Свет
Се огласи од затвор монструмот од Австрија, кој ја држеше ќерката во ропство и ѝ направи седум деца: Сакам да живеам 130 години

Сексуалниот престапник Јозеф Фрицл (87) првпат проговори за својот сон за слобода и во интервју изјави дека мисли оти неговото семејство ќе му прости за злосторствата и верува дека повторно ќе се соедини со нив.
Фрицл за „Сан“ изјави дека секогаш мисли на своето семејство и дека е обожавател на кралот Чарлс и дека го гледал на телевизија неговото крунисување.
Во шокантно интервју зад решетки австрискиот силувач рече дека сака да живее 130 години. Тој нагласи дека секој ден вежба за да биде фит кога ќе биде ослободен и ќе биде со семејството, кое го криел 24 години. Опишувајќи ја својата строга диета и план за вежбање, тој рече дека секој ден го почнува со кафе.
„Морам да го имам ова за да се разбудам правилно, а потоа набргу со шолја топло какао. Потоа пијам чај и јадам три јајца, парче тост со шунка и колбаси и сирење. Земам и витамин Ц, како и магнезиум и цинк“, рече тој.
Фрицл, за кој се верува дека боледува од деменција, рече дека пие и многу вода во текот на денот.
„Неодамна прочитав дека научно е докажано оти луѓето може да доживеат 150 години ако се хранат и вежбаат правилно. Сакам да живеам 130 години, тоа е мојот план“, рече тој.
Фрицл беше осуден на доживотен затвор во 2009 година по обвинувањето за силување, ропство и убиство затоа што ја држел својата ќерка затворена и ја силувал 24 години во Австрија. Ја држел својата ќерка Елизабет затворена во ќелија во семејната куќа во Амштетен, ја силувал и со неа имал седум деца.
Едно бебе починало во 1996 година бидејќи Фрицл одбил да му даде медицинска нега. Три деца останаа во ќелијата додека Фрицл преостанатите три ги одгледа со сопругата Розмари (84). Се развела од него кога дознала за ужасните злосторства.
Тој исто така верува дека има повеќе вонбрачни деца во странство бидејќи одел на службени патувања. Од австрискиот затвор во Кремс, Фрицл зборуваше за „Сан“ преку својот адвокат.
„Многу ми недостига семејството. Секогаш мислам на нив и многу би сакал да ги видам моите внуци. Сигурен сум дека еден ден повторно ќе бидеме заедно и мислам дека ќе ми простат за она што го направив“, рекол Фрицл.
Тој додал дека многу му е жал за тоа што го направил и се кае за своите злосторства. Не се шета низ затворскиот двор бидејќи има неколку затвореници што чекаат да го претепаат. Во јуни 2022 година судот пресуди дека Фрицл мора да остане во затвор со висок степен на обезбедување откако судијата ги откри плановите да го префрлат во полесен затвор.
Неговиот случај привлече меѓународно внимание во 2008 година кога Елизабет ѝ кажа на полицијата дека татко ѝ насилник ја држел заробена со години.
Тој ја намамил ќерката Елизабет во ќелија во семејната куќа во 1984 година кога имала 18 години. Тој ѝ рекол на својата сопруга Розмари дека Елизабет побегнала и се приклучила на култ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Вознемирувачко фото+видео) Пукање среде ден во Лавов, убиен Андриј Парубиј, херојот на Евромајдан

Поранешениот претседател на Врховната рада и една од клучните фигури на револуцијата на Евромајдан, Андриј Парубиј беше убиен со огнено оружје во својот роден град Лавов.
Националната полиција соопшти дека пукотници одекнале околу пладне во јужниот дел на градот, во округот Франкивски. Жртвата починала на лице место, и покрај брзата реакција на службите за итна помош.
Првите информации беа потврдени од пратеничката Ирина Херашченко, која за „Киев Индепендент“ изјави дека убиениот политичар е токму Парубиј.
Неколку часа подоцна, украинскиот претседател Володимир Зеленски соопшти:
„Министерот за внатрешни работи и главниот државен обвинител ме информираа за првите околности на страшното убиство. Убиен е Андриј Парубиј. Изразувам длабоко сочувство до неговото семејство и најблиските“.
Зеленски додаде дека сите потребни ресурси се вклучени во истрагата и во потрагата по сторителот. Засега, властите не соопштуваат детали за можни осомничени или за мотивот на злосторството.
Парубиј важеше за еден од симболите на отпорот и демократските промени во Украина, особено по неговата улога во протестите на Евромајдан и неговото политичко лидерство во најкритичните години на државата.
Случајот предизвика силни реакции низ цела Украина, со бројни пораки на осуда и повици за брзо расветлување на убиството.
Регион
Српската туристка која исчезна додека пливала кај Солун е пронајдена мртва

Жена (76) од Србија, која се водеше како исчезната од синоќа во близина на Солун, е пронајдена мртва утрово кратко по 8 часот, во морскиот регион, јавува „Прототема“, пренесува „Танјуг“.
Грчката крајбрежна стража вчеравечер ја започна потрага по исчезната пливачка во близина на градот Агиа Триада, во близина на Солун.
Порталот „Прототема“ објавија дека жената отишла на пливање со двајца пријатели, а крајбрежната стража била известена за нејзиното исчезнување околу 21:30 часот по локално време.
Во спасувачката операција учествувале два брода на крајбрежната стража, брод во близина и рибарски чамец. На барање на крајбрежната стража беше мобилизиран и грчки спасувачки тим, кој пристигнал за да помогне, заедно со екипаж од четири члена волонтери и спасувачкиот брод „Один“.
Спасувачките екипи продолжуваат со пребарување на околуниот дел од морскиот брег и отвореното море во надеж дека ќе ја најдат исчезнатата туристка жива и здрава.
Свет
Турција целосно ја прекинува трговијата со Израел по геноцидот во Газа

Министерот за надворешни работи на Турција, Хакан Фидан, денеска објави дека неговата земја целосно ги прекинува сите трговски односи со Израел и го затвора својот воздушен простор за израелските авиони, како одговор на настаните во Појасот Газа.
„Целосно ја прекинавме трговијата со Израел. Ги затворивме нашите пристаништа за израелските бродови. Не им дозволуваме на турските бродови да пловат кон израелски пристаништа. Турција не им дозволува на контејнерските бродови што пренесуваат оружје и муниција за Израел да пловат кон нашите пристаништа, ниту пак дозволуваме авиони да летаат во нашиот воздушен простор“, изјави Фидан на парламентарна седница во Анкара.
Според турскиот министер, мерките се дел од сеопфатен пакет дипломатски, правни и економски постапки воведени поради конфликтот во Газа. Турција постојано ја означува војната како „геноцид“.
Според податоците од палестинското Министерство за здравство, повеќе од 62.000 Палестинци загинале во конфликтот, а Турција претходно најави ограничување на трговијата со Израел, која не се одвивала од мај 2024 година. Во 2023 година, трговијата меѓу двете земји изнесувала седум милијарди долари, според Турскиот институт за статистика.
Анкара истакнува дека со овие мерки испраќа силна порака и се придржува до меѓународното право, додека целата ситуација се смета за најостра дипломатска постапка против Израел од страна на која било друга земја досега.