Тифани Слетон успеала да преживее 24 дена сама, изгубена и со минимална опрема, движејќи се низ планините Сиера Невада во Калифорнија, откако она што требаше да биде тридневно соло кампување се претвори во тежок потфат кој за малку ќе и го одземеше животот.

Таа се соочила со неповолни временски услови, лавина и сериозен пад што ја онесвестил и и ја повредил ногата, а властите велат дека е чудо што преживеала.

Тифани тргнала на патување на 20 април за да ги истражи езерата Шавер и Хантингтон во округот Фресно, но нејзините загрижени родители ја пријавиле за исчезната на 29 април, откако таа не се слушнала со нив девет дена. Спасувачите започнаа опсежна потрага по Тифани од 6 до 10 мај низ Националната шума Сиера, но не најдоа никаква трага.

Жителката на Џорџија, конечно беше пронајдена еден ден пред нејзиниот 28-ми роденден, на околу 40 километри во одморалиштето Вермилион Вали. Кога сопственикот на одморалиштето конечно ја пронашол минатата среда, властите сфатиле дека таа издржала 13 снежни бури и се искачила на 3.300 метри надморска височина.

„Водев дневник за да останам разумна“

Ослабела 4,5 килограми и останала без шатор, вреќа за спиење и велосипед, само со запалка, нож и неколку грицки. Сега 28-годишната девојка откри што презела за да остане жива.

Не долго откако започнало патувањето, Тифани паднала од карпа и не можела да стигне до главната патека поради недамнешната лавина. Таа тврди дека била во несвест околу два часа и морала да ја имобилизира едната нога и да и го врати другото колено на своето место.

Сите пет нејзини очајни повици до 911 не успеале, па решила да оди пеш до најблискиот Старбакс, оддалечен околу 18 километри, откако ГПС-от проработел.

„Завршив на ова многу долго, напорно патување што го запишав во мојот дневник за да останам здрава и конечно да успеам да допрам до цивилизација“, рече таа.

„Најлошото нешто што можете да го направите во итен случај е да паничите“

Тифани, патувачки техничар за дијализа, рече дека нејзините вештини и помогнале да најде храна во дивината и што е најважно, да остане смирена.

Водела дневник, собирала праз за јадење, за кој знаела дека е од околината, пиела стопен снег и правела чај од манзанита и борови иглички.

„Најлошото нешто што можете да го направите во итен случај е паниката“, рече таа.

Во последната етапа од своето патување, Тифани успеала да се искачи на врв од 2.700 метри кој бил покриен со 3,6 метри снег, што ја довело на безбедно. На прв поглед таа рече дека мислела оти халуцинира и мислела дека успеала да стигне до Северниот пол.

„Навистина имам нова вера во човештвото“

Ја пронашол Кристофер Гутиерез кој за среќа успеал да стигне до колибата откако плуговите тој ден ги расчистиле патиштата.

„Тоа беше тринаесеттата силна снежна бура низ која сум поминала и треба да биде последна“, вели Тифани.

„Да не дојдеше тој ден, таму ќе го најдеа моето тело“, додаде таа. Кристофер се сети и на моментот кога ја пронашол.

„Таа се појави, не кажа ниту збор, само истрча и се што сакаше беше прегратка. Тоа беше прилично надреален момент. И тогаш знаев. Тогаш сфатив за кого се работи“, рекол тој.

„Навистина имам нова вера во човештвото“, продолжи Тифани.

Шерифот на округот Фресно, Џон Занони, исто така, на прес-конференција рече дека нејзината приказна е она од кое што се прави филм.

„Никогаш во моите најлуди соништа не очекував дека ќе успее да стигне толку далеку“, додаде тој. „Тоа е навистина неверојатна приказна за истрајност, решителност и опстанок“, заклучил тој.

Папата Лав XIV апелира до Израел да дозволи хуманитарна помош во Газа нарекувајќи ја ситуацијата во палестинската енклава „сè позагрижувачка и тажна“.

„Го повторувам мојот апел да се дозволи влегување чесна хуманитарна помош и да се стави крај на борбите за кои децата, старите лица и болните плаќаат катастрофална цена“, рече папата на својата прва неделна аудиенција на плоштадот Свети Петар.

Тој ја спомена ситуацијата во Газа во неколку наврати во првите недели од својот понтификат.

Папата, за кого американскиот претседател Доналд Трамп во понеделник изјави дека изразил интерес да биде домаќин на мировни преговори меѓу Русија и Украина, не го спомена конфликтот, според „Ројтерс“.

Во својата прва неделна порака на 11 мај новиот папа повика на итен прекин на огнот и ослободување на сите израелски заложници што ги држи милитантната група Хамас.

Израел во понеделникот соопшти дека ќе дозволи влез на помош во Газа по 11-неделната блокада на крајбрежната енклава, но Обединетите нации во вторникот соопштија дека не е дистрибуирана никаква помош.

Апелот на папата дојде еден ден откако британскиот премиер Кир Стармер објави дека неговата влада ги прекинала разговорите за слободна трговија со Израел и го повика израелскиот амбасадор во Велика Британија на разговори за ситуацијата во Газа.

Израел вели дека има намера да ги интензивира воените операции против Хамас и да ја преземе контролата врз цела Газа, уништена од израелските воздушни и копнени напади по прекуграничната инвазија на Хамас во израелските населби во октомври 2023 година.

Израел соопшти дека дел од целта на блокадата е да се спречат палестинските милитанти да ја пренасочуваат и киднапираат хуманитарната помош. Сепак, Хамас негира дека го сторил тоа.

Високата претставничка за надворешна политика, Каја Калас, објави дека ЕУ подготвува договор вреден 5,5 милиони евра со Европската фондација за демократија за поддршка на работата на Радио Слободна Европа.

Синоќа, по состанокот на Советот за надворешни работи на ЕУ во Брисел, Калас истакна дека во време на растечко, нефилтрирано новинарство, независното новинарство е поважно од кога било.

„Станува збор за краткорочно, итно финансирање наменето за безбедносната мрежа на независното новинарство“, истакна Калас.

Брисел одлучи да му помогне на Радио Слободна Европа откако администрацијата на американскиот претседател Доналд Трамп ги прекина грантовите за продемократските медиуми, обвинувајќи ги дека промовираат агенда со либерална пристрасност.

Сега адвокатите на Радио Слободна Европа се борат против американската администрација на суд.

Калас изјави, пренесува АП, дека ЕУ нема да може да ја пополни празнината во финансирањето на радиото низ целиот свет, но дека сака да му помогне на медиумот „да работи и да функционира во оние земји што се во соседството (ЕУ) и кои во голема мера зависат од вести што доаѓаат однадвор“.

Високата претставничка, исто така, рече дека се надева оти членовите ќе помогнат со повеќе пари за поддршка на Радио Слободна Европа на долг рок.

Таа додаде дека ЕУ бара „стратешки области“ во кои може да помогне додека САД ја намалуваат странската помош.