Европа
Самит на НАТО во Брисел

Во Брисел денеска се одржува самит на членките на НАТО поради украинската криза. Американскиот претседател Џозеф Бајден ќе се сретне со европските колеги, за да се договори, меѓу другото, зајакнувањето на силите на источното крило на НАТО, со распоредување на четири нови борбени трупи во Бугарија, Унгарија, Романија и Словачка.
Со веќе постоечките борбени единици во Полска и балтичките земји, ова ќе направи вкупно осум мултинационални групи на НАТО на североистокот на алијансата. Лидерите на НАТО, исто така, се очекува да се осврнат на безбедноста на Молдавија и БиХ, за кои се верува дека се загрозени од руското поткопување.
Се очекува и НАТО да ја повика Белорусија да стави крај на соучесништвото во војната во Украина.
Пред денешниот самит на лидерите на НАТО во Брисел, генералниот секретар на НАТО Јенс Столтенберг предупреди на однесувањето на Кина во светлината на руската инвазија на Украина и рече дека лидерите на НАТО ќе го повикаат Пекинг да се воздржи од поддршката на руските воени активности како членка на Советот за безбедност на ОН и да му се придружи на остатокот од светот во повикот за моментален мирен крај на војната.
Столтенберг забележа дека одлуките донесени утре од лидерите на НАТО ќе имаат долгорочни импликации со цел да се зајакне безбедноста, што ќе бара значителни трошоци за одбраната.
„ Очекувам сојузниците да одлучат да ги удвојат своите распределби. Имаме нова ситуација кога гледаме дека не можеме да го земеме мирот здраво за готово“, рече Столтенберг.
Тој го повтори фактот дека Европа и Северна Америка се обединети во спротивставувањето на руската агресија, поддршката на Украина и заштитата на сите сојузници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Москва порача: Подготвени сме за директни преговори, чекаме Киев да се јави

Москва чека сигнал од Киев за продолжување на директните преговори, изјави портпаролот на Кремљ, Дмитриј Песков, објави „Киев пост“.
Сигнал за подготвеноста на Украина да продолжи со директните преговори со Русија мора да дојде од Киев, изјави Песков пред новинарите, одговарајќи на прашање од агенцијата ТАСС.
„Сигналот мора да дојде од Киев. Тие барем треба да преземат некаков чекор во таа насока. Сè уште постои законска забрана за тоа. Досега не видовме никакви конкретни дејствија“, рече Песков, одговарајќи на прашањето дали Русија очекува сигнал од Вашингтон или директно од Киев.
Русија и САД делат многу точки на контакт во своите позиции за Украина, но е прерано да се зборува за какви било конкретни услови од договорот, изјави вчера портпаролот на Кремљ, Дмитриј Песков, пренесува Анадолија.
„Постојат многу позиции кои навистина се совпаѓаат со нашите“, рече Песков, нагласувајќи дека иако напорите за решавање на украинскиот конфликт се во тек, сè уште не е можно да се зборува за конкретни услови.
Тој додаде дека преговорите не можат да се водат јавно, сигнализирајќи дека разговорите се водат зад затворени врати.
Песков, исто така, нагласи дека ставовите на американскиот претседател Доналд Трамп за Украина се преклопуваат со руските во многу аспекти.
Европа
Главниот соработник на Марин Ле Пен најави претседателска кандидатура

Претседателот на француската десничарска партија Национален собир, Жордан Бардел, потврди дека ќе се кандидира на претседателските избори во Франција во 2027 година доколку неговата менторка Марин Ле Пен, трикратниот кандидат и фаворит, чии амбиции се загрозени од пресудата за измама, биде спречена да се кандидира.
„Јасно е дека Марин Ле Пен е мој кандидат, но ако утре ѝ биде забрането да се кандидира, мислам дека можам да ви кажам дека јас би бил нејзин кандидат“, рече Бардел во интервју за францускиот „Ле Паризиен“.
Бардел, 29-годишниот претседател на групата „Патриоти за Европа“ во Европскиот парламент, долго време се сметаше за наследник во Национален собир, но досега не призна отворено дека е подготвен да се вклучи во претседателската трка доколку е потребно.
Тој се појави како најочигледен кандидат на најголемата крајно десничарска партија во Франција за изборите во 2027 година откако Ле Пен беше прогласена за виновна за проневера и веднаш казнета со петгодишна забрана за кандидирање за јавни функции.
Европа
Премиерот на Украина: Помошта што веќе ја обезбедија САД нема да биде дел од договорот за минерали

Украина постигна договор дека претходната американска помош дадена на Киев нема да биде дел од договорот за минерали што има намера да го потпише со Вашингтон, изјави вчера украинскиот премиер Денис Шмихал.
„Постигнат е договор документот да не ја земе предвид помошта што беше дадена пред неговото потпишување“, рече Шмихал во објава на „Телеграм“.
Шмихал, кој минатата недела беше во САД за пролетните состаноци на Меѓународниот монетарен фонд и Светската банка, изјави дека е постигнат добар напредок во договорот по состанокот со американскиот секретар за финансии, Скот Бесент.
„Најважно е што јасно ги дефиниравме нашите црвени линии, договорот мора да биде во согласност со европските обврски и не смее да биде во спротивност со Уставот и законодавството на Украина“, рече тој и додаде дека правни тимови работат на документот.
Американскиот советник за национална безбедност, Мајк Валц, вчера изјави дека ќе биде постигнат договор. Двете страни потпишаа меморандум на 18 април како прв чекор кон постигнување договор за развој на минералните ресурси во Украина, договор промовиран од американскиот претседател Доналд Трамп.
Иако двете страни беа подготвени да потпишат договор за соработка во областа на природните ресурси во февруари, тој беше одложен по судирот во Овалната соба меѓу Трамп и украинскиот лидер Володимир Зеленски.