Свет
Светска банка ја суспендирa помошта за Судан по државниот удар

Светската банка ја суспендираше помошта за Судан, откако во понеделникот беше извршен државен удар во таа земја.
Земјата, по изолацијата од меѓународните системи за финансирање во текот на тридецениската автократија на автократот Омар ал-Башир, постигна договор со Светската банка во март и доби пристап до помош во износ од две милијарди долари.
„Многу сум загрижен поради неодамнешните настани во Судан и се плашам од драматичното влијание врз социјалното и економското закрепнување и развој на земјата“, рече претседателот на Светска банка, Дејвид Малпас, во изјавата.
Африканската унија претходно го суспендираше членството на Судан поради, како што се наведува, неуставно преземање на власта, додека САД замрзнаа 700 милиони долари помош за таа земја.
Според медиумите во светот, ненадејниот прекин на приливот на финансиска помош најверојатно ќе донесе тешки последици за нарушената економија на Судан во време кога земјата штотуку почна да застанува на нозе.
Во Судан, цивилните и воените лидери ја поделија власта во последните две години по соборувањето на Омар ал Башир.
Воениот удар и преземањето на власта дојдоа по неколкунеделни тензии меѓу воените и цивилните претставници околу темпото на транзицијата на Судан кон демократија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Од топлотен бран до бури: силно невреме во Солун и на Халкидик

Силното невреме што го погоди Солун во четвртокот наутро предизвика проблеми кај населението.
Обилните дождови ги претворија главните патишта во реки, а локалните извештаи покажуваат дека шахтите пукнале под притисокот на водата, објавува „Товима“.
Πλημμύρισε το κέντρο της Θεσσαλονίκης και οι δρόμοι γύρω από το Βαρδάρη#tanea #taneagr #news #rain #βροχη #kairos #καιρος #weather #thessaloniki #skg #viral #summer #fyp pic.twitter.com/eYTi1EDe7y
— TA NEA (@ta_nea) July 31, 2025
Мотоциклист е повреден кога изгубил контрола на лизгава улица во центарот на градот, поточно на прометната авенија Цимиски.
Според анализите на феноменот преку страницата Weather Analysis на „Фејсбук“, за помалку од еден час се забележани 37 литри дожд на квадратен метар, количина што одговара на просечните вкупни врнежи од дожд за цел јули, пренесува медиумот.
Службите за цивилна заштита се во состојба на готовност бидејќи слични временски услови се очекуваат и во наредните денови според прогнозите, објавува grtimes.gr.
Обилни врнежи од дожд се регистрирани во Солун, на Халкидик и во Кукуш, како и на планинските делови во Епир, Тесалија, Спорадиските Острови и во некои делови од Тракија.
Фото: принтскрин
Свет
Иран: САД мора да ни ја надоместат штетата

САД мора да ја надоместат штетата предизвикана на Иран за време на минатомесечната војна, објави „Фајненшл тајмс“ цитирајќи го министерот за надворешни работи на Иран откога Техеран зазеде построг став и постави нови услови за продолжување на нуклеарните разговори со администрацијата на американскиот претседател, Доналд Трамп.
„Тие треба да објаснат зошто нè нападнаа во средината на преговорите и мора да се осигури дека нема да го сторат тоа повторно (во идните разговори). И мора да ја поправат штетата што ја предизвикаа“, изјави иранскиот министер за надворешни работи, Абас Арагчи, за „Фајненшл тајмс“ во интервју во Техеран.
„Фајненшл тајмс“ објави дека Арагчи и специјалниот американски пратеник Стив Виткоф размениле пораки за време и по војната, при што иранскиот функционер му ја нагласил на својот американски колега потребата од заемно корисно решение за да се стави крај на долготрајниот застој во врска со нуклеарната програма на Иран.
Главниот нуклеарен преговарач на Иран рече дека на Иран му се потребни вистински мерки за градење доверба од своја страна откога Виткоф предложи продолжување на разговорите. Тој рече дека ова треба да вклучува финансиска компензација, без да даде детали, како и гаранции дека Иран нема повторно да биде нападнат за време на разговорите, според „Фајненшл тајмс“.
Соединетите Американски Држави ги нападнаа иранските нуклеарни објекти во јуни за кои Вашингтон вели дека се дел од програмата за нуклеарно оружје. Техеран вели дека неговата нуклеарна програма е само за цивилни цели.
Фото: принтскрин
Свет
Трамп: Пропаднатиот поранешен претседател на Русија треба да биде внимателен што зборува

Американскиот претседател Доналд Трамп објави дека планира да воведе царини од 25 проценти за производи од Индија. Тој ја обвини таа земја за, како што тврди, превисоки царини и блиски односи со Русија.
Тој објасни дека новите царини за индискиот извоз во САД ќе стапат во сила на 1 август заедно со дополнителни казнени мерки поврзани со купувањето руска нафта и оружје.
Сегашната царинска стапка за индиските производи во САД е десет проценти. Трамп ја нарече Индија земја со најсложени и најнезгодни немонетарни трговски бариери во светот. Набргу објави на својата социјална мрежа „Тру соушал“, каде што рече дека не го интересира што прави Индија со Русија и дека САД и Русија речиси никогаш не соработуваат заедно.
„Нивните царини се меѓу највисоките во светот. Ако сакаат да соработуваат со Русија, нека го прават тоа, но нека бидат внимателни бидејќи влегуваат во многу опасна зона“, рече Трамп.
Тој конкретно се осврна на Дмитриј Медведев кого го нарече пропаднат поранешен претседател на Русија велејќи дека мора да внимава што зборува.
Трамп објави дека ќе воведе царини за Москва во рок од десет дена ако Кремљ не се согласи да ја запре војната во Украина дотогаш. Медведев, сегашниот заменик-претседател на Рускиот совет за безбедност, остро реагира на објавата.
„Се игра со ултиматумот со Русија – 50 дена или десет. Треба да запомните две работи – прво, Русија не е Израел, и второ, секоја нова закана е чекор кон војна. И не само со Украина, туку и со САД. Не повторувајте ги грешките на Поспаниот Џо“, напиша Медведев на X.
Фото: принтскрин