Свет
САД ќе ги прошират санкциите против рускиот гасовод „Северен тек 2“

Вашингтон постигна договор да вклучи дополнителни санкции против рускиот гасовод за природен гас кон Германија во законот за одбрана, што треба да се донесе, објави „Блумберг“ повикувајќи се на извори запознати со ова прашање.
Според извештајот, новите санкции против гасоводот „Северен тек 2“ на „Газпром“ би биле насочени кон осигурителни компании и компании за сертификација што работат со руски пловни објекти за завршување на проектот. Тие ќе бидат вклучени како дел од законот за овластување за национална одбрана во 2021 година, кој мора да биде донесен до крајот на годината.
САД сега ќе мора да ги известат своите сојузници пред да ги воведат новите санкции. Оваа одредба беше додадена откако претседателот на Комитетот за надоворешни работи во претставничкиот дом, Елиот Енгел, од Њујорк, изрази загриженост дека санкциите ќе им наштетат на Германија и на европските земји истовремено ослободувајќи ја Русија од одговорност.
Минатиот месец американскиот Стејт департмент соопшти дека ги проширил санкциите против проектот „Северен тек 2“ на фирми што обезбедуваат услуги или средства за надградба или инсталирање опрема на бродови за поставување на гасоводот.
Новото законодавство за санкции прецизира дека претходно донесените санкции се однесуваат на сите активности за поставување цевки и за осигурување.
САД се обидуваа да го блокираат завршувањето на гасоводот сакајќи да го исфрлат од колосек проектот што ќе носи руски природен гас до Германија преку Балтичкото Море. Вашингтон повеќепати ја повикуваше Европа да купува повеќе американски течен природен гас.
Новиот гасовод, дизајниран да го зголеми снабдувањето со гас за Германија и за другите европски држави за 55 милијарди кубни метри годишно, во моментот е при крај во Балтичкото Море.
Русија мораше да испрати свои бродови за поставување на последните километри на трасата откако швајцарско-холандската компанија „Олсиз“ ги повлече своите бродови поради закана од санкции на САД во декември 2019 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Мерц: Русија стои зад дроновите над Германија

Германскиот канцелар Фридрих Мерц изјави дека се сомнева дека Русија стои зад серијата беспилотни летала видени над Германија во текот на викендот, вклучувајќи ги и оние што прекинаа десетици летови и оставија повеќе од 10.000 патници блокирани на аеродромот во Минхен.
Мерц нагласи дека фреквенцијата на вакви упади во европскиот воздушен простор е без преседан, дури и во споредба со Студената војна. Тој додаде дека ниту едно од беспилотните летала досега не било вооружено и дека сите летале за извидувачки цели.
Во последните недели, слични неидентификувани дронови се забележани над неколку европски земји. Во Данска, во последните недели се регистрирани бројни летови на неидентификувани дронови над воени објекти и аеродроми.
На пример, пријавени се летови над аеродромот Каруп и неколку дански аеродроми. Како резултат на тоа, властите привремено ги забранија летовите на цивилни дронови и го зголемија надзорот, а данското разузнавање потврди дека станува збор за „хибридни напади“ за кои ја обвинија Русија.
Сомнителни летови на дронови над воени бази и стратешка инфраструктура се пријавени и во Германија и Белгија. На пример, околу 15 дронови се забележани над белгиската воена база Елзенборн, а во Германија властите истакнуваат дека инцидентите стануваат сè почести, особено во близина на воени и индустриски објекти.
фото: принтскрин
Свет
Пронајдени се најмалку 50 тела по уривањето на училиште во Индонезија

Бројот на жртви од уривањето на училиште во Индонезија се искачи на најмалку 50 откако спасувачите ги отстранија речиси сите урнатини, соопштија денеска спасувачките екипи, нарекувајќи ја оваа најсмртоносната катастрофа во земјата оваа година.
Исламскиот интернат „Ал Хозини“ во индонезискиот град Сидоарџо се урна минатиот понеделник. Стотици, претежно тинејџери, беа затрупани под бетонските урнатини, при што ги изгубија животите.
Со помош на багери, спасувачите отстранија околу 80 проценти од урнатините до доцна во неделата и извлекоа тела и делови од тела на жртви, соопшти агенцијата за ублажување на катастрофи.
Буди Ираван, заменик-директор на агенцијата, рече дека бројот на извлечени тела го зголемува вкупниот број на жртви на 50, и дека се очекува спасувачите да ја завршат потрагата по уште 13 заробени жртви до крајот на понеделник.
„Ова е најголем број жртви оваа година поврзани со една зграда. Од сите катастрофи во 2025 година, природни или не, ниту една не одзела толку многу животи како онаа во Сидоарџо“, рече тој на прес-конференција.
Јуди Брамантјо, официјален претставник на агенцијата за пребарување и спасување, изјави дека се пронајдени уште пет делови од тела, што укажува дека бројот на жртви би можел да биде најмалку 54.
Пребарувањето продолжува, а агенцијата за спасување објави снимки на кои се гледаат работници како носат портокалови вреќи за тела од урнатините на училиштето. Властите соопштија дека уривањето е предизвикано од градежни активности на горните катови што темелите на училиштето не можеле да ги издржат.
фото: принтскрин
Свет
Индија и Кина воведуваат директни летови за прв пат по пет години

Индија и Кина планираат да ги обноват директните летови меѓу некои од нивните градови по петгодишна суспензија, бидејќи односите меѓу двете земји почнуваат да се стабилизираат, објавија индиските власти.
Директните летови меѓу двете земји беа суспендирани за време на пандемијата на коронавирусот во 2020 година и не се обновени бидејќи Пекинг и Њу Делхи се впуштија во долготрајни гранични тензии.
Летовите меѓу одредени градови ќе бидат обновени до крајот на октомври, во зависност од одлуките на комерцијалните авиокомпании, соопшти индиската амбасада во Кина во објава на социјалната мрежа WeChat. Обновувањето на летовите е дел од „пристапот на индиската влада кон постепена нормализација на односите меѓу Индија и Кина“, додаде амбасадата.
Најголемата индиска авиокомпанија, „ИндиГо“, во четврток најави дека ќе ги обнови летовите помеѓу Калкута, Индија, и Гуангжу, Кина, на 26 октомври.
Одлуката доаѓа откако индискиот премиер Нарендра Моди ја посети Кина минатиот месец за прв пат по седум години за да присуствува на регионален безбедносен форум, дел од напорите на двете земји за нормализирање на односите.
Односите меѓу Кина и Индија нагло се влошија во 2020 година откако безбедносните сили се судрија по спорната граница на Хималаите. Четири кинески и 20 индиски војници беа убиени во најлошото насилство во последните децении, со што се замрзнаа контактите на високо ниво на политиката.
фото: принтскрин