Русија се обидува да ги истисне украинските сили од нејзиниот западен регион Курск со десетици илјади војници, рече главниот украински командант, Олександр Сирски, со цел да ги врати териториите изгубени во текот на летото, а нејзината офанзива во источна Украина продолжува.

Коментарите на генералот Сирски дојдоа еден ден откако „Њујорк тајмс“ објави дека Москва собрала сили од 50.000 војници, вклучително и севернокорејски војници, по должината на регионот што се граничи со Украина, и дека подготвува масовна офанзива.

„По наредба на нивното воено раководство, (руските сили) се обидуваат да ги дислоцираат нашите трупи и да напредуваат длабоко на територијата што ја контролираме“, напиша Сирски на апликацијата за пораки „Телеграм“.

Сирски не го спомна можното присуство на севернокорејски војници меѓу руските сили.

Западните земји, Јужна Кореја и Украина соопштија дека Северна Кореја испратила војници во Русија.

Русија ниту го потврди ниту негира присуството на севернокорејски трупи на нејзина територија, иако претседателот Владимир Путин во саботата го потпиша законот за договорот за стратешко партнерство на неговата земја со Пјонгјанг, кој вклучува одредба за заемна одбрана.

Украина го нападна рускиот Курск во август освојувајќи ги населбите во своето прво такво распоредување руска територија откако Москва ја почна својата целосна инвазија во февруари 2022 година.

Меѓутоа, Русија го продолжи своето бавно, но стабилно напредување во поголемиот дел од источна Украина, каде што освојува село по село во обид да го освои целиот индустријализиран регион Донбас.

Сирски рече дека операцијата на Курск сè уште успешно ги одвраќа руските сили од поагресивни напади на источниот фронт.

„Тие десетици илјади непријатели од најдобрите руски ударни трупи би ги нападнале нашите позиции во правец на Покровск, Курахив или Торецк, што значително би ја влошило ситуацијата на фронтот“, рече тој.

Во извештајот на „Њујорк тајмс“, кој се повикува на процена на САД, се вели дека Русија ги зајакнала силите во регионот Курск, без да мора да преместува војници од источна Украина.

Украинското одбранбено разузнавање извести за уништување руски јуришен хеликоптер „ми-24“ на аеродромот „Клин-5“, лоциран во Московскиот Регион, во напад на аеродром во московската област.

Според украински извори, хеликоптерот што бил опожарен припаѓал на 92. ескадрила, која е дел од 344. центар за борбена примена и преквалификација на вооружените сили на воздухопловните сили на Руската Федерација.

Аеродромот „Клин-5“ е познат како клучна база за обука и борбена подготовка на руските воздухопловни сили, што дополнително го нагласува значењето на овој инцидент. „Ми-24“, популарно наречен летечки тенк, е повеќенаменски јуришен хеликоптер, кој игра важна улога во обезбедувањето блиска воздушна поддршка и транспорт на војници. Неговото уништување претставува значителна загуба за руските воздухопловни сили, особено со оглед на специјализираната обука и опрема што ја поседува оваа единица.

Русија собрала речиси 50.000 војници, вклучително и севернокорејските сили, во подготовка за офанзива за враќање на територијата заземена од елитните украински војници во руската област Курск, потврдија американски и украински претставници за „Њујорк тајмс“.

Новата американска проценка заклучува дека Русија изградила сили без да мора да ги повлече војниците од источна Украина, нејзин главен приоритет на линијата на фронтот, дозволувајќи ѝ на Москва да притиска на повеќе фронтови истовремено.

Руските сили сакаат да ја вратат територијата што Украина ја зазеде во Курск оваа година. Досега со ракети и артилериски оган ги напаѓаа украинските позиции во Курск, но сѐ уште не извршија голем напад, соопштија американските власти.

Украинските власти велат дека во наредните денови очекуваат напад, во кој ќе учествуваат севернокорејските сили, кои моментно се обучуваат со руски војници во крајниот западен дел на Курск.

Се наѕира руско-севернокорејска офанзива додека новоизбраниот претседател Доналд Џеј Трамп се подготвува повторно да ја преземе функцијата со, како што вели, цели за брзо завршување на војната. Трамп не кажа како планира да го реши конфликтот, но новоизбраниот потпретседател Џеј-Ди Венс изнесе план што ќе ѝ овозможи на Русија да ја задржи територијата што ја зазеде во Украина.

Некои американски воени и разузнавачки претставници станаа попесимисти за изгледите на Украина истакнувајќи дека Русија немилосрдно добива територии и во Курск и во источна Украина. Официјални лица велат дека ова е делумно резултат на неуспехот на Украина да се справи со критичниот недостиг на работна сила.

Претседателот Џо Бајден ја поддржа Украина притискајќи го Конгресот да одобри помош од милијарди долари и бара од американската војска и од шпионските агенции да обезбедат критични разузнавачки информации за да му помогнат на Киев во војната.