Свет
Сведоштво на Украинка: Русите ми ги ставаа рацете во жешка вода, ноктите ми ги вадea, бев жив мртовец
На Украинците заробени во Херсон рацете им ги ставале во врела вода, ноктите им ги ваделе, а гениталиите им ги приклучувале на струја, покажуваат новите извештаи за систематското мачење за време на руската окупација. Главниот обвинител за воени злосторства во Киев, Јуриј Белоусов, вели дека се добиени повеќе од 50.000 пријави за воени злосторства, од кои околу 7.700 се од Херсон и околниот регион, пишува „Телеграф“.
Инспекторите открија 10 локации во областа околу Херсон кои Русија ги користела за приведување и мачење Украинци. Неколкуте жители кои останаа во Херсон за време на речиси деветмесечната окупација претрпеа полициски час, недостиг на храна, партизанска војна и брутална кампања да се принудат да станат руски државјани.
Серијата интервјуа објавени од новинската агенција „Ројтерс“ укажуваат на маките и страдањата на оние кои се изложени на најлош третман од страна на московските сили. Оксана Миненко (44), сметководителка која живеела во Херсон, постојано била приведувана и мачена од руските војници.
Таа го загуби својот сопруг, украински војник, кој загина на првиот ден од руската инвазија бранејќи го градот Антоновски мост. Иако нејзиниот сопруг починал, Миненко била подложена на брутално испрашување додека Русите се обидувале да извлечат детали за украинската војска.
„Една болка доведе до друга“, рече Миненко, опишувајќи како Русите ѝ ги потопувале рацете во врела вода, ѝ ги ваделе ноктите и ја тепале. Оваа 44-годишна жена била толку тешко повредена што морала да направи пластична операција и имала среќа да не го изгуби окото.
„Бев жив леш“, им рече таа на новинарите во импровизираниот центар за хуманитарна помош.
Андриј Коваленко, главен обвинител за воени злосторства на регионот Херсон, рече дека „ова е направено систематски и исцрпно“ за да се извлечат информации за украинската војска. Коваленко (35) бил подложен на исцрпувачки петдневен притвор во август минатата година, изјави тој за „Ројтерс“.
Русите го принудиле да се соблече и му давале електрошокови на гениталиите и ушите.
„ Тоа е како топка да ви лета во главата и да се онесвестите“, рече Коваленко, додавајќи дека мачители го испрашувале за воените дејствија на Украина и складирањето оружје и експлозиви, сомневајќи се дека е член на партизанското движење на отпорот.
Инспекторите откриле еден од најголемите објекти за притвор во областа во внатрешноста на владината зграда. Според украинските власти, се знае дека повеќе од 30 лица биле држени во една соба во подрумот. На ѕидот биле врежани пораки од жртвите, а на една пишувало: „ Живеам за неа“. Десетина жители на Херсон тврдеа дека биле држени во друг објект, кој се користел за тортура и испрашување, полициска зграда која локалното население ја нарекува „дупка“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Драма во Кина: напад со нож во болница, има загинати и повредени
Во напад на болница во југозападна Кина, повеќе од десет лица се убиени или ранети, јавуваат државните медиуми, кои не ја прецизираат природата на нападот.
„Инцидентот се случил во локалната болница во 13:20 часот по локално време“, соопшти државната новинска агенција „Ксинхуа“.
Нападот се случил во округот Женгксионг во североисточниот дел на југозападната провинција Јунан и истрагата е во тек.
Масовните насилни злосторства се ретки во Кина, која строго им забранува на граѓаните да поседуваат огнено оружје.
Свет
Сафади: Со бомбардирањето на Рафах, Нетанјаху го загрозува примирјето
Јорданскиот министер за надворешни работи Ајман Сафади го обвини израелскиот премиер Бенјамин Нетанјаху дека го загрозил постигнувањето на договорот за прекин на огнот меѓу Израел и Хамас со бомбардирањето на градот Рафах на југот на Појасот Газа. „Направени се огромни напори за да се постигне договор со кој ќе се ослободат заложниците и ќе се постигне прекин на огнот. Хамас го претстави предлогот.
„Ако Нетанјаху навистина сакаше договор, сериозно ќе преговараше за тоа. Наместо тоа, тој се заканува на договорот со бомбардирање на Рафах“, рече Сафади на социјалната мрежа Икс, а пренесе Ројтерс. Вчера Хамас објави дека го прифатил предлогот за прекин на огнот во Газа предложен од Египет и Катар.
Таа палестинска милитантна група во соопштение наведе дека нејзиниот шеф, Исмаил Ханије ги известил премиерот на Катар, Мухамед Бин Абдулрахман Бин Џасим Ал Тани и шефот на египетската разузнавачка служба Абас Камел дека го прифаќа нивниот предлог.
Набргу по објавувањето на Хамас, „Тајмс оф Израел“ објави изјави од неименувани израелски претставници, кои рекоа дека најавата на Хамас не се зема предвид, бидејќи предлогот со кој се согласи Хамас не ги вклучува условите со кои се согласи Израел.
Израелскиот воен кабинет синоќа едногласно одлучи да ја спроведе планираната операција во градот Рафах во јужниот дел на Појасот Газа, со цел „да се изврши воен притисок врз Хамас“, соопштија од кабинетот на премиерот на Израел Бенјамин Нетанјаху и покрај тоа што Хамас претходно објави дека се согласува со египетско-катарскиот предлог за прекин на огнот, пренесува Танјуг.
Свет
Амбасадорите на ЕУ и САД во Москва нема да присуствуваат на инаугурацијата на Путин
Амбасадорите на Европската Унија и Соединетите Американски Држави во Москва нема да присуствуваат на церемонијата на инаугурација на рускиот претседател Владимир Путин.
Портпаролот на ЕУ Петер Стано рече дека оваа одлука е во согласност со ставот на мнозинството земји-членки на блокот.
„Нашиот амбасадор нема да присуствува, повеќето земји-членки нема да присуствуваат“, рече Стано, а пренесе Ројтерс.
Портпаролот на Стејт департментот Метју Милер изјави дека американскиот амбасадор во Москва нема да присуствува на инаугурацијата на рускиот претседател.
Ројтерс вчера објави дека францускиот амбасадор во Русија ќе присуствува на инаугурацијата, за разлика од Германија која нема да испрати свој претставник.
Неименуван извор за агенцијата изјавил дека Париз претходно го осудил „контекстот на репресијата во кој се одржаа изборите, лишувајќи ги гласачите од вистински избор“, како и организирањето избори на украинските територии „окупирани“ од Русија, за кои Франција смета дека има прекршување на меѓународното право и повелбата на Обединетите нации.
Германија најави дека нема да испрати свој претставник на инаугурацијата на Путин.
Балтичките земји, кои веќе немаат дипломатски претставници во Москва, исто така категорично ја отфрлија можноста да присуствуваат на инаугурацијата на Путин.
Денеска ќе се одржи инаугурацијата на рускиот претседател Владимир Путин, со што и официјално ќе започне неговиот петти шестгодишен мандат.
Путин на претседателските избори во март освои 87,28 отсто од гласовите.