Свет
Путин реши да не протерува никого, на Обама му посака успех

Рускиот претседател Владимир Путин, и покрај препораките на шефот на дипломатијата Сергеј Лавров реципрочно да одговори на одлуката на американскиот претседател Барак Обама кој протера од САД 35 руски дипломати, објави во петокот дека донел одлука да не се протеруваат американските дипломати од Русија, како одговор на новите санкции на Вашингтон против Москва.
Претходно во петокот рускиот министер за надворешни работи Сергеј Лавров во интервју за руската државна телевизија изјави дека на претседателот Владимир Путин ќе му предложи протерување и прогласување за непожелни личности на 31 дипломат од американската амбасада во Москва и четворица од американскиот конзулат во Санкт Петербург.
„Руските дипломати кои се враќаат во татковината ќе ги минат новогодишните празници во кругот на семејствата и пријателите – дома. Ние нема да им правиме проблеми на американските дипломати. Никого нема да протераме“, се наведува во писмената изјава на Путин која ја објави Кремљ.
Путин додава дека Русија нема „да им забрани на семејствата и на децата на дипломатите да ги користат вообичаените места за нивен одмор и празнување на новогодишните празници. Напротив, сите деца на американските дипломати акредитирани во Русија се поканети на Нова година и на Божик во Кремљ“, додава рускиот челник.
„Го задржуваме правото да одговориме со соодветни мерки но нема да се спуштаме на ниво на ‘кујнска’ неодговорна дипломатија и натамошните чекори за обновување на руско-американските односи ќе се градат на основа на политиката што ќе ја спроведува администрацијата на претседателот Доналд Трамп“, истакнува Путин.
Вели натаму дека како провокација ги гледа новите „непријателски чекори од досегашната администрација“ на САД „со цел за натамошно поткопување на американско-руските односи“.
„Тоа јасно им противречи на основните интереси, како на рускиот, така и на американскиот народ, имајќи ги предвид одговорностите на Русија и САД за зачувување на глобалната безбедност, и нанесува штета на целиот спектар меѓународни односи“, предупредува Путин.
„Тажно е што администрацијата на претседателот Обама ја завршува својата работа на овој начин, но, сепак, јас нему и на неговото семејство им посакувам среќна Нова година“, наведува Трамп и додава дека „му честитам и на новоизбраниот претседател Трамп и на целиот американски народ! Ви посакувам на сите благосостојба и просперитет“, им порачува Путин на Американците.
Американскиот претседател Барак Обама нареди во четвртокот протерување на 35 руски дипломати осомничени за наводни шпионирања и хакирања на серверите на неговата Де Демократска партија, што наводно помогнало нивната претседателска кандидатка да ги загуби претседателските избори на 8-ми ноември за сметка на републиканскиот кандидат Доналд Трамп, како и во полза на некои други републикански кандидати. Исто така, наметна санкции за двете руски разузнавачки агенции, особено за нивното работење на билатерална основа во САД.
Демократите на Обама го обвинуваат Кремљ дека преку руски хакери предизвикал истекување на десетици доверливи електронски преписки. Лавров одговори дека тие американски обвинувања се без основа и докази, и порача дека санкциите нема да минат без одговор. Рускиот премиер Дмитриј Медведев, пак, изрази жалење за тоа што администрацијата на Обама го завршува својот мандат во „антируска агонија“.
Трамп најави дека следната седмица ќе се сретне со челниците на американските тајни служби, по одликата на Обама да воведе нови санкции против Русија. Во писмената изјава Трамп вели дека очекува водечките луѓе на разузнавачката заедница да го известат за сите факти, иако претходно месецов рече дека тие се истите луѓе кои објавуваа дека Садам Хусеин поседува оружје за масовно уништување, што подоцна се покажа неточно.
Меѓутоа, Трамп додаде дека „време е нашата земја да започне да се занимава со поважни и подобри работи“. Претходно во четвртокот рече дека не верува во овие обвинувања, а американската јавност го поставува прашањето дали ќе ги укине најновите мерки откако на 20-ти јануари ќе ја преземе должноста.
Мерките кои Обама ги воведува последните денови од својот мандат, вклучително и тензиите кои ги предизвика неговата администрација со традиционалниот сојузни Израел, се нов удар врз американско-руските односи кои се силно затегнати поради несогласувањата околу кризите во Украина и Сирија.
Обама изјави дека тоа „не се сите санкции“ и предупреди дека САД „ќе преземат и други мерки кога за нив ќе дојде времето, вклучително и оние коишто нема да бидат објавени јавно“, алудирајќи најверојатно на кибернетички напади или други субверзивни активности, проценуваат медиумите.
Во соопштението кое ги издаден од Хаваи, каде се наоѓа на одмор, Обама ги повикува „пријателските и земјите сојузнички“ на САД „заедно да работат на спротиствување на руското поткопување на добрите меѓународни обичаи и вмешувања во демократските процеси“./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Стармер: Путин го саботира мирот, зградата на Британскиот совет во Киев беше бомбардирана

Британскиот премиер Кир Стармер го обвини рускиот претседател Владимир Путин дека „го саботира мирот“ откако руските сили испукаа две ракети кон зградата на Британскиот совет во Киев утрово.
Премиерот потврди дека канцелариите на Британскиот совет биле погодени и додаде дека сочувствува со „сите погодени од бесмислените руски напади врз Киев“.
„Путин убива деца и цивили и ги саботира надежите за мир. Ова крвопролевање мора да заврши“, напиша Стармер на платформата X.
Британскиот совет, кој нуди програми на англиски јазик за Украинците во главниот град, соопшти дека неговите канцеларии се „сериозно оштетени“ и дека еден ноќен чувар е повреден. Во јуни, Москва им забрани на граѓаните да работат со институцијата, тврдејќи дека тоа е параван за британски шпиони.
Зградата во која се наоѓа делегацијата на Европската Унија во Киев, исто така, беше тешко оштетена во нападите, според официјални лица на ЕУ, кои го нарекоа нападот „намерен“.
Русија испали вкупно 629 дронови и 31 ракета, при што загинаа најмалку 15 лица, вклучувајќи четири деца, јавуваат светските медиуми.
Русија тврди дека во синоќешните напади гаѓала воени објекти користејќи хиперсонични ракети.
Фото: принтскрин
Регион
15-годишно девојче загина по удар од автобус во Земун, повредени се неколку лица

15-годишно девојче загина денеска во сообраќајна несреќа во Земун, додека четири лица се пренесени во болница, меѓу кои бремена жена и шестгодишно дете, пишуваат медиумите во регионот.
Девојчето што починало било удрено од автобус, по што се судриле три патнички возила, според Танјуг.
Според сведоците, жена трчала преку улицата, а возачот на автобусот се обидел да ја избегне, па всушност преминал на тротоарот, каде што го удрил детето.
И јавното комунално претпријатие GSP се огласи по повод тешката сообраќајна несреќа во Земун во која девојче (15) почина кога беше удрено од автобус а неколку лица беа повредени, стои во написите на српските медиуми.
„Денес околу 12:20 часот, на улицата Цар Душан на број 136, се случи тешка сообраќајна несреќа со смртоносен исход и неколку полесни повреди. Во оваа несреќа учествуваа неколку патнички возила и автобус од линија 18 што ја напушти гаражата и се упати кон терминалот за да се вклучи во сообраќајот. Околностите под кои се случи оваа сообраќајна несреќа се уште се непознати и полицијата работи на нивно утврдување“, изјави GSP.
Како што пишува „Телеграф“, автобусот се обидел да избегне жена која трчала преку улицата надвор од пешачкиот премин, поради што свтел на тротоарот, удирајќи го девојчето кое завршило под возилото. На патот, тој удрил во неколку паркирани автомобили, а потоа се забил во порта на куќата.
Телото на девојчето било извлечено од под автобусот од пожарникари, а екипите за итни случаи можеле само да констатираат смрт. Во несреќата биле повредени десет лица, меѓу кои деветмесечна бремена жена, мајка и шестгодишно дете, 74-годишна жена.
Фото: принтскрин
Свет
Фон дер Лајен: Путин мора да седне на преговарачка маса, Европа ќе ја одигра својата улога

Претседателката на Европската комисија, Урсула фон дер Лајен, денес разговараше телефонски со украинскиот претседател Володимир Зеленски и американскиот претседател Доналд Трамп по веста за комбинираниот руски напад синоќа, во кој беше погодена и Делегацијата на ЕУ во Украина, меѓу другите цивилни цели.
„Тукушто разговарав со украинскиот претседател Володимир Зеленски, а потоа и со американскиот претседател Доналд Трамп по масовниот напад врз Киев, кој ја погоди и нашата канцеларија во ЕУ“, напиша фон дер Лајен на платформата X.
Таа рече дека рускиот претседател Владимир Путин мора да започне преговори со Киев.
„Путин мора да седне на преговарачка маса. Треба да обезбедиме праведен и траен мир за Украина со цврсти и веродостојни безбедносни гаранции“, истакна претседателката на Европската комисија.
Таа додаде дека Европа „целосно ќе ја одигра својата улога“.
„Нашиот одбранбен инструмент SAFE, на пример, ќе биде важен за зајакнување на храбрите украински вооружени сили“, истакна фон дер Лајен.
Таа претходно објави дека руските напади врз Киев, во кои загинаа 18 лица во текот на ноќта, меѓу кои и четири деца, „само ќе го зајакнат единството на Европа и пркосот на Украина“.
Фото: принтскрин