Свет
Познати личности од целиот свет му напишаа писмо на Путин

Повеќе од 70 познати личности од целиот свет му напишаа отворено писмо на рускиот претседател Владимир Путин. Во писмото бараат тој да му обезбеди лекување на Алексеј Навални, кој е во затвор.
„ Како руски државјанин, Навални има законско право да биде прегледан и лекуван од лекар по негов избор“ се наведува во писмото.
Нивниот повик беше објавен денеска од повеќе европски весници, вклучувајќи го и „Економист“ на англиски јазик.
Писмото го потпишаа авторката на книгата за Хари Потер, Џеј Кеј Роулинг, тројца добитници на Нобелова награда за литература, Херта Милер, Луиз Глук и Светлана Алекиевич, член на групата Аба – Бјорн Улваес, британските актери Бенедит Камбербач и Кристин Скот Томас, но и историчарите Нил Фергусон и Симон Шама.
Во писмото што споменатите познати личности му го испратија на Путин се истакнува дека Навални се наоѓа во критична состојба.
„ Господине претседател, ве покануваме веднаш да му пружите на Алексеј Навални медицинска помош и нега што му е итно потребна, на која тој има право, во согласност со рускиот закон. Како некој што се заколнал дека ќе го почитува законот, сега имате можност да го примените тоа во пракса“ додаваат во писмото.
Навални штрајкува со глад со денови, обидувајќи се да ги принуди затворските власти да му дозволат да посетува лекар.
44-годишниот руски дисидент неодамна се пожали на болки во грбот, вкочанетост на екстремитетите, треска и кашлица. Неговото семејство, адвокати и приврзаници изразија загриженост за неговото здравје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нов силен земјотрес во Авганистан

Земјотрес со магнитуда од 5,5 степени го погоди југоисточен Авганистан, само два дена откако земјотрес со магнитуда од 6 степени уби повеќе од 1.400 луѓе и повреди илјадници други во истиот регион, предизвикувајќи стравувања од понатамошни штети и уништување.
Денешниот земјотрес беше на релативно мала длабочина од 10 километри, иста како и оној што го погоди земјата во недела на полноќ. Тоа беше еден од најлошите земјотреси во Авганистан во последните години, срамнувајќи ги со земја куќите во изолирани села. Степенот на штетата од новиот земјотрес сè уште не е познат.
Тешкиот терен сериозно ги попречува напорите за спасување во изолираните села во погодениот планински регион. Досега е познато дека најмалку 1.411 лица загинале, 3.124 се повредени, а повеќе од 5.400 куќи се уништени, изјави портпаролот на талибанската администрација, Забихулах Муџахид.
Се стравува дека повеќе луѓе се заробени под урнатините, според Авганистанската црвена полумесечина, хуманитарна група што работи во регионот. Координаторот на ОН во Авганистан изјави дека бројот на жртви сигурно ќе се зголеми.
Изолираната земја е склона кон смртоносни земјотреси, особено во планинскиот венец Хиндукуш, каде што се среќаваат индиската и евроазиската тектонска плоча. Источните провинции Кунар и Нангархар беа најтешко погодени од земјотресот во недела навечер.
Фото: Илустрација (ЕПА)
Свет
(Видео) Ким Џонг-ун со возот наречен движечка тврдина стигна во Пекинг

Познатиот оклопен воз на Ким Џонг-ун повторно е во центарот на светската јавност, откако севернокорејскиот лидер со него патуваше до Пекинг. Таму ќе се сретне со кинескиот колега Шји Џинпинг и рускиот претседател Владимир Путин, пишува „Њузвик“.
Ова е прва посета на Кина од јануари 2019 година, а се очекува да присуствува на воена парада во Пекинг по повод 80-годишнината од завршувањето на Втората светска војна, приклучувајќи се на лидерите на двата најважни сојузници на Северна Кореја.
🚨‼️🔥North Korean leader Kim Jong Un is on his way to Beijing to attend China’s Victory Day military parade on September 3, marking the 80th anniversary of Japan’s surrender in World War II.
Kim travels on a special armored train pic.twitter.com/mOyJt8DieO
— MOSCOW NEWS 🇷🇺 (@MOSCOW_EN) September 2, 2025
Во возот беа и водечките официјални лица на владејачката Работничка партија на Кореја и севернокорејската влада. Со Ким во Пекинг допатува и неговата помлада ќерка, Ким Џу-е, за која се смета дека можеби ќе го наследи.
Возот што го користи Ким Џонг-ун, наречен „движечка тврдина“, има непробојни стакла, зајакнати подови и ѕидови отпорни на експлозии, како и противвоздушно оружје, според јужнокорејското Министерство.
Воени извори од Јужна Кореја наведуваат дека возот има радари, топови, лансери на ракети земја-воздух и дури и хеликоптер за итно бегство. Сета опрема значително го зголемува товарот на возот, кој се движи со максимална брзина од околу 56 километри на час. Патувањето до Пекинг, околу 1.300 километри, трае приближно 20 часа.
На утрешната воена парада првпат ќе се сретнат кинескиот, рускиот и севернокорејскиот лидер. „Присуството на Ким и Путин во Пекинг формализира трипартитен однос меѓу Кина, Русија и Северна Кореја пред јавноста“, изјави за AFP Су Ким, консултант за геополитички ризик и поранешен аналитичар на ЦИА.
Свет
(Видео) Црна кеса фрлена од прозорецот на Белата куќа

Невообичаен инцидент во Белата куќа предизвика жестоки дискусии на Интернет и дополнително го отвори прашањето за безбедноста и транспарентноста. На социјалните мрежи се појави вирално видео на кое се гледа како темна кеса лета низ прозорецот на вториот кат од Белата куќа, недалеку од забранетата зона.
Досега, ниту Белата куќа ниту Тајната служба не коментираа за овој настан, што само ги поттикна шпекулациите.
Молчењето од официјални извори дополнително ги поттикна дискусиите на Интернет. Корисниците на социјалните мрежи шпекулираат дека може да станува збор за едноставно отстранување на ѓубре што тргнало наопаку, но и за многу посериозни можности – вклучително и прикривање на здравствени или безбедносни проблеми.
What is going on here? pic.twitter.com/Sy0lRUEXPq
— PatriotTakes 🇺🇸 (@patriottakes) September 1, 2025
„Зошто некој фрла предмети низ прозорецот на Белата куќа? Ова нема смисла во нормални околности. Медиумите треба да добијат одговори, барем од безбедносна перспектива. Што точно прави Тајната служба?“, напиша еден корисник на X.
Инцидентот се случи во време кога има сè повеќе гласини за здравјето на американскиот претседател Доналд Трамп. Во изминатата недела, теориите дека претседателот починал се ширеа на социјалните медиуми, поттикнати од неговото отсуство од јавни настани и неговиот зафатен распоред. Трамп ги отфрли шпекулациите откако беше снимен како ја напушта Белата куќа за да игра голф.
Гласините започнаа откако камерите фатија видлива модринка на неговата рака на јавен настап, за што Белата куќа никогаш директно не коментираше.
Во јули, портпаролката на Белата куќа, Каролин Ливит, објави дека Трамп страда од хронична венска инсуфициенција, болест на протокот на крв што предизвикува оток во нозете. Помошниците инсистираат дека претседателот е сè уште во добра форма за функцијата, иако фотографиите од неговите отечени нозе што се појавија на Интернет само поттикнаа дополнителни сомневања.