Европа
Папата ја одбележа годишнината од експлозијата во Либан: Вистината не може да се сокрие

Папата Франциско денеска ја одбележа втората годишнина од експлозијата во пристаништето во Бејрут, велејќи дека вистината и правдата никогаш не можат да се сокријат, очигледно алудирајќи на ќорсокак во истрагата за таа катастрофа.
Ова го кажа поглаварот на Римокатоличката црква на крајот од неделната аудиенција, прва по едномесечниот летен распуст.
Потсетувајќи на утрешната годишнина, папата рече дека се моли за семејствата на жртвите од катастрофалниот настан и за драгиот либански народ.
„Се молам секој да најде утеха во верата и правдата и вистината што никогаш не може да се сокрие“, рече тој.
Пред две години експлодираа речиси 3.000 тони високоексплозивен материјал, амониум нитрат, користен како ѓубриво, неправилно складиран во пристаништето на либанската престолнина.
Тоа беше една од најголемите ненуклеарни експлозии во светот, во која загинаа 215 луѓе, беа повредени повеќе од 6.000 и беа уништени делови од Бејрут.
Истрагата за експлозијата е блокирана со месеци, бидејќи либанските политичари се погрижија никој да не одговара до сега, пишуваат агенциите.
Многу Либанци ја обвинуваат долгогодишната владина корупција и лошото управување за трагедијата.
Папата Франциско се помоли Либан повторно да се роди и да биде вистинска „земја на мирот и плурализмот каде што различните заедници ќе можат да живеат во братство“.
85-годишниот папа планираше да го посети Либан минатата пролет, но повредата на коленото го одложи патувањето, а нов датум не е одреден.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Запечатена резиденција на папата, во Ватикан владее седисвакација

Ватикан ја запечати официјалната резиденција на папата Франциско, симболично започнувајќи период на жалост.
На снимката објавена од Ватикан се гледа кардиналот Кевин Џозеф Фарел, камерленгото, како гледа како службеник на Ватикан става црвена лента на вратата од резиденцијата на папата, ја врзува, а потоа става восочен печат на лентата. После тоа, Фарел ја проверува пломбата и се уверува дека вратата е цврсто затворена.
The papal apartments in the Apostolic Palace — unused during Pope Francis’ pontificate — have been officially sealed by Cardinal camerlengo Kevin Farrell following the Pope’s death. This act marks the beginning of the “sede vacante” period, during which the See of Peter remains… pic.twitter.com/p3PcYqN050
— EWTN Vatican (@EWTNVatican) April 21, 2025
Запечатувањето на папската резиденција е традиционален обред што го изведува камерленго, привремениот управител на Ватикан, а историски служел за да се спречи ограбувањето на папските одаи.
Овој чин го симболизира официјалниот крај на понтификатот на папата Франциско и почетокот на периодот на седисвакација – период без папа.
Европа
„Гробот нека биде едноставен, без украси, на плочата нека стои еден збор“: Ватикан го објави тестаментот на Папата

Папата Франциско во својот последен тестамент потврди дека сака да биде погребан во базиликата Света Марија Велика во Рим, наместо во базиликата Свети Петар во Ватикан, каде што многу од неговите претходници го најдоа своето последно почивалиште.
Во тестаментот објавен од Ватикан, Франциско јасно ја изразил својата желба да биде погребан „во земја, без посебни украси“, а над неговиот гроб треба да стои едноставна плоча со неговото папско име на латински: Franciscus.
Папата исто така напишал дека договорил неименуван добротвор да ги покрие трошоците за неговиот погреб.
„Трошоците за подготовка на погребот ќе бидат покриени од сумата што ја обезбеди добродетелот, кој договорив да биде префрлен во базиликата Света Марија Велика“, стои во тестаментот.
Европа
Ватикан: Папата почина од мозочен удар и срцево затајување

Ватикан објави дека папата Франциско починал од мозочен удар кој предизвикал кома и неповратно срцево затајување. „Смртта е констатирана со електрокардиограм“, пишува во изводот на смртта потпишан од директорот на Одделот за здравје и хигиена на Ватикан, професор Андреа Аркангели.
„Потврдувам дека Неговата Светост Франциско (Хорхе Марио Бергољо), роден во Буенос Аирес (Аргентина) на 17 декември 1936 година, жител на Ватикан, државјанин на Ватикан, почина во 7:35 часот на 21 април 2025 година, во неговиот стан во резиденцијата Санта Марта“, напиша тој.
Аркангели наведува дека папата по мозочниот удар прво паднал во кома, а потоа починал. Причините за смртта се „мозочен удар“, „кома“ и „неповратна кардиоциркулаторна инсуфициенција“, се вели во соопштението. Во документот се додаваат и претходните здравствени проблеми на папата, „епизоди на акутна респираторна инсуфициенција со билатерална мултимикробна пневмонија, хипертензија и дијабетес тип II“.
Папата Франциско почина околу 90 минути откако утрово го разбудил будилникот, јавија италијанските медиуми. Тој наводно се разбудил кога алармот му се вклучил во 6 часот, му се слошило во 7 часот наутро, а починал од мозочен удар во 7:35 часот, пишува „Кориере дела Сера“. Лекарите претходно објавија дека тој „починал мирно“.