Свет
Путин: Првиот сериски ракетен систем „Орешник“ е во рацете на армијата
Рускиот претседател Владимир Путин објави дека првиот сериски произведен ракетен систем со среден дострел, „Орешник“, заедно со првата ракета од оваа серија, официјално е доставен до руските вооружени сили. Станува збор за нов стратешки систем што Москва го претставува како одговор на сè поизразените закани од Западот.
„Го произведовме првиот сериски комплекс ‘Орешник’, првата сериска ракета, и таа веќе е во рацете на армијата“, рече Путин за време на состанокот со белорускиот претседател Александар Лукашенко додавајќи дека се очекува постепено проширување на овој систем, вклучително и распоредување во Белорусија во текот на 2025 година.
Употребата на „Орешник“ првпат беше откриена на 21 ноември 2024 година кога Русија изврши напад врз воениот објект Јужмаш во Днепар (поранешен Днепропетровск) како одговор на нападите на украинските сили со американски ракети ATACMS и британски ракети Storm Shadow. Путин потоа истакна дека ниеден современ противвоздушен систем не може да пресретне ваков тип ракета и најави дека во иднина населението ќе биде однапред информирано за евакуација.
Според достапните информации, „Орешник“ е хиперсоничен ракетен систем со можност за носење повеќе независно водени бојни глави (MIRV), базиран на технологиите на претходниот систем RS-26 „Рубеж“. Ракетата достигнува брзина над 10 маха, што ја прави речиси невидлива од повеќето постојни системи за воздушна одбрана.
Додека официјална Москва истакнува дека станува збор за оружје што ги гарантира безбедноста и територијалниот интегритет на Русија, воените аналитичари истакнуваат дека системот не е наменет за прецизни удари врз тактички цели, туку првенствено има улога на стратешко одвраќање и демонстрација на сила. Сепак, симболичната и психолошката вредност на системот, особено во контекст на сегашните геополитички тензии, останува значајна.
Масовното производство на комплексот „Орешник“ треба да се забрза во текот на 2025 и 2026 година, а најавено е дека значителен број единици ќе бидат оперативно распоредени и во Русија и на територијата на сојузничката Белорусија, според написите во медиумите.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп му постави услов на Путин: „Нема да губам време“
Американскиот претседател Доналд Трамп изјави дека нема да се сретне со рускиот претседател Владимир Путин сè додека не се постигне конкретен договор за мир меѓу Русија и Украина.
Иако претходно се очекуваше двајцата ќе се сретнат во Будимпешта, до средбата не дојде и истата е одложена.
„Морам да знам дека ќе постигнеме договор. Нема да губам време“, изјави Трамп во авионот „Ер форс“.
Тој додаде дека секогаш имал одличен однос со Путин, но дека ситуацијата е разочарувачка. Последната средба на 15 август на Алјаска беше оценета како продуктивна.
Во меѓувреме, нападите врз Украина продолжуваат — во најновите руски ракетни и дрон-напади загинале најмалку четири лица, а 20 се повредени. Украинскиот претседател Володимир Зеленски побара од САД нови санкции против целиот руски нафтен сектор и ракети со долг дострел.
„Ројтерс“ вчера објави дека американската администрација подготвила дополнителен пакет санкции против руската економија, вклучувајќи банки и нафтна инфраструктура, што ќе се активира доколку Москва продолжи да го одолговлекува мировниот процес.
Извори за Ројтерс наведуваат дека Вашингтон разговара со европските сојузници и за користење на замрзнатиот руски имот за набавка на американско оружје за Киев.
Рускиот пратеник Кирил Дмитриев кој се наоѓа во Вашингтон вчера изјави дека Москва, САД и Украина се блиску до дипломатско решение, додека украинската страна ги поздрави новите санкции.
Свет
Рубио: Подготвуваме план за испраќање меѓународни сили во Газа
Државниот секретар на САД, Марко Рубио, изјави дека американските претставници спроведуваат консултации за можна резолуција на ОН или меѓународен договор со кој се овластува распоредување на меѓународни сили во Појасот Газа и дека ќе разговараат за ова прашање утре во Катар.
„Многу земји изразија интерес за учество на некое ниво – или монетарно или човечка сила или и двете – и ќе им треба тоа (резолуција на ОН или меѓународен договор) бидејќи нивните национални закони го бараат тоа“, им рече Рубио на новинарите во авион на пат помеѓу Израел и Катар.
„Имаме цел тим што работи на план за тоа.“
Администрацијата на претседателот Доналд Трамп сака арапските држави да придонесат со средства и човечка сила во мултинационална сила што ќе го одржува мирот во Појасот Газа. Израел се спротивставува на учеството на турските сили.
Свет
Трговските преговори меѓу САД и Кина се во тек
Главниот кинески трговски преговарач Ли Ченгганг и кинескиот вицепремиер Хе Лифенг пристигнаа во Куала Лумпур за вториот ден од трговските разговори меѓу САД и Кина.
Кинеските економски претставници се состануваат со американскиот секретар за финансии Скот Бесант и американскиот трговски претставник Џејмисон Грир на маргините од самитот на Здружението на земјите од Југоисточна Азија за деескалација на трговската војна.
Двете најголеми економии во светот се обидуваат да избегнат ескалација на трговската војна откако американскиот претседател Доналд Трамп се закани со нови 100 проценти царини за кинески стоки и други трговски ограничувања почнувајќи од 1 ноември како одмазда за значително проширените контроли на извозот на минерали од страна на Кина.
Портпаролот на Министерството за финансии на САД им рече на новинарите во саботата дека првиот ден од разговорите бил „многу конструктивен“. Позитивен исход од разговорите би ги отстранил пречките за средба меѓу Трамп и кинескиот претседател Шји Џинпинг.

