Свет
Полската националистичка влада поднесе оставка на првата седница на новиот парламент

Полската националистичка влада предводена од премиерот Матеуш Моравјецки поднесе оставка, четири недели по претрпениот пораз на парламентарните избори, на првата седница на новиот парламент. Одлуката го претставува првиот чекор кон промена на власта по осум години владеење на партијата Право и Правда (ПиС).
Сојузот на три опозициски партии предводени од поранешниот претседател на Европскиот совет, Доналд Туск, освои јасно мнозинство во Сејм, долниот дом на полскиот парламент, на изборите на 15 октомври.
Трите партии, кои се залагаат за проевропска политика, веќе потпишаа коалициски договор. Иако ПиС се уште е најголемата партија во парламентот со 194 мандати, таа нема коалициски партнер или апсолутно мнозинство. Промената на власта во Варшава ќе значи и промена на полската надворешна политика.
ПиС се судри со Брисел околу судските реформи, а односите со соседна Германија се влошија откако партијата побара исплата на 1,3 милијарди евра репарации од Втората светска војна за време на изборната кампања. Трите опозициски партии се залагаат за помирувачка политика кон Германија. Шеесет и шестгодишниот Туск беше премиер на Полска од 2007 до 2014 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Хорор во Италија: Родители од Бангладеш ја тепале и дрогирале ќерка им за да ја натераат на договорен брак

Брачна двојка од Бангладеш, со живеалиште во Римини, Италија, е уапсена под сомнение дека ја тепале и дрогирале својата 18-годишна ќерка за да ја присилат да прифати договорен брак во Бангладеш, соопшти италијанската полиција.
Според истрагата, девојката била заклучувана дома, тепана и дрогирана, а при патувањето во Дака роднините ѝ одзеле документи и ја принудиле да зема лекови. Таму ѝ бил организиран состанок со маж постар од неа 10 години.
Таа успеала да контактира советувалиште за здравје на жени и преку нив и карабинерите, кои ја презеле на аеродромот во Болоња и ја сместиле на безбедна локација.
Родителите, на возраст од 55 и 42 години, се ставени во куќен притвор и се товарат за семејно насилство, присила и наведување на брак.
Свет
Џими Кимел се врати на ТВ и веднаш жестоко удри по Трамп

Познатиот американски комичар и водител Џими Кимел штотуку се врати на малите екрани, а веќе предизвика бура со острите критики кон Доналд Трамп. Изгледа дека воопшто не се плаши од нова суспензија, со оглед на тоа што во синоќешната емисија беше немилосрден кон американскиот претседател.
Eмисијата беше привремено суспендирана „на неопределено време“ откако на 15 септември Кимел ја коментираше смртта на Чарли Кирк. Водителот тогаш зборуваше за „политизацијата“ на смртта на 31-годишникот и за реакцијата на Доналд Трамп, што доведе до одлуката на ТВ куќата „Еј-би-си“. Одлуката предизвика негодување кај бројни јавни личности, но и одушевување кај самиот Трамп. Сепак, суспензијата беше укината и 57-годишниот водител се врати пред камерите.
Во своето враќање на 29 септември, Кимел веднаш се нафрли на одлуката на Трамп да ги декласифицира досиејата за Амелија Ерхарт, пилотка која исчезнала во 1937 година. Трамп на својата мрежа Truth Social напиша: „Многумина ме прашаа за животот и времето на Амелија Ерхарт, толку интересна приказна. (…) Наредувам мојата администрација да ги декласифицира и објави сите владини записи поврзани со Амелија Ерхарт, нејзиното последно патување и сè друго во врска со неа. Ви благодарам за вниманието посветено на ова прашање!“
Кимел цинично прокоментира дека претседателот „вредно работи“ и измислува „секакви глупости“ за да го одврати вниманието од наводните досиеја за Епстајн. „Освен ако нејзиниот последен лет не бил на островот на Џефри Епстајн, никого не го интересира. Барем стигна до буквата ‘E’ во списите. Тоа е напредок,“ рече Кимел.
Забелешката на Кимел се однесува на силниот притисок на јавноста и политиката врз администрацијата на Трамп да ги објави сите документи поврзани со Џефри Епстајн, кој изврши самоубиство во затвор во август 2019 година. Минатиот месец, Одборот за надзор на Претставничкиот дом објави 33.295 страници документи, меѓу кои записи за летови, снимки од надзорни камери и е-пошта.
Во т.н. „роденденска книга“ беше пронајден и цртеж на женско тело за кој се тврди дека го носи потписот на американскиот претседател. Трамп остро демантираше било каква поврзаност со цртежот, нарекувајќи го „лажна работа“, додека неговите адвокати тврдеа дека „не постои автентично писмо или цртеж“. Во меѓувреме, демократите во Конгресот објавија и дополнителни досиеја во кои се појавуваат повеќе познати имиња, меѓу кои и Илон Маск, кој подоцна објасни зошто неговото име се нашло во документите.
Свет
Украина може да го порази Путин со беспилотни подводни дронови, тврди пензиониран американски генерал

Русија може да биде протерана од Украина доколку се употребат експлозивни подводни дронови, тврди еден од водечките пензионирани американски генерали, објави британски „Мирор“. По серија провокации кои, според извештаите, ја направиле војната „неизбежна“ со западна Европа, освен ако не се преземат мерки за одвраќање на Владимир Путин, пензионираниот генерал Дејвид Петреус, кој ги предводеше војните во Ирак и Авганистан, верува дека знае како диктаторот може да биде запрен.
Украина располага со ракети кои можат да нанесат сериозна штета, а тврди дека нејзиниот морски дрон TLK-1000 има способност да уништува цели на оддалеченост од 1.900 километри. Генералот Петреус вели дека постои план со три точки кој би можел да го порази Путин, но Киев сè уште има потреба од поддршка од Западот за да го претвори тоа во реалност.
„Ова е моментот кога Украина може да ги запре Русите на бојното поле, доколку успее да произведе уште повеќе беспилотни системи,“ изјави тој за „Телеграф“ во Њујорк.
„Пред неколку дена управував со беспилотен морски систем на тајна локација во Украина и достигна брзина од 100 км/час, неверојатно е. Покрај воздушните дронови, Украина сега располага и со Фламинго, крстосувачка ракета со домет од 3.000 километри“.
Тој додаде: „Ако тие три акции се спроведат истовремено, мислам дека конечно би можеле да дојдеме до ситуација во која Русија би била принудена да го запре војувањето или би можело да се постигне договор за прекин на огнот ако тоа е возможно.“
Во меѓувреме, се тврди дека Русија не е заинтересирана за завршување на војната во Украина и се подготвува за судир со НАТО. Експертите стравуваат дека Путин гради стратешка резерва од нови воени регрути, подготвувајќи се за „директен конфликт“ со воената алијанса.
Според Институтот за проучување на војната, бројот на нови регрути сега расте со просек од речиси 8.000 неделно.