Свет
Путин: Западниот модел на глобализација е застарен и поминува низ криза

Рускиот претседател Владимир Путин денеска изјави дека моделот на глобализација, кој главно го создадоа западните земји за остварување на сопствените интереси, е застарен и сега минува низ длабока криза.
Путин на меѓународниот форум посветен на споменот на Евгениј Примаков рече дека темата на годинешниот форум е многу актуелна – „Хоризонти на постглобализацијата“, пренесе „Тасс“.
„Се појавува нов, поправеден и подемократски систем на меѓународни односи, кој подобро ќе ги задоволи потребите на глобалното мнозинство“, рече Путин.
Путин, сепак, рече дека групата земји, која е навикната да доминира на светската сцена, како што наведе, нема да запре на ништо за да го зачува своето опаѓачко влијание користејќи директна уцена и тактики на силен притисок, а меѓународното право ќе биде заменето по некој вид поредок заснован на правила.
„Таквата дестабилизирачка политичка линија ги поттикна кризата поврзана со Украина и трагичната ескалација на израелско-палестинскиот конфликт“, нагласи рускиот претседател.
Путин истакна дека на форумот, кој го носи името на истакнатиот државник, дипломат и академик Евгениј Примаков, учесниците во значајна и слободна дебата темелно ги анализираат клучните меѓународни прашања на денешницата и ги оценуваат долгорочните трендови на регионално и глобално ниво водени од, како што наведе, научен пристап и објективни факти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Американскиот сенатор Греам: Го молам Ватикан да размисли Трамп да биде папа

Американскиот сенатор Линдзи Греам, републиканец од Јужна Каролина, во објава на „Икс“ напиша дека Трамп треба да биде новиот папа.
„Бев возбуден кога слушнав дека претседателот Трамп е отворен за идејата да стане следниот папа. Навистина би бил кандидат во сенка, но би ги замолил конклавата и католичките верници да бидат со отворен ум за оваа можност! Првата комбинација папа – претседател на САД има многу предности. Ние го следиме белиот чад… Трамп MMXXVIII!“, напиша тој на „Икс“.
Доналд Трамп вчера изјави дека би сакал да биде папа. „Би сакал да бидам папа. Тоа би бил мојот прв избор“, му рече американскиот претседател на новинар, кој го праша за конклавата.
Тој продолжи нагласувајќи дека нема фаворит, но посочи дека Тимоти Долан, надбискупот на Њујорк, би можел да биде добар избор. „Не знам. Немам фаворит. Но, морам да кажам дека имаме кардинал од место наречено Њујорк, кој е многу добар, па ќе видиме што ќе се случи“, рече Трамп.
Греам е познат по значајните промени во политичките ставови, особено во врска со Доналд Трамп и надворешната политика.
Европа
Осумнаесет општински службеници во Истанбул завршија во затвор

Турски суд затвори 18 службеници на градската власт во Истанбул поради обвиненија за корупција продолжувајќи ја репресијата против опозицијата поради која беше затворен и градоначалникот Екрем Имамоглу.
Имамоглу, главен политички ривал на претседателот Ердоган и водечки на анкетите, беше затворен во март во очекување судење по обвиненијата за корупција. Тој се соочува и со обвиненија за помагање терористичка група.
Градоначалникот ги негира сите обвиненија, а неговото апсење ги предизвика најголемите протести во Турција во последната деценија, економски превирања и обвинувања за политизирано судство. Владата ги отфрла овие тврдења и вели дека судството е независно.
НТВ објави дека 34 од 52 лица приведени за време на викендот биле ослободени со кауција. Турските медиуми пред четири дена објавија дека властите привеле десетици вработени во општина Истанбул како дел од правните истраги насочени кон Имамоглу проширувајќи ја репресијата против опозицијата, која почна кон крајот на минатата година.
Меѓу приведените се генералниот секретар, началникот на кабинетот на Имамоглу и претседателот и заменик-претседателот на Управата за водоснабдување и канализација.
Европа
Шведската полиција уапси осомничен за пукањето во кое загинаа три лица

Шведската полиција објави дека привела осомничено лице по пукањето во кое загинаа три лица во градот Упсала во вторникот.
Лицето е осомничено за убиство и е едно од неколкуте лица што се испрашуваат како дел од истрагата, изјавија полицајци за новинарите.
Пукањето се случило во фризерски салон во Упсала, додадоа тие.
Полицијата соопшти дека инцидентот се смета за изолиран и не е поврзан со големите прослави на Валпургиската ноќ, што се очекуваат во Упсала в среда.