Свет
Милеј: Почнува обновата на Аргентина

Според прелиминарните резултати од претседателските избори во Аргентина, врз основа на 90 проценти од преброените гласови кандидатот на екстремната десница, Хавиер Милеј, победи во вториот изборен круг против својотривал, поранешниот министер за економија, Серхио Маса.
Прелиминарните резултати покажуваат дека Милеј освоил речиси 56 отсто од гласовите, а неговиот противкандидат Серхио Маса освоил 44 отсто од гласовите, јави Би-би-си.
Во говорот пред поддржувачите во Буенос Аирес, Милеј вети драстични промени за справување со трагичната реалност на Аргентина, имено зголемената инфлација и широко распространетата сиромаштија.
Тој истакна дека „почнува обновата на Аргентина“.
„Денес, почнува крајот на падот на Аргентина. На моделот на декаденција му дојде крајот. Нема враќање назад“, рече Милеј.
Тој најави дека Аргентина ќе се врати на место во светот кое „никогаш не требало да го загуби“.
Противникот Серхио Маса го прозва својот противник и го призна поразот велејќи дека „Аргентинците избраа поинаков пат“, пренесува „Гардијан“.
„Очигледно ова не се резултатите на кои се надевавме. Зборував со Хавиер Милеј за да му честитам бидејќи тој е претседателот што повеќето Аргентинци го избрале во следните четири години“, додаде Маса, чие движење владее 16 од последните 20 години.
За време на неговата изборна кампања, вети дека ќе ја укине централната банка и ќе го воведе доларот во аргентинската економија со цел да се надмине финансиската катастрофа што остави 40 отсто од 45-те милиони граѓани на Аргентина во сиромаштија и ја зголеми инфлацијата на повеќе од 140 отсто.
„Знам како да го искоренам ракот на инфлацијата“, рече Милеј за време на последната претседателска дебата.
На новоизбраниот претседател на Аргентина, кој ќе ја преземе функцијата на 10 декември, победата му ја честитаа актуелниот претседател на Аргентина, Алберто Фернандез, како и претседателите на САД и Бразил.
На Мајли му честита и поранешниот американски претседател Доналд Трамп, кој рече дека „повторно ќе ја направи Аргентина голема“, а сопственикот на платформата Х, Илон Маск, најави дека „просперитетот е пред Аргентина“.
Изборната комисија објави дека одѕивот бил 76 отсто, објави претходно „Ројтерс“.
Во првиот круг Маса освои 36,7 отсто, а Милеј 30 отсто.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Поддржувачите на Марин Ле Пен денеска протестираат во Париз, се очекуваат и контрапротести

Радикалната десничарска партија на француската лидерка Марин Ле Пен повика денеска на протестен митинг во Париз, откако политичкиот суд и забрани да се кандидира на следните претседателски избори во Франција.
Партијата „Национален собир“ очекува меѓу 8.000 и 10.000 учесници, објавија медиумите повикувајќи се на партиски претставници. За денеска се планирани два контрапротести.
Левичарската партија Непокорена Фрација и Зелените повикаа на протест против крајната десница на централниот плоштад, Плоштадот на Републиката. Поддржувачите на ренесансната партија на претседателот Емануел Макрон, исто така, планираат да протестираат на партиски собир во предградието на градот.
Полицијата најави дека за време на протестот ќе дејствува со полна сила.
Во понеделникот судот пресуди против Ле Пен, нејзината партија и други партиски функционери за проневера на средства на ЕУ. Таа е осудена на делумно условна затворска казна и пет години забрана за учество на избори. Додека затворската казна е условна поради жалбата на Ле Пен, забраната за учество на изборите стапува во сила веднаш.
Следните претседателски избори се во 2027 година. Апелациониот суд во Париз објави дека има намера да донесе одлука до средината на 2026 година. Протестот на Национален собир е закажан за 15 часот.
Свет
Францускиот премиер: Поддршката на Трамп за Ле Пен е мешање во внатрешните работи

Поддршката што ја дава американскиот претседател Доналд Трамп на лидерката на француската екстремна десница, Марин Ле Пен, претставува мешање во внатрешните работи, изјави францускиот премиер Франсоа Бајру.
Во интервју за весникот „Паризиен“ (Le Parisien), тој рече дека „мешањето станало како закон во светот“.
„Јасно гледам дека на неколку континенти некои се обидуваат да воспостават меѓународна непристојност, нелиберална, која одлучи дека човековите права, владеењето на правото, демократското разбирање меѓу народите припаѓаат на минатото“, рече Бајру.
Трамп неодамна на социјалните мрежи со големи букви напиша „Ослободете ја Марин Ле Пен“. „Не ја познавам Марин Ле Пен, но чувствителен сум на фактот дека таа работеше напорно толку многу години“, напиша американскиот претседател.
Премиерот на Франција изјави дека не е добро што се планираат собири во Франција за поддршка на Марин Ле Пен, која неодамна беше осудена за проневера на јавни средства.
„Не е ниту здраво ниту пожелно да се демонстрира против одлуката на судот“, рече Бајру.
На 31 март, Ле Пен и осум пратеници на екстремно десничарската партија Национален собир беа прогласени за виновни за проневера на јавни средства. Со таа пресуда, Марин Ле Пен беше спречена да се кандидира на претседателските избори, закажани за 2027 година.
Националното собрание повика на митинзи за поддршка на Ле Пен.
Според судот, Марин Ле Пен е прогласена за виновна за проневера на 474.000 евра поради фиктивно вработување на четворица партиски помошници во Европскиот парламент.
Судот процени дека вкупната штета изнесува 2,9 милиони евра, бидејќи пратениците на екстремно десничарската партија „вработиле во Европскиот парламент луѓе кои реално работеле за Националниот собир“.
Свет
Хамас објави видео од двајца живи израелски заложници

Вооруженото крило на палестинското движење Хамас објави видео на кое се гледаат двајца израелски заложници во Појасот Газа, во кое тие тврдат дека наводно преживеале нов израелски напад.
По два месеци кревко примирје меѓу Хамас и Израел, на 18 март, израелската армија ја продолжи воената офанзива во Појасот Газа, од каде што палестинското движење почна напади врз Израел на 7 октомври 2023 година.
Видеото, кое го пренесе бригадата Езедин ал Касам, трае нешто повеќе од две минути.
Еден од двајцата мажи изгледа повреден, со завои на лицето и десната рака. АФП не можеше да ја потврди автентичноста на видеото или датумот кога е снимено.
Форумот за фамилии на заложници, главната организација која се залага за ослободување на Израелците кои се држат во Појасот Газа, соопшти дека идентификувале еден од двајцата заложници како Максим Херкин, чие семејство побара од медиумите да не го објавуваат видеото.
Според израелските медиуми, вториот заложник е војникот Бар Куперштајн.
Двајцата мажи беа киднапирани на 7 октомври 2023 година, за време на нападот на на Хамас на музичкиот фестивал Нова.
Неодамнешниот прекин на огнот овозможи враќање на 33 израелски заложници, вклучително и осум кои оттогаш загинаа, во замена за ослободување на околу 1.800 Палестинци кои се држат во израелските затвори.
Од 18 март, армијата го засили бомбардирањето на Газа и ги испрати своите војници назад на фронтот, во многу делови од териториите од кои армијата се повлече за време на прекинот на огнот.
Израелскиот премиер Бенјамин Нетанјаху и неговата влада тврдат, против советите на повеќето семејства и роднини на заложниците, дека зголемениот воен притисок е единствениот начин да се принуди Хамас да ги врати.
Од 251 заложник киднапирани за време на нападот на Хамас на 7 октомври 2023 година, 58 се уште се на палестинските територии, вклучително и 34 за кои се верува дека се мртви.