Речиси сите патници и членови на екипажот на авионот на Ер Индија што се урна кратко по полетувањето од западна Индија починаа, потврди авиокомпанијата.

На летот до лондонскиот аеродром Гетвик имало вкупно 242 лица, вклучувајќи 169 индиски државјани, 53 Британци, седум Португалци и еден Канаѓанец.

Локалните власти претходно предупредија дека меѓу загинатите веројатно има повеќе жители на градот Ахмедабад, каде што се урна авионот, со оглед на густо населената област.

Еден преживеан, британскиот државјанин Вишвашкумар Рамеш, претрпел повреди и е на лекување во болница.

Сè уште се собираат детали, но Би-Би-Си досега ги потврди идентитетите на неколку лица кои загинаа во несреќата.

Меѓу загинатите британски државјани беше и семејство од три члена од Глостер.

Акил Нанабава, неговата сопруга Хана Вораџи и нивната ќерка Сара Нанабава беа на летот.

Во соопштението од Муслиманската заедница во Глостер се вели: „Изразуваме најдлабоко и најискрено сочувство. Нема зборови што можат да ја ублажат болката од таквата загуба, но се молиме семејството да најде утеха во огромната солидарност и сочувство што се излева од целиот свет.“

Адам Таџу, 72, и неговата сопруга Хасина, 70, се враќале од Ахмедабад со нивниот 51-годишен зет Алтафхусен Пател. Сите живееле во Лондон.

Внуката на двојката, Амара Таџу, изјави дека нејзиниот татко Алтаф Таџу веднаш отпатувал во Лондон за да биде со својата сестра додека чекаат дополнителни информации од Ер Индија и владини претставници.

Брачен пар од Лондон, Фионгал и Џејми Гринло-Мик, кои воделе центар за духовно здравје, исто така биле на летот.

Непосредно пред да се качат, тие објавија видео на Инстаграм од аеродромот во Ахмедабад во кое се смееја и се шегуваа за нивното патување во Индија.

Аџај Кумар Рамеш седеше во авионот до својот брат, британскиот државјанин Вишвашкумар Рамеш – единствениот познат преживеан.

Нивниот братучед Аџај Валги изјави за Би-Би-Си дека Вишвашкумар успеал да се јави на своето семејство и да каже дека е „добро“, но не знаел што се случило со неговиот брат.

Поранешниот главен министер на индиската држава Гуџарат, Виџај Рупани, исто така загина во несреќата, потврди министерот за цивилно воздухопловство.

Рупани беше член на владејачката партија БЏП и беше главен министер од 2016 до 2021 година.

Додека официјалната истрага е во тек, сè уште не е познато што точно го предизвикало падот на летот AI171 на Ер Индија помеѓу Ахмедабад и Лондон, кој се урна само 1,5 километри од пистата во четвртокот, 30 секунди по полетувањето.

Во несреќата загинаа 241 патник и членови на екипажот, што ја прави првата фатална несреќа за Боингот 787-8 Дримлајнер откако започна со комерцијални летови во 2011 година.

Индиската истрага штотуку започнува, а експерти од САД и Велика Британија ќе ѝ се приклучат. Би-Би-Си ја анализираше несреќата со експерти и понуди четири можни причини.

Авионот го пилотираа искусни пилоти – капетанот Сумит Сабхарвал и копилотот Клајв Кундар – кои заедно имаа над 9.000 часа време на летање. Капетанот Сабхарвал летал повеќе од 22 години.

Според официјалните податоци на Ер Индија, полетал од Ахмедабад во 13:39 часот по локално време. Речиси веднаш по полетувањето, екипажот испратил повик за помош , но потоа авионот повеќе не одговорил. Единствениот преживеан патник им кажал на индиските медиуми дека слушнал силен тресок додека авионот се борел да добие висина.

BBC Verify анализираше снимки на кои се гледа како авионот лета ниско над станбена област. Најновите податоци од летот покажуваат дека достигнал висина од 190 метри, потоа почнал да паѓа и исчезнал зад дрвјата. Потоа се гледа експлозија на хоризонтот.

Засега не е можно со сигурност да се каже што го предизвикало падот. Но, видеата сугерираат дека авионот не можел да добие доволна висина, како да му недостасувала моќност.

Некои експерти ја покренаа можноста двата мотори да откажале истовремено, исклучително ретко сценарио, но не и невозможно. Во тој случај, се активира таканаречената RAT – помошна турбина што се активира кога главните мотори не обезбедуваат енергија, но не е јасно дали тоа било случај овде.

Познат пример за слична ситуација беше „Чудото на реката Хадсон“ во 2009 година, кога Ербас А320 ги загуби двата мотора поради јато птици. Но, тогаш пилотот имал повеќе време и надморска височина за маневрирање, што не било случај овде.

Поранешен пилот изјави за Би-Би-Си дека дефектот на двата мотора можел да биде предизвикан и од контаминирано гориво. Системот за мерење на горивото кај млазните мотори мора прецизно да се подеси, ако се затне, моторите може да останат без гориво.

И покрај шпекулациите, некои експерти велат дека во моментов нема цврсти докази дека двата мотори откажале. Експертот за авијација Мохан Ранганатан рече дека ова би бил „исклучително редок настан“.

Друга можност што ја споменуваат индиските пилоти се судирите со птици, кои можат сериозно да ги оштетат моторите ако птиците се вовлечат во нив.

Ахмедабад е познат по својата голема популација на птици во близина на аеродромите. Според индиското министерство за цивилно воздухопловство, аеродромот во Ахмедабад регистрирал 462 судири со птици во последните пет години, вклучувајќи 38 во 2022-23 година, што е зголемување од 35% во однос на претходната година.

Сепак, експертите нагласуваат дека судирите со птици ретко доведуваат до катастрофа освен ако не се погодени двата мотора.

Неколку експерти контактирани од BBC Verify сугерираа дека е можно закрилките да не биле правилно поставени пред полетувањето. Овие закрилки се неопходни за генерирање на подигнување при мали брзини – особено кога авионот е целосно натоварен, со гориво за долг лет и во тешки временски услови.

Во Ахмедабад тој ден, температурата била речиси 40 °C, што значи дека воздухот бил разреден и дека на авионот му требало повеќе подигнување и моќност на моторот. Дури и најмалата грешка во конфигурацијата можела да биде фатална.

Сепак, системите за летање на Dreamliner го предупредуваат екипажот ако закрилките не се правилно поставени за полетување. Исто така, постојат детални процедури и контролни листи што пилотите мора да ги поминат пред секое полетување. Ова значи дека секоја грешка би била човечка, но и многу ретка.
Истрагата ќе ја водат индиските власти со помош на американски и британски експерти, а таканаречената црна кутија и анализата на остатоците од авионот ќе играат клучна улога во неа. Производителот на мотори GE Aerospace го испраќа својот тим во Индија, додека Boeing најави целосна соработка. Засега, остануваат многу прашања, а одговорите ќе дојдат дури откако ќе заврши темелната и меѓународна истрага што веќе е започната.

Иранските државни медиуми објавија дека шест нуклеарни научници се убиени во израелските напади.

Меѓу нив се Ферејдун Абаси, нуклеарен научник и поранешен раководител на Организацијата за атомска енергија на Иран, и д-р Мохамед Мехди Техранчи, теоретски физичар поврзан со нуклеарната програма на Иран, потврди новинската агенција Мехр.

Во нападите загинаа и Хусеин Салами, командант на Иранската револуционерна гарда (ИРГЦ), и генерал Голам Али Рашид, командант на Генералштабот на Хатам-ал Анбија.