Свет
Рејтингот на Трамп нагло се зголеми по појавувањето на суд: повеќето републиканци сакаат тој пак да биде претседател

Американците се поделени за кривичното гонење на поранешниот претседател Доналд Трамп, но се чини дека случајот ги зголеми неговите шанси да ја добие републиканската номинација во 2024 година, покажува анкетата на „Ројтерс“ и на „Ипсос“ објавена вчера.
Анкетата беше спроведена во средата и четвртокот откога обвинителите во Њујорк во вторникот поднесоа обвинение против Трамп од 34 точки.
Истражувањето покажа дека 49 отсто од Американците сметаат дека е правилно обвинителите да го отворат првиот кривичен случај против американски претседател или поранешен претседател. Сепак, околу 84 отсто од оние што се опишале себеси како демократи рекле дека обвиненијата се оправдани, а само 16 отсто од републиканците се согласија со тоа.
Речиси 40 отсто од републиканците рекле дека тоа ги прави поголеми шансите да гласаат за Трамп во 2024 година, а 12 отсто рекле дека тоа ги прави помали шансите да го поддржат. Други 38 отсто рекле дека сè што се случило со Трамп немало влијание врз нивното мислење.
Трамп води во трката за републиканска номинација со голема разлика, а 58 отсто од републиканците изјавија дека тој е нивниот омилен кандидат. Тоа е повеќе од 48 отсто во анкетата на „Ројтерс“ и на „Ипсос“ објавена во понеделникот.
Гувернерот на Флорида, Рон де Сантис, кој не влезе во трката, беше втор со 21 процент.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Кина воведува дополнителни ограничувања за американските фирми

Кина најави нови ограничувања за американските компании, со дополнително појаснување дека овојпат не се работи само за контрамерки против царината, туку и за безбедносни причини и за прашањето на Тајван.
Кинеските власти објавија дека 16 американски субјекти се додадени на „листата за контрола на извозот“, објаснувајќи дека нивното однесување може да ја „загрози националната безбедност и интересите на Кина“. Ова значи забрана за извоз на стоки, софтвер и технологија со двојна употреба – оние што можат да се користат и за цивилни и за воени цели – на тие субјекти.
Пекинг, исто така, додаде 11 странски компании на таканаречената листа на несигурни субјекти, што им овозможува на властите да воведат казнени мерки против нив. Министерството за трговија наведува дека овие компании учествувале во „т.н. воена и техничка соработка со Тајван“.
Дополнително, на шест американски компании им беа одземени дозволите за извоз, наводно поради загриженост за безбедноста на храната.
Претходно Пекинг најави и дека ќе воведе дополнителни 34 отсто царини за американските стоки.
Свет
Шефот на полската дипломатија: Трамп е посветен на НАТО

Американскиот претседател Доналд Трамп останува посветен на членот 5 од НАТО за колективна одбрана и ќе присуствува на самитот на НАТО во јуни во Хаг, изјави денеска на новинарите во Брисел полскиот министер за надворешни работи, Радослав Сикорски.
Безбедносната политика на Трамп во Европа предизвика сомнеж, а многумина се прашуваат дали САД ќе им помогнат во случај на напад, со што се доведува во прашање посветеноста на Вашингтон на принципот на колективна одбрана.
Сепак, на состанокот на министрите за надворешни работи на НАТО во Брисел, американскиот државен секретар Марко Рубио во четвртокот им рече на сојузниците дека Вашингтон останува посветен на западната воена алијанса, но дека се очекува тие да потрошат повеќе за одбраната и дека ќе им биде дадено време да го сторат тоа.
На прашањето дали верува дека САД сè уште се подготвени да ги бранат териториите на земјите од НАТО, Сикорски одговори потврдно.
„Да, претседателот Трамп им го потврди тоа на лидерите. Тоа е сепак точно и колку што слушаме, претседателот Трамп ќе присуствува на самитот во Хаг“, рече Сикорски.
Лидерите на земјите од НАТО се состануваат во Хаг од 24 до 26 јуни.
Свет
Кина воведува дополнителни царини од 34 отсто за американските стоки

Кинеското Министерство за финансии објави дека од 10 април ќе воведе дополнителни царини од 34 отсто за американските стоки.
Во соопштението за печатот тие наведуваат дека царините наметнати од Соединетите Американски Држави за кинески производи не се во согласност со меѓународните трговски правила.
Оваа одлука доаѓа како директна реакција на најавата на актуелниот американски претседател Доналд Трамп за воведување вкупни царини од 54 отсто за кинескиот извоз вклучувајќи ги и мерките што се веќе воведени претходно.