.
Детето е земено во полиција и предадено на надлежните органи. Против неговата мајка е подигнато обвинение за трговија со луѓе.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.