Илјадници луѓе протестираа против масовниот туризам на шпанските Канарски Острови, барајќи од властите да го ограничат бројот на посетители за да ги заштитат локалните жители од зголемените трошоци за домување, сообраќајните метежи и преоптоварените услуги.

Марширајќи под знамето „Канарските Острови имаат ограничување“, демонстрантите вчера излегоа на улиците на сите главни острови на архипелагот и во неколку градови во континентална Шпанија. Некои скандираа за ефектите од туризмот врз водоснабдувањето.

„Туризмот е многу важен за Канарските Острови, но мора да сфатиме дека колапсот е тотален“, изјави за Ројтерс, Хуан Франциско Галиндо, менаџер на хотел во Тенерифе.

Неговиот татко поседува мал островски имот на кој локалната администрација издаде наредба за експропријација во 2023 година поради одобрување на проект за луксузен хотелски комплекс.

„Оние 70 квадратни метри што сакаат да ги експроприраат се сè што има мојот татко. Неговата здравствена состојба се влоши откако се случи ова“, рече тој.

Според официјалните податоци, повеќе од 1 милион странски туристи ги посетуваат Канарските Острови секој месец, во споредба со локалното население од 2,2 милиони.

Шпанија, која имаше рекорден број туристички пристигнувања во 2024 година, очекува уште повеќе посетители оваа година.

Шпанија беше сведок на неколку протести против прекумерниот туризам во други популарни дестинации за одмор, вклучувајќи ги Мајорка, Барселона и Малага. Слични демонстрации беа одржани на Канарските Острови минатата година.

Американскиот претседател Доналд Трамп денес ќе разговара со рускиот претседател Владимир Путин за мирот во Украина, додека европските лидери бараат Кремљ да прифати итен прекин на огнот за да се стави крај на најсмртоносниот конфликт во регионот од Втората светска војна.

Путин испрати илјадници војници во Украина во февруари 2022 година, предизвикувајќи го најсериозниот конфликт меѓу Русија и Западот од Кубанската ракетна криза во 1962 година.

Трамп, кој вели дека сака да биде запаметен како миротворец, постојано повикува на прекин на „крвопролевањето“ во Украина, кое неговата администрација го прикажува како proxy војна меѓу САД и Русија.

Под притисок на Трамп, претставниците од завојуваните земји се состанаа минатата недела во Истанбул за прв пат од март 2022 година, откако Путин предложи директни разговори, а Европејците и Украина повикаа на итен прекин на огнот.

Трамп, кој рече дека напредокот во прекинот на огнот е малку веројатен додека не се сретне тој со Путин, извести дека ќе разговара со Путин во понеделник во 16 часот. Кремљ соопшти дека подготовките за повикот се во тек.

На поранешниот американски претседател Џо Бајден му е дијагностицирана агресивна форма на рак на простата која се проширила на неговите коски, соопшти вчера неговиот кабинет.

„Ракот на простата е многу честа болест“, вели д-р Џамин Брамбхат, уролог и хирург во „Орландо Хелт“ и доцент на Медицинскиот факултет на Универзитетот во Централна Флорида, кој не е вклучен во третманот на Бајден, пишува Си-ен-ен.

„Како што старееме, повеќето мажи ќе имаат клетки на рак во своите тела.“

Ракот на простата се проценува со таканаречениот Глисонов скор, базиран на изгледот на клетките под микроскоп. Глисоновиот резултат од 9 „укажува најагресивната форма на рак на простата“, објасни д-р Бенџамин Дејвис, професор по уролошка онкологија на Медицинскиот центар на Универзитетот во Питсбург, кој исто така не е вклучен во случајот на Бајден.

Бајден го помина викендот во својот дом во Вилмингтон, Делавер. Си-ен-ен побара информации за тоа каде се лекува.

Загриженоста за возраста и здравјето на Бајден го придружуваше поранешниот претседател, најстариот во историјата на САД, во текот на целиот негов мандат, а се интензивираше по неговиот слаб настап во дебатата со Доналд Трамп.

Бајден беше подложен на лекарски преглед во воената болница „Волтер Рид“, а неговиот лекар, Кевин О’Конор, во тоа време изјави дека „нема нови причини за загриженост“ и дека претседателот е „способен да ги извршува своите должности“.

Во новата книга од новинарот на Си-ен-ен, Џејк Тапер, и Алекс Томпсон од „Аксиос“, се наведува дека помошниците на Бајден забележале знаци на негово слабеење дури и пред дебатата што заврши со неговото повлекување од претседателската трка три недели подоцна.

Авторите тврдат дека помошниците приватно размислувале дали на Бајден ќе му треба инвалидска количка за време на вториот мандат и дека тој не ја препознал филмската ѕвезда Џорџ Клуни на добротворна вечера во јуни 2024 година.

Бајден во голема мера се повлече од јавноста откако ја напушти Белата куќа, но неодамна повторно почна да учествува на јавни настани.

Претходно овој месец, тој се појави со сопругата Џил Бајден во емисијата „The View“ на Еј-би-си, каде што ги отфрли тврдењата за когнитивен пад во последната година од функцијата. „Тие грешат. Нема докази за тоа“, рече Бајден.

Поранешната прва дама додаде: „Луѓето што ги напишаа тие книги не беа во Белата куќа со нас и не видоа колку напорно работеше Џо секој ден. Тој стануваше, работеше цел ден, а навечер, додека јас бев во кревет и читав книга, тој сè уште беше на телефон, проучувајќи извештаи и соработувајќи со помошниците“.

„Ракот на Бајден е неизлечив, но има добри вести“
Иако метастатскиот рак на простата не е излечив, експертите истакнуваат дека може ефикасно да се контролира со современи хормонски терапии и хемотерапија, кои значително го продолжија животот на пациентите во последните години.

Ракот е лична тема за Бајден, чиј син Бо почина од рак на мозокот во 2015 година. Како потпретседател во 2016 година, тој ја предводеше иницијативата на Белата куќа за борба против ракот, а во 2022 година, како претседател, го обнови проектот „Cancer Moonshot“ со цел намалување на смртните случаи од рак за најмалку 50% во следните 25 години.