Свет
САД во ОН повторно ставија вето на нацртот за прекин на огнот во Газа

САД вчера ставија вето на нацрт-резолуцијата на Советот за безбедност на Обединетите нации со која ќе се бараше итно, безусловно и трајно прекинување на огнот во Газа и укинување на сите израелски ограничувања за помош на палестинската енклава.
Текстот на резолуцијата, изготвен од 10 избрани членови на 15-члениот совет, исто така бара итно, достоинствено и безусловно ослободување на сите заложници што ги држат Хамас и други групи.
Текстот доби 14 гласа „за“, но тоа беше и шести пат САД да стават вето.
„Гладот во Газа е потврден – не проектиран, не деклариран, туку потврден“, изјави данската амбасадорка во ОН, Кристина Маркус Ласен, пред Советот пред гласањето.
„Во меѓувреме, Израел ја прошири својата воена операција во градот Газа, дополнително продлабочувајќи го страдањето на цивилите. Како резултат на тоа, токму оваа катастрофална ситуација, овој хуманитарен и човечки неуспех, нè принуди да дејствуваме денес.“
Соединетите Американски Држави традиционално го штитат својот сојузник од Блискиот Исток, Израел, во Обединетите нации.
фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Сијарто: Зеленски го изгуби контактот со реалноста

Украинскиот претседател Володимир Зеленски целосно „го изгуби чувството за реалност“ ако мисли дека може сам да одлучи дали неговата земја ќе биде примена во Европската Унија, изјави министерот за надворешни работи на Унгарија, Петер Сијарто.
Европската Унија му додели на Киев статус на кандидат во 2022 година и ја постави 2030 година како крајна дата за членство. Будимпешта се спротивстави на процесот уште од самиот почеток, предупредувајќи дека приемот на Украина би можел да ги зголеми тензиите со Русија и да им наметне децении воена помош на даночните обврзници на ЕУ. Во средата, Зеленски ја обвини Унгарија дека го блокира пристапувањето за премиерот Виктор Орбан да профитира политички со критикување на ЕУ и Украина.
„Украина стана едно од средствата со кои Орбан може да ја зголеми популарноста на својата партија“, рече Зеленски на прес-конференција, додавајќи дека „Киев ќе влезе во ЕУ без оглед на ставот на Будимпешта“.
Сијарто одговори на тие обвинувања во емисијата „Час на воинте“..
„Мислам дека украинскиот лидер целосно го изгубил чувството за реалност и можеби тоа е причината зошто зборува такви глупости“, рече Сијарто. „Кој ќе стане член не одлучуваат оние што сакаат да влезат, туку оние што веќе се внатре. И тоа мора да биде едногласна одлука. Додека сите не се согласат дека некој треба да стане член, тоа нема да се случи – тоа не е ракетна наука.“
Тој потсети дека Унгарците веќе го изразиле своето мислење за ова прашање – на националниот референдум во јуни, повеќе од два милиони гласачи, или 95 проценти, го отфрлија членството на Украина во ЕУ.
Унгарија, потсетуваат медиумите, не е сама во својот став. Словачкиот премиер Роберт Фицо, како и неколку полски функционери, исто така изразија противење. Според истражувањето на агенцијата IBRiS, само 35 проценти од Полјаците денес го поддржуваат влезот на Украина во ЕУ – во споредба со дури 85 проценти во 2022 година. Податоците на Евробарометарот од септември покажуваат дека само 28 проценти од Чесите го поддржуваат пристапувањето, додека повеќе од половина од граѓаните на Франција и Австрија се противат на тоа, пренесуваат агенциите.
Фото: принтскрин
Свет
Зеленски: Украина ја зголемува употребата на оружје со долг дострел

Претседателот на Украина, Володимир Зеленски, денес изјави дека имал детална дискусија со военото раководство на земјата за употребата на оружје со долг дострел, вклучувајќи ракети и беспилотни летала, како и за потребата од зајакнување на таканаречените „далакусежни санкции“ против Русија.
„Разговаравме детално за употребата на нашето оружје со долг дострел, нашите ракети и беспилотни летала. Разговаравме и за производството, снабдувањето на армијата и обуката на екипите. Целта е да бидеме значително поактивни во подготовката и примената на долгорочните санкции против Русија. Колку сме поефикасни во нашиот дострел, толку побрзо ќе постигнеме мир“, рече Зеленски, објави Укринформ.
Тој истакна дека „Украина не води војна заради војна“, за разлика од Русија, туку дека сака да постигне мир. Додаде дека дури и Хамас сега покажува подготвеност за преговори, додека, како што рече, „диктаторот Владимир Путин“ продолжува да одбива.
Зеленски, исто така, нагласи дека Украина, заедно со меѓународните партнери, создава услови за „принудување на Русија на мир“. „Ги поддржуваме сите глобални дипломатски напори за мир на Блискиот Исток и цврсто веруваме дека праведниот притисок врз Русија ќе донесе мир во Украина и во целиот наш регион. Важно е американското раководство да остане активно“, заклучи Зеленски.
Тој претходно го поздрави напредокот кон мир на Блискиот Исток, велејќи дека „Русија останува главен извор на војна и терор во светот“.
Фото: принтскрин
Свет
Белгискиот премиер цел на терористички напад: уапсени три лица

Три лица, родени во 2001, 2002, 2007 година, беа уапсени денес во Белгија под сомнение за планирање терористички напад инспириран од радикален ислам, објави федералната обвинителка Ан Францен на вонредна прес-конференција, а локалните медиуми објавија дека белгискиот премиер Барт де Вевер бил цел на нападот.
„Тие беа лишени од слобода како дел од истрагата за обид за терористичко убиство и учество во активностите на терористичка група“, рече Францен, објави Фламанската радио-телевизија (VRT).
Како што дознава VRT, цел на нападот требало да бидат белгиски политичари, вклучувајќи го и белгискиот премиер Барт де Вевер.
За време на претресот на станот на еден од осомничените, федералната полиција пронашла рачно изработена експлозивна направа што личи на импровизирана експлозивна направа (IED), како и торба со челични топчиња, а според првичните информации, експлозивот не бил активиран.
Кај вториот осомничен е пронајден 3Д печатач, за кој се верува дека е користен за изработка на делови од експлозивна направа.
Исто така, постојат докази дека осомничените планирале да користат дрон за носење експлозиви.
Двајца осомничени биле испрашувани во седиштето на федералната полиција во Антверпен и ќе бидат изведени пред истражен судија, додека третото лице беше ослободено во текот на денот, пренесуваат медиумите.
Белгискиот министер за правда, Анелис Верлинден, изјави дека овој случај „ги погодува темелите на белгиската демократија“ и ја пофали брзата и решителна реакција на обвинителството и полициските служби.
Фото: принтскрин