Свет
Почнаа нови масовни протести во Израел: „Да го запреме уништувањето на демократијата“

Денеска, почнаа национални протести во Израел против планираните владини реформи во правосудството. Демонстрантите рано утрото привремено блокираа неколку патишта во земјата, јавуваат медиумите. Тие вееја израелски знамиња и протестни знаци извикувајќи: „Мораме да го запреме уништувањето на демократијата!“
Според организаторите, во текот на денот се планирани дополнителни собири. Во попладневните часови се очекува илјадници Израелци да се соберат на меѓународниот аеродром „Бен Гурион“ во близина на Тел Авив.
Во текот на ноќта израелскиот парламент во прво читање го одобри предлог-законот за контроверзната судска реформа. Новиот закон ќе го оневозможи Врховниот суд да ја оцени владината одлука како неразумна.
Критичарите стравуваат дека тоа би можело да поттикне корупција и произволни назначувања на високи позиции. Потребни се уште две читања пред да стапи во сила амандманот.
Неколку компании од технолошкиот сектор, кој се смета за движечка сила на израелската економија, најавија дека ќе ги ослободат своите вработени за протестите.
Повеќе од половина година планираните судски реформи на владата поделија големи делови од израелското општество. Илјадници Израелци повеќепати излегоа на улиците за да протестираат против реформите.
Владата ги обвинува судиите за прекумерно мешање во политичките одлуки. Критичарите гледаат фундаментална закана за поделбата на власта и предупредуваат дека Израел може да се претвори во диктатура.
Протестното движење е едно од најголемите во историјата на Израел, земја со околу 9,4 милиони жители и опфаќа широки делови од општеството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Затворската казна за Саркози ја подели земјата околу тоа како судиите се справуваат со случаите на политички криминал

Затворската казна изречена на поранешниот француски претседател Никола Саркози ја подели земјата околу тоа како судиите се справуваат со случаите на политички криминал, додека лидерката на крајната десница Марин Ле Пен се подготвува да се обиде да ја поништи пресудата за проневера и да се кандидира за претседател во 2027 година, објави Ројтерс.
Парискиот суд ја шокираше политичката сцена во четвртокот кога на Саркози му изрече казна затвор од пет години затвор за криминален заговор во врска со обидот за собирање средства за кампања во Либија, објави агенцијата.
Саркози ќе биде и првиот претседател на Франција по Втората светска војна, кој ќе биде затворен.
Свет
Зеленски ќе возврати ако Москва предизвика прекин на електричната енергија во Украина

Претставници на украинската Влада ќе ги посетат Соединетите Американски Држави кон крајот на септември или октомври за разговори за прашања, како што се економијата и оружјето, изјави денеска украинскиот претседател Володимир Зеленски.
Украинскиот претседател беше во САД оваа недела, каде учествуваше на Генералното собрание на Обединетите нации и се сретна со американскиот претседател Доналд Трамп.
Тој рече дека споделил со Трамп „одредена визија за тоа што може да се направи“ како одговор на руските дејствија. Зеленски вети дека ќе возврати доколку Москва предизвика прекин на електричната енергија во Украина.
Свет
Најголемата воена база во Данска ја надлетуваат неидентификувани беспилотни летала

Неидентификувани беспилотни летала синоќа се регистрирани над најголемата воена база во Данска, соопшти данската полиција.
– Можам да потврдам дека во петокот околу 20 часот и 15 минути имавме мал инцидент што траеше неколку часа. Еден или два дрона се забележани пред и над воздухопловната база во Каруп. Не ги соборивме, изјави претставник на данската полиција.
Изминатите денови дронови надлетуваа над цивилни и воени објекти, поради што привремено беше затворен воздушниот простор на Данска.
Премиерката на Данска, Мете Фредериксен претходните инциденти со нарушувањето на воздушниот простор ги поврза со наводни руски активности со дронови низ Европа, но не понуди докази. Москва ги негираше обвинувањата.