Свет
Првата дама на Украина ги повикува светските лидери: Помогнете ни да си ги вратиме нашите деца

Првата дама на Украина ги повика светските лидери да помогнат да се вратат украинските деца што биле насилно однесени во Русија наведувајќи дека таму биле индоктринирани и лишени од нивниот национален идентитет, пренесува „Франс прес“.
Зборувајќи на маргините на Генералното собрание на Обединетите нации, Олена Зеленска рече дека повеќе од 19.000 украински деца биле насилно префрлени или депортирани во Русија или на окупираните територии и дека досега се вратени само 386 од нив.
Зеленска рече дека на тие деца во Русија им било кажано „дека не им се потребни на нивните родители, дека не ѝ се потребни на нивната земја, дека никој не ги чека“.
„На киднапираните деца им беше кажано дека тие повеќе не се украински, туку руски деца“, тврди таа.
„Апелирам до генералниот секретар на ОН и до целата организација да ни помогнат да ги спасиме украинските деца. Помогнете ни да добиеме информации за децата однесени во Русија. Помогнете ни да ги извлечеме децата од окупираните територии преку специјални безбедни коридори. На нашите деца им треба правда“, рече таа.
Според АФП, Зеленска зборувала и за случаи на сексуално насилство од страна на руски војници врз цивили наведувајќи дека властите истражуваат над 230 такви случаи, а жртвите во 13 случаи се деца. Таа рече дека меѓу жртвите имало 12 девојчиња и едно момче, а најмладата жртва во моментот на злосторството имала само четири години.
Во своето обраќање на Генералното собрание претходно истиот ден, претседателот Володимир Зеленски ги нарече дејствата на Русија геноцидни.
„Се обидуваме да ги донесеме децата дома, но времето истекува. Што ќе се случи со нив? Тие деца во Русија беа научени да ја мразат Украина и сите врски со нивните семејства беа прекинати“, рече Зеленски додавајќи дека тоа е „очигледно геноцид“.
Русија ги негира обвинувањата велејќи дека ги спасила украинските деца од ужасите на војната.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Катар го прифати извинувањето на Нетанјаху

Катар го поздрави извинувањето и ветувањето на израелскиот премиер Бенјамин Нетанјаху дека Израел нема повторно да изврши напад врз Доха, соопшти Белата куќа.
Нетанјаху претходно денеска од Белата куќа телефонски разговарал со катарскиот премиер Мохамед бин Абдурахман Ал Тани, извинувајќи се за нападот насочен кон раководството на Хамас, со кој била нарушена катарската сувереност.
Во заедничкото соопштение беше потврдено дека е воспоставен „трилатерален механизам“ за подобрување на односите. Катарскиот премиер ги поздравил гаранциите од Израел, нагласувајќи ја подготвеноста на Доха за понатамошна соработка во интерес на регионалната безбедност и стабилност.
Свет
„Ројтерс“: Нетанјаху му се извинил на Катар за нападот врз Доха

Израелскиот премиер, Бенјамин Нетанјаху, се извинил на Катар поради израелскиот воздушен напад врз Доха од почетокот на месецов, во кој цел биле функционери на Хамас, јави „Ројтерс“.
Според извор близок до израелскиот премиер, тој телефонирал со катарскиот премиер Мохамед бин Абдурахман Ал Тани од Белата куќа, каде што во исто време американскиот претседател Доналд Трамп остварил контакт со Катар.
Извинувањето доаѓа во момент кога Нетанјаху престојува во Вашингтон на средба со Трамп. Главна тема е новиот мировен план од 21 точка, со кој се предвидува прекин на огнот, ослободување на израелските заложници и воспоставување ново управување со Газа без учество на Хамас.
Катар претходно го осуди израелскиот напад како „подмолен“ и „груб прекршок на меѓународното право“. Во исто време, Нетанјаху е под силен притисок да го прифати американскиот план кој ја исклучува анексијата на Западниот Брег и бара формирање нова палестинска влада.
Свет
Осомничениот во случајот со Медлин Мек Кен: „Вратете ми го животот!“

Кристијан Брукнер, осомничен во истрагата за исчезнувањето на Медлин Мек Кен, за првпат јавно проговори по излегувањето од затвор. Во интервју за „Скај њуз“ рече дека е жртва на „лов на вештерки“ и побара да му се врати нормалниот живот.
„Не се чувствувам слободен. Носам нараквица и под 24-часовен надзор сум. Сакам ова да престане и некој да преземе одговорност,“ изјави Брукнер.
Тој се обиде да влезе во канцеларијата на германскиот обвинител Ханс Кристијан Волтерс, кој претходно јавно тврдеше дека има докази дека Брукнер ја киднапирал и убил Медлин, иако призна дека тие не се доволни за подигнување обвинение.
Брукнер (49) неодамна беше ослободен по издржана казна за друго кривично дело. Германските медиуми јавуваат дека по неговото ослободување бил сместен во привремено живеалиште, но по јавниот притисок и протестите на граѓаните, бил преместен од градот Нојминстер.
На директно прашање дали има врска со исчезнувањето на британското девојче, Брукнер одговори дека по совет на адвокатите нема да зборува на таа тема.
Тригодишното девојче исчезна од апартмански комплекс во Праја да Луз во Португалија на 3 мај 2007 година, што предизвика истрага низ цела Европа и стана еден од најпознатите случаи на исчезнати лица. Нејзините родители вечерале со пријателите во блискиот ресторан додека таа и нејзините помали браќа и сестри близнаци спиеле во станот. Нејзината мајка Кејт открила дека Медлин ја нема околу 22 часот по локално време.
Случајот останува нерешен, но германските обвинители велат дека имаат докази кои сугерираат дека Брикнер можеби бил во областа кога исчезнала Медлин. Волтерс рече дека иако тој и другите обвинители не веруваат дека имаат доволно докази за формално да го обвинат Брикнер во случајот Меккен, нивните напори ќе продолжат.