Свет
Петмина млади исчезнаа по ноќно излегување: по дводневна потрага, пронајдени телата на тројца

Пет млади лица исчезнале ноќта меѓу петокот и саботата кога се враќале од ноќно излегување во Њупорт. По дводневна потрага, полицијата пронашла тела на тројца од нив, а двајца итно се хоспитализирани.
Софи Рејсон (20), Ајв Смит (21) и Дарси Рос (21) последен пат биле видени во бар во раните утрински часови во саботата. Полицијата верува дека трите девојки влегле во џип „фолксваген тигуан“ со уште две млади момчиња, Рафаел Џин и Шон Лонглин, откако излегле во петокот.
Никој не е виден од 2 часот по полноќ во саботата кога Дарси и Рафаел ги објавија фотографиите на Snapchat.
Полицијата, конечно, го пронајде автомобилот во кој последен пат биле видени петте млади лица. Тројца од нив, чие исчезнување во меѓувреме е пријавено, се пронајдени мртви, а две лица се пренесени во локалната болница во тешка состојба.
Полицијата верува дека починатите учествувале во сообраќајна несреќа рано наутро во саботата кога нивниот автомобил излетал од патот, пренесува „Мирор“.
Сестрата на Ајви, Лорена, преку објава на „Фејсбук“ потврди дека сестра ѝ, за жал, починала.
„Ви благодарам на сите за поддршката. Нема да одговарам на пораките, да се обидеме како семејство да ја прифатиме оваа страшна вест“, напиша таа.
Во меѓувреме, се огласи мајката на Софија, Ана, која е бесна на полицијата бидејќи навреме не почнале да ги бараат ќерка ѝ и нејзините пријатели. Таа вели дека била очајна кога ќерка ѝ исчезнала и сама со својот автомобил ја пребарала областа.
„Решив сама да ги барам откако полицијата ми рече да престанам да им се јавувам и да прашам дали има новости. Ќерка ми не излегуваше често, знаев дека нешто не е во ред, нема тукутака да замине“, рекла Ана.
Ана рече дека Ајв, Софи и Дарси се пријатели уште од мали. Таа вели дека последен пат се чула со ќерка си во петокот попладне кога Софи ѝ кажала дека излегува со другарките.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Премиерот на Канада: Путин се плаши да се сретне со Зеленски

Рускиот претседател Владимир Путин се плаши да се сретне со украинскиот претседател Володимир Зеленски за да разговара за условите за завршување на војната, изјави канадскиот премиер Марк Карни на заедничката прес-конференција со германскиот канцелар Фридрих Мерц.
Како што објави Укринформ, Карни рече дека Путин постојано поставува нови услови и ги одложува работите затоа што се плаши од состанокот. Според канадскиот премиер, Зеленски е подготвен да се сретне со Путин на која било неутрална територија.
Премиерот на Канада нагласи дека Зеленски не очекува Путин да дојде во Киев или дека самиот ќе патува во Москва за таков состанок. Сепак, секоја неутрална локација би била прифатлива, додаде Карни.
Тој рече дека е клучно сојузниците на Украина да продолжат да даваат поддршка додека не се одржи таков состанок.
Фото: принтскрин
Свет
Зеленски: Од украинска страна, сè ќе биде што е можно поподготвено за да се стави крај на војната

Украинскиот претседател Володимир Зеленски објави дека во текот на оваа недела претставниците на таа земја ќе имаат повеќе меѓународни контакти, што би можело да биде чекор кон завршување на војната со Русија, како и дека „сè ќе биде максимално подготвено за завршување на војната“ од украинска страна.
„Оваа недела ќе има контакти со Турција, ќе има контакти со земјите од Заливот, со европските земји, што може да биде платформа за разговор со Русите“, рече Зеленски во вечерното видео обраќање, пренесува Укринформ.
Тој рече дека е важно земјите-партнери на Украина да го потврдат ова.
„Дури и во иднина, сè ќе зависи исклучиво од волјата на светските лидери, првенствено на Соединетите Американски Држави, да извршат притисок врз Русија“, нагласи Зеленски.
Според него, потребни се нови чекори и нов притисок преку санкции и царини за да се принуди Русија да ја заврши војната.
„Тукушто одржав состанок со дипломатскиот тим – Министерството за надворешни работи, Канцеларијата, сите. Подготвуваме нови контакти со лидерите на земјите партнери. Очекуваме дека наредните недели ќе бидат многу активни“, додаде Зеленски.
Фото: принтскрин
Свет
Трамп: Нема да има светска војна, но ќе има економска

Претседателот на САД, Доналд Трамп, изјави дека е подготвен да воведе економски санкции врз Русија доколку рускиот претседател Владимир Путин не се согласи на прекин на огнот, предупредувајќи на сериозни последици.
„Сакаме да заврши. Имаме економски санкции. Зборувам за економски бидејќи нема да влеземе во светска војна“, рече Трамп.
Трамп не постави нова временска рамка за спроведување на санкциите доколку војната во Украина не престане, објави Си-Ен-Ен.
„Нема да има светска војна, но ќе има економска војна. Ќе биде лошо за Русија“, рече Трамп.
Тој изрази надеж дека сè уште постои пат до медијација во постигнувањето договор за прекин на војната во Украина.
Трамп, исто така, повторно посочи дека украинскиот претседател Володимир Зеленски носи дел од вината за конфликтот.
„Она што мислев дека ќе биде најлесно, се покажа како најтешко“, рече Трамп за војната во Украина, наведувајќи дека сè уште мисли дека ќе може да помогне во прекинувањето на тој конфликт.
Трамп неколку пати се закани со воведување санкции кон Русија ако не ја заврши војната во Украина и постави временски рамки за тоа, но подоцна ги продолжи, потсетува CNN.
Фото: принтскрин