Свет
Рускиот обид за ширење на влијанието во Африка го фати Западот неподготвен

Русија френетично презема нови обиди за зголемување на своето влијание во Африка преку зајакнување на воената соработка и преку склучување договори за продажба на оружје со африканските држави, тврди британски „Гардијан“.
Последен во оваа низата обиди е договорот за изградба на руска логистичка база на брегот на Црвеното Море во Еритреја постигнат на почетокот на септември кога руски владини претставници со месеци крстосуваа од Африканскиот Рог до Големите Езера и Јужна Африка.
Брзината со која Русија ја спроведува новата стратегија предизвика загриженост за почитувањето на човековите права и стравување за безбедноста поради продажба на оружје на режими кои се слаби или се вклучени во конфликт, особено откако од САД дојде најава дека Вашингтон планира да ги повлече своите војници и да ги затвори мисиите во африканските земји.
„Гардијан“ посочува дека фокусот врз зајакнатата активност на Москва во Африка се зголемил по убиството на тројцата руски новинари во Централноафриканската Република (ЦАР) минатиот месец додека ги истражувале активностите на контроверзната руска фирма за воени услуги „Вагнер“. Аналитичарите наведуваат дека активностите на Москва се интензивирале годинава, при што високи руски претставници претстојувале во повеќе африкански држави нудејќи им договори за продажба на оружје и за воени услуги често придружувани со некакви погодности како дипломатска поддршка или потенцијално рентабилни договори за експлоатација на руди.
„Вознемиреност предизвикува не само испораката на оружје и распоредувањето војници, туку и фактот дека Русија се постави во улога на посредник меѓу владата на ЦАР и воружените бунтовнички групи на преговорите во Судан. Со тоа се поткопа посредничката улога на африканската унија, а Русија ја користи ваквата позиција за да добие пристап до рудниците за дијаманти и злато во областите под контрола на бунтовниците, пишува „Гардијан“.
Високи руски претставници, меѓу кои и министерот за надворешни работи, Сергеј Лавров, и претседателката на Горниот дом на парламентот на Русија, Валентина Матијенко, биле вклучени во процесите за постигнувањето договори за воена соработка.
„Во текот на март Лавров ги посети Ангола, Намилија, Мозамбик, Етиопија и Зимбабве, каде што потпиша серија договори за отворање економски зони, искористување на минералните ресурси и за воено-техничка соработка. Во јули директорот на руската Федерална служба за воено-техничка соработка, Дмитриј Шугаев, за време на самитот на БРИКС објави дека е потпишам меморандум за разбирање за воена соработка, вклучително и за обуки, со Заедницата за развој на државите од Јужна Африка, наведува „Гардијан“, додавајќи дека зголемениот интерес на Русија за Африка го фатил Западот неподготвен за ваквиот руски пристап.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Путин го нападна Киев само неколку часа по средбата на Трамп и Макрон: тревога низ целата земја, Полска ги подигна авионите

Само неколку часа откако американскиот претседател Доналд Трамп изјави дека рускиот лидер Владимир Путин прави се за да ја прекине војната во Украина, неговите сили го нападнаа Киев.
Русија ја гаѓаше украинската престолнина од воздух, повредувајќи една 44-годишна жена и оштетувајќи неколку куќи, според украинските власти.
Overnight, Putin’s forces attacked Ukraine with drones and cruise missiles, forcing Poland to launch its combat aircraft.
In Sumy, two Russian drones struck a busy residential area, injuring civilians. Kyiv Region was also hit. pic.twitter.com/nRCsUUEz1f
— KyivPost (@KyivPost) February 25, 2025
Целосниот опсег на нападот не беше веднаш јасен, но соседната членка на НАТО, Полска, ги подигна авионите за да обезбеди безбедност на воздухот.
Полски воени авиони рано утринава го прелетаа воздушниот простор на земјата за да ја зголеми безбедноста, откако Русија изврши воздушни напади врз Украина, соопшти Оперативната команда на полските вооружени сили.
„Преземените чекори се насочени кон обезбедување сигурност во регионите кои граничат со загрозените области“, соопшти Командата, пренесе Ројтерс.
Вонредна состојба претходно беше прогласена на целата територија на Украина.
Свет
ЕУ понуди на Украинците сопствен договор за минералните суровини, различен од оној на Трамп

Европската унија вчера и понуди сопствен договор за „критичните материјали“ на Украина, токму кога американскиот претседател Доналд Трамп тврдеше дека Вашингтон е блиску до склучување договор со Киев за правата на неговите огромни природни ресурси, објави американски „Политико“.
Европскиот комесар за индустриска стратегија Стефан Сежурне рече дека ривалскиот предлог им го доставил на украинските официјални претставници со кои се сретнал во Киев за време на посетата на Европската комисија за одбележување на третата годишнина од целосната инвазија на Русија.
„Дваесет и еден од 30-те критични материјали што и се потребни на Европа може да бидат обезбедени од Украина во партнерство со победа-победа“, рече Сежурне, пренесе АФП.
Тој нагласи : „Додатната вредност што ја нуди Европа е дека ние никогаш нема да бараме договор што не е заемно корисен“.
Трамп направи сè поагресивни чекори кон Украина за правата на нејзините минерални богатства, барајќи дури 500 милијарди долари како компензација за поддршката на Вашингтон за Киев во одбраната на инвазијата на Москва.
Украинскиот претседател Володимир Зеленски досега одби да потпише два нацрт-договори предложени од администрацијата на Трамп, велејќи дека условите, за кои „Њујорк Тајмс“ објави дека вклучуваат Киев да се откаже од приходите од минерали, нафта и гас, плус заработка од пристаништата и друга инфраструктура во износ од 500 милијарди долари, се премногу сурови.
„Нема да потпишам нешто што ќе треба да го враќаат 10 генерации Украинци“, рече Зеленски на прес-конференција во неделата.
Но, Трамп вчера инсистираше на тоа дека „конечниот договор“ е „многу блиску“ и дека ќе вклучува „ретки земји и разни други работи“.
Украина има огромни наоѓалишта на критични елементи и минерали, од литиум до титаниум, кои се од витално значење за производство на модерни технологии и многу посакувани во глобалната трка по ресурси. Исто така, има огромни резерви на јаглен, како и нафта, гас и ураниум, но голем дел од тоа е на територии под руска контрола.
Свет
(Видео) Во Колумбија фатен шверцер на кокаин, ја криел дрогата под перика

40-годишен колумбиски државјанин пред пет дена бил фатен во обид да прошверцува дрога скриена под перика додека се качувал на лет од Картагена за Амстердам.
Периката содржела 19 капсули кокаин, а пратката се проценува дека вреди повеќе од 10.000 евра, соопштија властите.
¡‘Narcopeluca’ en Cartagena!
Detalles: https://t.co/h47nOGiUY4 pic.twitter.com/2CbJHZPnG6
— Policía de Colombia (@PoliciaColombia) February 24, 2025
Осомничениот е приведен и против него е поднесена кривична пријава за сторено кривично дело трговија, производство и држење наркотици.
„Задаваме силни удари на криминалните структури кои, покрај трговијата со дрога, се и генератори на разни насилни акти и други видови злосторства кои го уништуваат мирот и соживотот на заедницата“, изјави командантот на полицијата во Картагена, Гелвер Јецид Пења Араке.