Свет
Претставник на Хамас: Не знаеме колку заложници се живи, ниту каде се

Функционерот на политичкото крило на Хамас, Басим Наим, изјави дека палестинската исламистичка организација не може да му даде на Израел список на заложници кои се уште се живи, бидејќи таа самата не го знае тоа, ниту пак каде се заложниците.
„Досега немаме предадено никаков список. Но, пред сè, технички и практично, сега е невозможно точно да се знае кој е сè уште жив, а кој е убиен, поради израелското бомбардирање и гладувањето поради израелската блокада“, рече Наим во Истанбул во интервјуто објавено денеска за Би-Би-Си.
Тој додаде дека заложниците се во различни области со различни групи и затоа има повик за прекин на огнот за собирање информации.
Во нападите на палестинските екстремисти на југот на Израел на 7 октомври минатата година, беа убиени околу 1.200 луѓе, а 250 заложници беа киднапирани и однесени во Појасот Газа.
После тоа започна војната која трае веќе 150 дена и во која во израелската офанзива загинаа повеќе од 30.000 Палестинци, пренесуваат медиумите во светот.
Околу 100 заложници беа ослободени за време на седумдневниот прекин на огнот на крајот на ноември. Според израелските податоци, во Газа се уште се држат околу 130 заложници, но се знае дека не се сите живи, пренесува Бета.
Како еден од условите за учество во преговорите за ново примирје, Израел бара Хамас да ја предаде листата на живи заложници.
Наим, официјален претставник на политичкото биро на екстремистичката организација, повтори за Би-Би-Си дека Хамас нема да се согласи на договор за прекин на огнот доколку војната не заврши и израелската армија целосно не се повлече од Газа, објавија израелските медиуми.
Друг висок функционер на Хамас изјави за „ Arab World Press“ дека топката сега е на „израелскиот терен“.
Тој рече дека Хамас не ги именуваше затворениците чие ослободување го бара, но додаде дека на списокот ќе има најмалку 20 Палестинци кои отслужуваат доживотна казна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелски војници забележани во градот Газа

Палестински очевидци тврдат дека во градот Газа забележани се израелски војници.
Според нив израелските војници биле забележани во населбата Сабра, во близина на зграда во која порано се наоѓало училиште.
Израелските војници наводно се заблежани во градот Газа откако израелскиот премиер Бенјамин Нетанјаху одобри план за преземање на градот, во кој живеат околу еден милион луѓе.
Израелската армија не ги коментираше палестинските наводи, истакнувајќи оти не ги открива позициите на своите војници.
Претходно Израел соопшти дека планира да евакуира околу еден милион жители од градот пред офанзивата, која се очекува да почне најрано во септември.
Свет
Зеленски вели дека постои вистинска можност да заврши војната во Украина

Претседателот на Украина, Володимир Зеленски синоќа најави дека следните денови ќе бидат готови безбедносните гаранции за неговата земја.
Тој, по телефонскиот разговор со премиерот на Холандија, Дик Шуф, на платформата Икс објави дека „во моментот тимови на Украина, САД и европските партнери работат на решение“.
Според Зеленски постои „вистинска можност да се заврши оваа војна“, додавајќи дека Украина е „подготвена за конструктивни чекори што можат да доведат до вистинскиот мир“.
– Русија од своја страна не покажува намера за мир и продолжува да ги гранатира нашите градови. Сите сигнали што доаѓаат од Москва овие денови ги толкуваме на ист начин. Ни треба притисок за промена на нивниот став, како и состанок на највисоко ниво за да се разговара за сите прашања, посочи Зеленски.
Свет
Северна Кореја тестираше нови ракети

Северна Кореја вчера истрела два нови противвоздушни проектили за уништување на различни воздушни цели, меѓу кои дронови и крстосувачки ракети. Тестирањето на новото оружје го надгледуваше севернокорејскиот лидер Ким Џонг-ун.
Како што јави Корејската централна новинска агенција (КЦНА) новото оружје има „супериорна борбена способност“ и користи „единствена технологија“.
Тестирањето на ново оружје се одвива во време на зголемени тензии со Јужна Кореја. Официјален Сеул вчера соопшти дека на 19 август јужнокорејски војници отвориле предупредувачки оган кон припадници на севернокорејската армија, кои накратко навлегле во Демилитаризираната зона.
Исто така во регионот се одржува заедничка воена вежба помеѓу Јужна Кореја и САД, а за утре е предвидена средба на американскиот претседател Доналд Трамп со новоизбраниот јужнокорејски претседател Ли Џае-мунг.