Свет
Песков: Треба да се помине долг пат за да стекнеме доверба во Америка
Портпаролот на Кремљ, Дмитриј Песков, денеска изјави дека Русија верува во себе и за да се зборува за доверба во Соединетите Американски Држави (САД), мора да се помине долг пат. „Мораме да развиеме мерки за враќање и зајакнување на меѓусебната доверба“, им рече Песков на новинарите, пренесе агенцијата РИА.
Тој нагласи дека лидерите на Америка покажале политичка волја да го обноват дијалогот со Русија, кој практично беше спуштен на нула за време на претходната администрација.
Преземени се мерки за нормализирање на дијалогот, пред сè, за нормализација на работата на нашите дипломатски ресори на реципрочна основа“, рече Песков.
На прашањето на новинарите да ги коментира наводните планови за распоредување мировни сили во Украина тој нагласи дека разговорите за можни заеднички проекти меѓу Америка и Русија и економската соработка меѓу двете земји ќе дојдат кога ќе се реши ситуацијата во Украина.
„Ќе има време да се разгледаат можните проекти за трговска, економска и инвестициска соработка. Има многу широки изгледи за тоа“, рече Песков.
Тој оцени дека пристапот на ЕУ кон Украина може да се промени по контактот меѓу Америка и Европа.
„Изјавите на Европејците од Киев сè уште не даваат сигнали за балансиран пристап, но можеби врз основа на резултатите од контактите меѓу Европејците и Американците, Европа некако ќе гравитира кон поголема рамнотежа“, рече тој, пренесе „Танјуг“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хамас предаде тела, Израел порачува: „Борбата за нашите заложници не запира“
Израел ги презеде телата на двајца заложници кои ги држел Хамас во Газа, пренесе ЦНН. Посмртните останки биле предадени преку Црвениот крст и пренесени на идентификација во израелскиот форензички институт.
Од кабинетот на израелскиот премиер соопштија дека „напорите за враќање на сите заложници продолжуваат и нема да престанат додека не се вратат сите“.
Примопредавањето се случува два дена по израелските воздушни напади во Газа, во кои, според палестинското министерство за здравство, загинале повеќе од 100 лица. И покрај ескалацијата, и Израел и Хамас изјавиле дека остануваат посветени на прекинот на огнот посредуван од САД.
Американскиот претседател Доналд Трамп порача дека „ништо нема да го загрози примирјето“ и се закани дека ќе го „елиминира Хамас“.
Последното примопредавање, според медиумите, поминало без компликации, за разлика од претходните случаи кога Хамас ја повлекуваше одлуката за предавање поради израелски напади.
Свет
Медведев го нарече белгискиот министер „имбецил“, Франкен му возврати со песна на Селена Гомез
Белгискиот министер за одбрана Тео Франкен влезе во вербален судир со поранешниот руски претседател и сегашен заменик-претседател на Советот за безбедност на Русија, Дмитриј Медведев.
Се започнало кога Франкен изјавил дека, доколку Русија ја нападне Белгија, „НАТО би ја израмнил Москва со земја“. На тоа, Медведев остро реагирал, нарекувајќи го „имбецил“ и потсетувајќи дека оваа недела Русија го тестирала нуклеарното суперторпедо „Посејдон“, кое го опишал како „вистинско оружје на судниот ден“.
Франкен утрово возвратил преку Инстаграм: „Главниот руски насилник не престанува да се заканува и навредува. НАТО не е во војна со Русија, но принципот на одмазда е неприкосновен веќе 76 години. Не повлекувам ниту збор.“
На крајот, министерот ја споделил песната „Calm Down“ од Селена Гомез со порака до Медведев – да се „смири“.
Свет
Зеленски: Новите санкции ќе ѝ донесат на Русија загуби од најмалку 50 милијарди долари годишно
Украинскиот претседател Володимир Зеленски изјави дека новите санкции против Русија ќе ѝ предизвикаат годишни загуби од најмалку 50 милијарди долари, пренесе „Укринформ“.
Тој се повика на извештај на шефот на украинската надворешна разузнавачка служба Олег Ивашченко и рече дека санкциите против нафтените компании веќе создаваат сериозни финансиски последици за Москва.
Зеленски изрази надеж дека ќе следат и нови санкциски мерки, нагласувајќи дека арапските земји со своите испораки нафта можат да спречат какви било потреси на светскиот пазар.
Тој додаде дека Украина сојузниците редовно ги информира за лица и структури што заслужуваат санкции и дека „голем дел од нашите предлози се земаат предвид“.
На 23 октомври високата претставничка на ЕУ за надворешна политика Каја Калас објави дека е одобрен 19-от пакет санкции против Русија, а американското министерство за финансии веќе воведе мерки против „Росњефт“ и „Лукоил“. Зеленски претходно изјави дека американските санкции би можеле да ги намалат руските приходи за околу 5 милијарди долари месечно.

