Свет
Ослободени сите уапсени за нападот во Лондон

Британската полиција го соопшти идентитетот на двајца од тројцата напаѓачи во Лондон, но ги ослободи сите 12 уапсени во врска со нападот.
Еден од атентаторите во Лондон, како што соопшти истрагата, е 27-годишниот Хурам Шазад Бут, Британец со пакистански корени. Хурам им бил познат на полицијата и на тајната служба МИ5 од порано, но немало знаци дека планира напад. Според британските медиуми, Бут минатата година можел да се види во документарен филм на британската телевизија со наслов „Џихадистите од соседството“.
Името на вториот напаѓач е Рашид Редуан. Полицијата вели дека 30-годишникот, според сопствени наводи, бил „Мароканец или Либиец“. Тој го користел и името Рашид Елкдар и друг датум на раѓање, според кој е на 25-годишна возраст. Редуан и Бут живееле во лондонската населба Баркинг, каде полицијата спроведе неколку рации.
Нападот во Лондон во саботата вечерта го извршија тројца напаѓачи. Тие со транспортно возило прво влетаа во пешаци на Лондон Бриџ, а потоа кај Бороу Маркет излегоа од возилото и без конкретна цел напаѓаа луѓе со ножеви. Во нападот загинаа седум лица, а 48 се повредени. Осум минути по добивањето на повикот за итна помош полицијата ги застрела напаѓачите. Џихадистичката милиција „Исламска држава“ тврди дека нападот е нејзино дело.
Полицијата во врска со нападот уапси 12 лица, но во меѓувреме сите се ослободени без обвинение. Сите беа уапсени во неделата во населбата Баркинг, каде живееле двајца од тројцата напаѓачи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Од денеска за верниците се отвора гробницата на папата Франциско во базиликата Санта Марија Маџоре во Рим

Од денеска гробницата на папата Франциско во базиликата Санта Марија Маџоре во Рим ќе биде отворена за верниците, соопшти Ватикан.
Папата, кој почина на 88-годишна возраст на 21 април од мозочен удар, беше погребан вчера во гробница одвоена помеѓу две капели во римската базилика, по церемонија на жалост одржана во Ватикан. Церемонијата на поставување на ковчегот траеше околу половина час.
На погребот во базиликата Санта Марија Маџоре присуствуваа само најблиските, а едноставниот, дрвен ковчег на папата беше пречекан со ѕвона.
На мисата во Ватикан, според официјалните податоци од Ватикан, присуствуваа околу 250.000 луѓе, како и 170 странски делегации. Меѓу нив имаше шефови на држави и влади, монарси, поранешни државници, политичари од Италија и други земји, интелектуалци, уметници. Подоцна, италијанскиот министер за внатрешни работи Матео Пјантедози изјави дека најмалку 400.000 луѓе присуствувале на погребот на папата Франциск, собрани на плоштадот „Свети Петар“ и по улиците на Рим.
Целиот настан го следеа околу 2.700 акредитирани новинари.
Свет
Има жртви откако возило влета во публиката на уличен фестивал во Ванкувер, Канада

Неколку лица загинаа, а поголем број се повредени кога возило влета во публиката на уличен фестивал во Ванкувер, Канада, соопшти полицијата, без да го прецизира точниот број на жртви.
Полицијата соопшти дека возачот е во притвор по инцидентот во саботата во близина на улицата Фрејзер и Источна 41-ва авенија, објави канадската мрежа Си-Би-Си.
Се наведува дека полицијата ќе објави повеќе информации како што ќе се одвива истрагата.
Свет
Фон дер Лајен со порака до Зеленски: Европа секогаш ќе ја поддржува Украина во нејзината потрага по мир

Претседателката на Европската комисија, Урсула фон дер Лајен, денеска му порача на украинскиот претседател Володимир Зеленски дека Европа секогаш ќе ја поддржува Украина во нејзината потрага по мир.
„Можете да сметате на нашата поддршка на преговарачката маса за да постигнете праведен и траен мир“, напиша таа на официјалните социјални мрежи по средбата со Зеленски во Рим, каде што двајцата присуствуваа на погребот на папата Франциско.
Претседателката на ЕК додаде дека со украинскиот претседател разговарала и за чекорите што ги презема Киев за да го заслужи своето место во европското семејство.