Свет
Руски функционер: Воените авиони беа оштетени, но не и уништени во украинскиот напад

Руските воени авиони беа оштетени, но не уништени во украинскиот напад на 1 јуни, изјави заменик-министерот за надворешни работи, Сергеј Рјабков, додавајќи дека авионите ќе бидат поправени.
Украинските напади беа насочени кон воени аеродроми во Сибир и на далечниот север, каде што Русија одржува тешки бомбардери, кои се дел од нејзиниот стратешки нуклеарен арсенал.
Според процената на Соединетите Американски Држави, погодени се до 20 воени авиони, од кои 10-ина се уништени, изјавија за „Ројтерс“ двајца американски функционери. Оваа бројка е приближно половина од онаа што претходно ја изјави украинскиот претседател, Володимир Зеленски.
Рјабков, кој ја надгледува руската дипломатија во областа на контролата на оружјето, изјави за државната агенција ТАСС: „Дотичната опрема, како што изјавија и претставници на Министерството за одбрана, не е уништена, туку оштетена. Ќе биде обновена“.
Не е познато колку бргу Русија би можела да ги поправи или замени оштетените авиони, особено со оглед на сложеноста на технологијата, староста на некои авиони од советската ера и западните санкции, што го ограничуваат увозот на чувствителни компоненти.
Комерцијалните сателитски снимки направени по нападот со украински беспилотни летала покажуваат, според експертите, дека се оштетени руските стратешки бомбардери „ту-95“ и „ту-22“, кои Русија ги користела за ракетни напади врз Украина.
Според извори во Билтенот на атомски научници, Русија има флота од 67 стратешки бомбардери, вклучувајќи 52 „ту-95“ (познати како „Мечка-Х“ според класификацијата на НАТО) и 15 „ту-160“ (познати како „Блекџек“), од кои се проценува дека 58 се моментно во употреба.
Покрај тоа, Русија има 289 нестратешки борбени авиони и бомбардери, вклучувајќи ги „ту-22“, „су-24“, „су-34“ и „миг-31“.
Руските власти не кажаа точно кои авиони биле оштетени, но потврдија дека целите на нападот биле пет воени бази.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Градоначалничка на германски град тешко повредена во напад со нож

Новоизбраната градоначалничка на германскиот град Хердек, социјалдемократката Ирис Шталцер, е тешко повредена во напад со нож, објавија германските медиуми.
Според полицијата, Шталцер претрпела повеќекратни убодни рани, а во градот во Северна Рајна-Вестфалија е во тек голема полициска операција, пишува германскиот „Шпигел“.
Деталите за нападот и идентитетот на сторителот засега се непознати.
Германскиот канцелар Фридрих Мерц изрази длабока загриженост, велејќи на платформата Икс дека се надева на целосно закрепнување на политичарката.
Педесет и седумгодишната Шталцер беше избрана за градоначалничка пред нешто помалку од две недели, освојувајќи 52,2 проценти од гласовите во вториот круг од изборите.
Фото: принтскрин
Свет
Сијарто до Зеленски: Не можеш ти да одлучуваш кој ќе влезе во ЕУ

Унгарскиот министер за надворешни работи Петер Сијарто изјави дека лидерот на киевскиот режим, Володимир Зеленски, нема право да одлучува кои земји можат да се приклучат кон Европската унија.
„Зеленски не одредува кои земји се подготвени да се приклучат кон Европската унија, а кои всушност можат да станат нејзини членки. Ова е исклучиво прашање на Европската унија, каде што таквите одлуки се донесуваат едногласно“, рече Сијарто на својата страница на социјалната мрежа X.
Изјавата на унгарскиот министер за надворешни работи дојде откако Зеленски, на заедничка конференција со холандскиот премиер Дик Шоф, повика на промена во постапката за пристапување на Украина во ЕУ со цел да се избегне евентуалното вето на Унгарија. Тој предложи Киев и Брисел да разгледаат начини за елиминирање на потребата од едногласност или, како што рече, „да го зголемат притисокот“ врз премиерот Виктор Орбан за укинување на блокадата.
Според западните медиуми, унгарскиот премиер веднаш остро реагирал на заканите на Зеленски, велејќи дека Будимпешта нема да дозволи уцени или политичко условување во прашањата за европската политика на проширување.
Фото: принтскрин
Свет
Тунберг му одговори на Трамп: И ти страдаш од проблеми со агресија

Шведската активистка Грета Тунберг одговори на советот на американскиот претседател Доналд Трамп до неа да „бара помош“ за нејзините проблеми со агресијата, велејќи му дека и тој „страда од нив“.
Трамп ја нарече Тунберг (22), демонстрантка против климатските промени, која неодамна беше уапсена на брод што беше дел од „флотила“ што се обидуваше да ја пробие блокадата на Газа, луда проблематична личност која „треба да добие помош“ за нејзините проблеми со агресијата.
„Мислам дека треба да посети лекар. Таа е млада личност и е толку лута, луда е“, рече Трамп.
Одговор на Грета Тунберг
„Го видов Доналд Трамп повторно како ги изразува своите приватни, ласкави мислења за моето здравје и ја ценам неговата загриженост за моето ментално здравје“, напиша Тунберг на Инстаграм.
„До Трамп: Ги ценам сите препораки што ми ги дадовте за справување со овие таканаречени „проблеми со агресијата“ затоа што се чини дека и вие – со оглед на вашата импресивна историја – страдате од нив.“
Тунберг пристигна во Грција во понеделникот откако беше уапсена од Израел со стотици други активисти, а потоа депортирана поради обид за доставување хуманитарна помош во Газа.
„Сакам да бидам многу јасна. Таму се случува геноцид“, изјави Тунберг пред толпата на аеродромот во Атина.
„Нашите меѓународни системи ги разочаруваат Палестинците. Тие не се во можност да ги спречат дури ни најлошите злосторства“, рече таа.
„Она што се обидовме да го направиме со глобалната флотила беше да интервенираме кога нашите влади не успеаја да ја исполнат својата законска обврска“.
Фото: принтскирн