Русија би можела да користи нови системи за оружје во Украина доколку Киев ја нападне Русија со американски ракети со долг дострел, изјави денеска Вјачеслав Володин, заменик и сојузник на рускиот претседател Владимир Путин.

Володин, претседателот на Долниот дом на парламентот, не даде дополнителни детали за кои нови системи за оружје станува збор, но рече дека Украина веќе ја напаѓа Русија користејќи ракети со долг дострел, пренесе Ројтерс.

Сепак, тој во изјавата наведе дека проширувањето на нивната употреба целосно ќе ги уништи руско-американските односи.

Според пишувањето на „Њујорк тајмс“ и изјавите на Ројтерс и некои други медиуми, администрацијата на американскиот претседател во заминување Џозеф Бајден во неделата одобрила Украина да користи крстосувачки ракети со долг дострел ATACMS за напади длабоко на руска територија, пренесува Танјуг.

Севернокорејскиот лидер Ким Џонг-ун ја повика армијата на неговата земја да ги фокусира сите напори на завршување на воените подготовки, објави државната новинска агенција КЦНА, пренесува Хина.

КЦНА објави дека Ким го опишал Корејскиот полуостров како „најголемото жариште на светот“ во говорот пред командантите на баталјоните во Пјонгјанг.

Ким, исто така, ги обвини САД и Јужна Кореја дека ги доведоа тензиите на полуостровот „до најлошата фаза во историјата“, пренесе КЦНА, пренесува „Ал Џезира“.

Во саботата, „Фајненшл тајмс“ објави, повикувајќи се на извори, дека Северна Кореја сега ја поддржува Русија во нејзината војна против Украина не само со испраќање војници и муниција, туку и тешка артилерија.

Според извештајот на британскиот весник, околу 50 самоодни хаубици M1989 Koksan и речиси 20 повеќецевни ракетни фрлачи, произведени во Северна Кореја, пристигнале во Русија во последните недели.

Американскиот Стејт департмент неодамна утврди дека илјадници севернокорејски војници активно се борат заедно со руските сили во пограничниот регион кај Курск, каде што се ангажирани против украинските трупи.

Извештаите на јужнокорејското разузнавање дополнително покажуваат дека Северна Кореја распоредила повеќе од 10.000 војници во Русија, заедно со снабдување на руските сили со артилериска муниција.

Растечката воена соработка меѓу двете земји е зацементирана со неодамна потпишаниот договор кој вклучува меѓусебен одбранбен сојуз, пренесуваат светските медиуми.

Најмалку осум лица загинаа на Филипините во тајфунот Ман-Ји, шестата голема тропска бура што го погоди архипелагот за еден месец, соопштија официјални лица.

Метеоролошката служба објави дека Ман-Ји, првично категоризиран како супер тајфун, ослабнал до силна тропска бура со максимални ветришта од 110 километри на час и налети до 135 километри на час додека се оддалечувал од Филипините.

Повеќе од 685.000 луѓе беа принудени да ги напуштат своите домови во североисточните провинции откако властите предупредија на потенцијално опасна за животот ситуација предизвикана од Ман-Ји, локално познат како Пепито.

Тајфунот собори дрвја и столбови за струја, однесе покриви, урна куќи направени од слаб материјал и предизвика поплави и бури, кои ги однесоа патиштата во крајбрежните заедници. Седум лица загинаа во лизгање на земјиштето во градот Амбагио во провинцијата Нуева Вискаја северно од Манила, соопштија властите за катастрофи.

Ман-Ји првпат падна на копното во источната провинција Катандуанес во саботата.

„Иако Пепито беше силен, ударот не беше толку лош како што се плашевме“, изјави за новинарите претседателот Фердинанд Маркос Јуниор.