Израелските воздухопловни сили извршија голем бран воздушни напади врз иранските ракетни лансери во централен Иран, потврди денес портпаролката на израелската војска, генерал Ефи Дефрин.

„Шеесет борбени авиони учествуваа во напади врз клучни ракетни цели длабоко во Иран“, рече Дефрин.

Таа додаде дека нападите ги принудиле иранските сили да се повлечат кон исток.

„Тие го напуштија западен Иран, но ние ги гониме“, рече таа, додавајќи дека иранската ракетна активност сега е главно концентрирана околу Исфахан.

Израелската војска потврди: Го убивме новиот началник на Генералштабот на Иран

Израелските одбранбени сили (ИДФ) објавија дека извршиле напади длабоко во Иран, насочени кон нуклеарните, балистичките и командните капацитети на Исламската Република.

„Нападнавме длабоко, ги погодивме нуклеарните, балистичките и командните капацитети на Иран“, изјави Дефрин, на прес-конференција вечерва.

Дефрин, исто така, потврди дека во последниот израелски напад е убиен високиот ирански безбедносен службеник Али Шадмани, како што објави војската во својот оперативен извештај претходно истиот ден.

„ИДФ го елиминираше Али Шадмани, началник на Генералштабот на режимот во воено време. Тој ја држеше позицијата само четири дена пред да ја доживее истата судбина како и неговиот претходник“, рече Дефрин.

Шадмани го наследува генералот Голамали Рашид, кој беше убиен минатата недела во израелски воздушен напад.

Иранскиот врховен лидер, Али Хамнеи, ги префрлил клучните овластувања на Врховниот совет на Иранската револуционерна гарда (ИРГЦ), дознава „Иран интернешнл“, по неговото петдневно отсуство од јавноста.

Вонредната одлука доаѓа откако се појавија извештаи дека Хамнеи бил преместен во подземен бункер во Лавизан, североисточно од Техеран, со членови на неговото најблиско семејство, вклучувајќи го и неговиот син Моџтаба.

Американскиот претседател, Доналд Трамп, го спомена преку мрежата Truth Social.

„Знаеме точно каде се крие таканаречениот „Врховен лидер“. Тој е лесна цел, но таму е безбеден, нема да го извадиме (да го убиеме!), барем не засега. Но, не сакаме ракети испукани кон цивили или американски војници. Нашето трпение е при крај. Ви благодариме за вашето внимание!“, објави тој.

Иран сè уште официјално не прогласил воена состојба, но судските службеници признаа дека земјата работи во услови на фактичка вонредна состојба. Префрлањето на овластувањата се толкува како превентивна мерка за да се обезбеди континуитет на командата во случај на смрт на Хамнеи.

Претседателот на САД, Доналд Трамп, објави низа пораки на социјалните мрежи во врска со Иран, вклучувајќи една во која бара „безусловно предавање“

Во претходните објави, Трамп изјави дека САД сега имаат целосна контрола врз небото над Иран и тврдеше дека знае каде се наоѓа врховниот лидер Али Хамнеи.

„Нема да го убиеме, барем не засега“, напиша Трамп, сугерирајќи дека целта е позната, но дека тој во моментов не планира напад врз иранскиот лидер.

САД испраќаат повеќе борбени авиони на Блискиот Исток
САД распоредуваат повеќе борбени авиони на Блискиот Исток за да го зајакнат своето воено присуство во регионот, поради ескалацијата на војната меѓу Израел и Иран, објави Ројтерс, повикувајќи се на тројца американски претставници.

Еден од изворите рече дека авионите што се испраќаат вклучуваат Ф-16, Ф-22 и Ф-35.

Двајца други претставници нагласија дека ова е одбранбено распоредување, со оглед на тоа што авионите веќе се користат за соборување беспилотни летала и ракети.

Аксиос: Трамп сериозно размислува за напад врз иранските нуклеарни објекти
Американскиот претседател Доналд Трамп сериозно ја разгледува можноста за американски воен напад врз иранските нуклеарни објекти, вклучувајќи го и подземниот објект за збогатување ураниум во Фордоу, објави Аксиос, повикувајќи се на тројца американски претставници.

Според извештајот, Трамп ќе одржи состанок со својот тим за национална безбедност во 13 часот по локално време денес во таканаречената Соба за ситуации во Белата куќа, каде што се очекува да донесе одлука за политиката на САД кон војната меѓу Израел и Иран.