Вчера, во основно училиште во Хрватска се случил непријатен инцидент – обезбедувањето, кое им било доделено на располагање, се опило, па лицата морале да бидат однесени од полиција. Ова за „Индекс“ го потврдиле и од самото училиште откога од родителите се дознало дека директорот ги известил за непријатноста.

„Еден од службените чувари назначен во училиштето од Градската управа и еден неофицијален гостин во безбедносна опрема, и двајцата очигледно во алкохолизирана состојба, биле пријавени од училиштето во полициска станица и биле приведени.

„Се јавив во сите надлежни служби, Министерството, социјалната служба, Народниот правобранител, Градската управа, надлежниот лекар, а известени се и децата, дежурните наставници, фирмата за обезбедување“, им напиша директорот Ивица Модриќ на родителите, пренесува медиумот.

Во училиштето, според написите, бил и другиот колега на обезбедувачот што работел во училиштето. Тој дошол на училиште веќе во пијана состојба, а потоа двајцата продолжиле да се дружат. Настанот бил реконструиран врз основа на снимки од видеонадзорот. Едниот бил толку пијан што дури и се потпрел на дете, но потоа било констатирано дека нема елементи на кривично дело на штета на детето, туку дека човекот бил многу пијан.

„Извршени се прегледи на камерите на училиштето и беше видливо сѐ што е важно, затоа врз основа на сѐ што е релевантно, што презеде полицијата, и врз основа на извршениот разговор, ќе се преземат понатамошни дејства.

Она што го барам од сите родители е да ги смират децата бидејќи тие, особено учениците, му се потсмеваа на непознатиот, кој се тетерави и додека паѓаше и се држеше за ѕидовите да остане на нозе, дојде во контакт со децата. Истиот тој човек паднал пред училиштето поради состојбата во која се наоѓал“, пишува директорот.

„За среќа, нема поголеми инциденти и нема поголеми последици, но некој ќе треба да одговара за немилиот настан, а апсолутно сите информации ќе ги добиете кога ќе бидат комплетирани и објавени“, објаснува директорот во пораката, пишува медиумот.

„За денешниот настан се шират лажни информации, затоа имајте предвид дека лично ми е непријатно и жалам што лицето задолжено за контрола на влезот во нашето училиште само направи грешка што можеше да има посериозни последици“, додал надлежниот од училиштето.

Германскиот канцелар Олаф Шолц остро реагира на идејата на американскиот претседател Доналд Трамп да бара од Украина да ги снабдува Соединетите Американски Држави со ретки метали како услов за финансиска помош за земјата разурната од војна.

Шолц доцна синоќа го изрази своето несогласување со идејата по неформалниот состанок на министрите за одбрана на ЕУ во Брисел.

Германскиот канцелар смета дека украинските ресурси треба да останат во нападнатата земја за да се финансира нејзината реконструкција по војната. „Треба да ги искористиме ресурсите на земјата за сѐ што ќе биде потребно по војната“, изјави Шолц.

Тој додаде дека користењето на овие средства сега за потребите на поддршка на одбраната би било многу себично и фокусирано само на сопствените интереси. Шолц нагласува дека на Украина во иднина нема да ѝ треба само силна армија, туку и огромни финансиски средства за обнова на земјата.

„Ова се големи задачи, со оглед на огромното уништување што се случува во Украина. Затоа мислам дека би било подобро да се искористат украинските ресурси за подобра иднина“, заклучи Шолц.

Трамп претходно вчера во Овалната соба на Белата куќа рече дека сака „да склучи договор со Украина според кој тие со своите ретки метали и други работи ќе го обезбедат она што им го даваме“. Тој се пожали дека Европа не обезбедила исто ниво на помош за Украина како САД.

Тој нагласи дека украинската влада сигнализирала отвореност кон идејата за размена на своите резерви на литиум, титаниум и други ретки метали за континуирана американска помош. „Украина ја изрази својата подготвеност да соработува во снабдувањето со основни материјали. Многу сектори се потпираат на нив“, додаде тој.

Трагично заврши потрагата по 24-годишниот хрватски фудбалер Јаков Јелкиќ, кој исчезна рано наутро во саботата во Аликанте на источниот брег на Шпанија. Шпанската полиција го пронашла неговото тело на пристаништето Аликанте, со што се остварени најлошите стравови на семејството и пријателите.

По неколкудневна неизвесност, властите го открија телото на Јелкиќ во водата, а нуркачите од Цивилната гарда го извлекоа на брегот. Официјално е потврдено дека телото е пронајдено на крајот на едно од пристаништата. Во присуство на истражители процесот на извлекување на телото беше завршен вчера нешто пред 18.30 часот по локално време.

Иако резултатите од обдукцијата сѐ уште се чекаат, според полициски извори, прелиминарната истрага сугерира дека смртта е последица на несреќен случај и дека нема вмешаност на трето лице.

Исчезнувањето на Јаков Јелкиќ во саботата било пријавено во шпанската полиција откога му се изгубила секаква трага во ноќниот клуб „Упикум“ кај плоштадот Габриел Миро во Аликанте. Јелкиќ, кој имаше двојно швајцарско и хрватско државјанство, пристигна во градот еден ден порано со соиграчите од швајцарски фудбалски клуб од пониска лига.

Според неговите пријатели, по едно вечерно излегување, тој се вратил во клубот барајќи ја јакната што ја оставил таму, но никој од нив повеќе не го видел потоа. Следното утро, кога забележале дека не се вратил во хотелот, пријателите ја известиле полицијата, која почнала интензивна потрага.

Во рамките на истрагата прегледани се снимките од безбедносните камери од локации во надлежност на Градот, комплексот „Панорамис“ и Капетанијата на пристаништата. На снимката се гледа дека Јелкиќ се движи сам кон областа Дистрито Дигитал, дел од зоната на пристаништето во Аликанте. Набргу потоа му се изгубил сигналот од мобилниот телефон во оваа област, околу три часот наутро, пишува „Дијарио Аликанте“.

Кога истражителите ги утврдија последните познати движења на исчезнатиот млад човек, потрагата беше интензивирана, вклучително и снимки од воздушни дронови и пребарување на тимови со нуркачи. Клучен момент во истрагата се случил кога истражител од полициската управа во Аликанте забележал тело во водата, на речиси два метра под површината, на крајот на пристаништето, јавуваат шпанските медиуми.

Телото е идентификувано како Јаков Јелкиќ, а по наредба на дежурниот суд во Аликанте, била спроведена официјална постапка на извлекување.

Телото е пренесено во Институтот за судска медицина во Аликанте, каде што денеска ќе биде извршена обдукција. Се очекува резултатите да ги разјаснат околностите на смртта и да потврдат дали станува збор за несреќен случај.

Оваа трагедија е втора смрт забележана во пристаништето Аликанте изминатиот викенд, што предизвика загриженост кај локалните власти и граѓаните. Имено, во неделата во пристаништето било пронајдено тело на жена што претходниот ден била пријавена за исчезната.