Претседателот на Соединетите Американски Држави, Доналд Трамп, денеска изјави дека Мексико нема да мора да плаќа царини за која било стока што спаѓа во трговскиот договор САД-Мексико-Канада до 2 април, пренесува Ројтерс.

„По разговорот со мексиканската претседателка Клаудија Шајнбаум, се согласив дека Мексико нема да мора да плаќа царини за ништо што спаѓа во договорот USMCA (САД-Мексико-Канада)“, напиша Трамп на неговата мрежа.

Како што наведе, овој договор важи до 2 април.

„Ова го направив како отстапка и од почит кон претседателката Шајнбаум. Нашите односи беа многу добри и работиме напорно на границата, како во однос на запирање на илегалните имигранти да влезат во САД, така и во однос на запирање на фентанилот“, напиша Трамп и се заблагодари на мексиканската претседателка за нејзината напорна работа и соработка.

Од друга страна, Шајнбаум рече дека денеска имала „одличен и почитуван“ разговор со нејзиниот американски колега Доналд Трамп, кој се согласил да ги паузира американските царини за мексиканскиот увоз што се во согласност со постоечкиот трговски договор USMCA.

Шајнбаум напиша на платформата X дека САД и Мексико ќе продолжат да работат заедно за да го запрат протокот на опиоидниот фентанил од Мексико во САД, како и борбата против трговијата со оружје од САД во Мексико.

Американскиот секретар за трговија Хауард Лутник претходно денеска изјави дека едномесечното одложување на високите царини за стоки увезени од Мексико и Канада, кое беше одобрено за производи од автомобили, најверојатно ќе биде продолжено на сите производи опфатени со трговскиот договор меѓу САД и Мексико и Канада.

Лутник изјави за CNBC дека се надева дека американскиот претседател Доналд Трамп ќе го објави продолжувањето денес, еден ден откако ги ослободи автомобилските стоки од царините од 25 отсто што ги воведе на увозот од Канада и Мексико претходно оваа недела.

Американскиот претседател Доналд Трамп вчера одобри едномесечно ослободување од новите царини на увозот од Мексико и Канада за американските производители на автомобили, пренесува Танјуг

Американскиот претседател Доналд Трамп ја разгледува можноста за промена на учеството на САД во НАТО, со што САД би бранеле друга членка на Алијансата, само доколку таа членка ја исполни целта на НАТО за трошоците за одбрана, изјавиле извори денес за „NBC News“.

Доколку Трамп ја воведе таа промена, тоа би било кршење на принципите на Алијансата познат како член 5, кој вели дека напад врз која било земја на НАТО е напад врз сите членки.

Трамп на сличен начин размислува за промена на политиката во која САД би можеле да одлучат да им дадат приоритет на воените вежби со членките на НАТО кои трошат одреден процент од својот БДП за одбрана, рекоа официјални лица.

Администрацијата на САД веќе им сигнализираше на европските сојузници дека САД би можеле да го намалат своето воено присуство во Европа, а една од опциите што сега се разгледува е да се репозиционираат некои американски војници во регионот, така што тие да бидат фокусирани на, или околу земјите од НАТО кои ги зголемија трошоците за одбрана.

Според најновите статистики на НАТО, минатата година 23 членки на НАТО издвоиле повеќе од два отсто од БДП за одбраната, а повеќе од три Естонија, Грција, Латвија, Полска и САД.

Најголем процент одвои Полска, која за одбрана потрошила 4,12 отсто од БДП.

Потенцијалната промена во начинот на учество на САД во НАТО доаѓа кога Трамп ги притиска европските сојузници да направат повеќе за да и помогнат на Украина во војната со Русија, анализира медиумот.

Трамп се закани дека ќе ги повлече САД од НАТО за време на неговиот прв мандат и го доведе во прашање ефектот на членот 5 за САД, кој беше активиран само еднаш претходно, по нападите на 11 септември на САД.

Украина побара членство во НАТО, но администрацијата на Трамп објави дека тоа нема да биде дел од потенцијалниот мировен договор, пренесува Танјуг.

Сите земји-членки на НАТО треба веднаш да ги зголемат трошоците за одбрана на најмалку три отсто од БДП, изјави денеска полскиот претседател Анджеј Дуда на заедничката прес-конференција во Брисел со генералниот секретар на НАТО Марк Руте.

– Поднесов писмено барање до генералниот секретар ова прашање да биде покренато на претстојниот самит во Хаг и да се донесе таква одлука најмалку три проценти од БДП на земјите-членки на алијансата да се распределат за одбрана, – рече Дуда.

Целта на членките на НАТО е да издвојуваат два отсто годишно, додека Хрватска, Португалија, Италија, Белгија, Луксембург, Словенија и Шпанија издвојуваат помалку од два отсто од БДП, покажуваат податоците на Алијансата, пренесува Танјуг.