Свет
СЗО: Годишните времиња не влијаат на преносот на коронавирусот

Годишните времиња не влијаат на развојот на пандемијата на коронавирусот, соопшти денеска Светската здравствена организација и предупреди дека е погрешно да се верува оти налето сме позаштитени.
„Се чини дека годишните времиња не влијаат на преносот на вирусот, кој усмрти над 650.000 луѓе во светот и зарази повеќе од 16 милиони луѓе“, изјави портпаролката на организацијата, Маргарет Харис.
Како пример таа ги наведе најпогодената земја во светот, САД, каде што сега е лето, и втората најпогодена земја – Бразил, каде што е зима.
„Изгледа дека долго се задржа верувањето оти вирусот е сезонски, но мораме да запаметиме дека се работи за нов вирус и иако се работи за респираторен, кој обично е сезонски, овој се однесува поинаку“, нагласила Харис.
Таа потсети на верувањето дека ризикот од инфекција е помал во лето и повтори дека летото е проблем затоа што вирусот ги сака сите сезони.
Нагласи дека комбинацијата на вирусот на грип, кој е сезонски и преовладува во зима, и новиот коронавирус е загрижувачка и може да го зголеми притисокот врз здравствените системи.
„Препорачуваме сите да се вакцинираат против грип“, советува таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел тврди дека ги соборил сите ирански дронови: „Ова е само почеток на одмаздата“

Израелските медиуми објавија дека сите ирански дронови лансирани кон Израел се успешно пресретнати. Командата за цивилна заштита, која издава упатства за засолниште, објави дека граѓаните повеќе не мора да остануваат во близина на засолништата, но сепак се повикуваат да бидат внимателни.
Нападот со беспилотни летала се смета за почеток на иранска одмазда, како одговор на серијата израелски напади во текот на ноќта. Според израелската војска, Иран лансирал повеќе од 100 беспилотни летала, а постои загриженост дека ова би можело да биде само првиот бран од поширок одговор, вклучително и ракетни напади, насочени кон совладување на израелската воздушна одбрана.
Дописникот на Би-би-си истакнува дека времето на оваа ескалација е особено значајно бидејќи американските и иранските претставници требаше да се сретнат во недела за да се обидат да најдат дипломатско решение за кризата околу нуклеарната програма на Иран. Сепак, утрово имаше индикации од Иран дека Техеран нема да учествува во разговорите.
Израелските власти веќе некое време тврдат дека постои добра можност за напад. Иранската воздушна одбрана беше сериозно оштетена во минатогодишните израелски напади, а проиранските групи во регионот, особено Хезболах во Либан, исто така беа ослабени. Израелски извори со месеци алудираа на можна воена акција.
Вечерва тоа се случи: нападот беше насочен кон нуклеарни објекти, воени бази, системи за воздушна одбрана, високи офицери и научници. Иако првиот бран ирански беспилотни летала за одмазда е соборен, речиси е сигурно дека Иран нема да застане тука.
Свет
Пристигна првата реакција на Кина на израелскиот напад врз Иран

Кина изрази длабока загриженост поради нападот на Израел врз Иран, предупредувајќи за можните сериозни последици што конфликтот би можел да ги предизвика во регионот.
„Кина се спротивставува на какво било кршење на суверенитетот, безбедноста и територијалниот интегритет на Иран, како и на дејствија што дополнително ги влошуваат тензиите или го прошируваат конфликтот“, изјави портпаролот на кинеското Министерство за надворешни работи, Лин Џиан.
„Ненадејното повторно оживување на тензиите на Блискиот Исток не е во интерес на ниту една страна. Кина ги повикува сите вклучени страни да дејствуваат во насока на мир и стабилност и да избегнат понатамошна ескалација“, додаде тој, нагласувајќи дека Пекинг е подготвен да игра конструктивна улога во смирувањето на ситуацијата.
Кина е еден од клучните економски и политички партнери на Иран, негов најголем купувач на нафта и постојан критичар на санкциите на САД.
Свет
Иран бара итна седница на Советот за безбедност на ОН

Иран побара итна седница на Советот за безбедност на Обединетите нации за да се разговара за израелските напади на терен, соопшти иранската мисија во ОН за CNN.
Во утринскиот израелски напад врз висока локација во Иран, убиени се бројни команданти, научници и цивили, објави иранска агенција.
Израелските одбранбени сили (ИДФ) претходно објавија дека од Иран кон Израел биле лансирани над 100 беспилотни летала и дека израелските воздухопловни сили (ИРА) ги пресретнале.
Владата на Иран објави дека израелскиот напад врз таа земја, во кој биле убиени неколку ирански генерали, научници и граѓани, докажал дека „нелегитимниот режим“ не почитува никакви меѓународни правила или закон.