Хамас се согласи со предлогот на американскиот специјален претставник Стив Виткоф за прекин на огнот во Газа, изјавил за Ројтерс палестински функционер близок до групата, отворајќи го патот за можен крај на војната со Израел.

Новиот предлог, кој предвидува ослободување на десет заложници и 70-дневно примирје, Хамас го прими преку посредник.

„Предлогот вклучува ослободување на десет живи израелски заложници што ги држи Хамас во две групи во замена за 70-дневен прекин на огнот и делумно повлекување од Појасот Газа“, изјави изворот за Ројтерс.

Предлогот, исто така, повикува на ослободување на бројни палестински затвореници од страна на Израел, вклучувајќи стотици кои издржуваат долги затворски казни.

Ројтерс пишува дека израелските власти сè уште не дале коментар за ова.

На 1 март, потсетува овој медиум, Израел го раскина јануарскиот договор за прекин на огнот со Хамас и ги продолжи силните напади во Газа. Хамас и сојузничките фракции почнаа да пукаат ракети и да напаѓаат два дена подоцна.

Хамас изјави дека е подготвен да ги ослободи сите преостанати заложници киднапирани во нападите врз јужен Израел на 7 октомври 2023 година и да се согласи на траен прекин на огнот доколку Израел целосно се повлече од Газа.

Израелскиот премиер Бенјамин Нетанјаху изјави дека Израел би бил спремен да се согласи на привремен прекин на огнот само во замена за ослободување на заложниците, ветувајќи дека војната може да заврши само кога Хамас ќе биде искоренет.

Израел започна воздушна и копнена војна во Газа по прекуграничниот напад на милитантите на Хамас на 7 октомври 2023 година, во кој, според израелските податоци, во Газа беа убиени 1.200 луѓе, а 251 заложник беа земени.

Според здравствените власти во Газа, во конфликтот загинаа речиси 54.000 Палестинци и е опустошена крајбрежната зона. Хуманитарните групи велат дека знаците на тешка неухранетост се широко распространети.