Генералниот секретар на НАТО, Марк Руте, денеска повтори дека ставот на НАТО е оти најдобро е да не се поставуваат ограничувања на снабдувањето со вооружени системи за Украина и додаде дека на секоја земја членка е да одлучи дали ќе дозволи користење на нејзиното оружје со долг дострел за напад на цели во Русија.

„Отсекогаш сум сметал дека е мудро да не зборуваме премногу за она што го правиме. Јасно е дека НАТО претходно кажа дека кога сојузниците ја снабдуваат Украина со системи за оружје, најдобро е да не се поставуваат ограничувања за нив. Ова е генерален став, но сојузниците поединечно треба да одлучат што да прават“, им рече Руте на новинарите по пристигнувањето на состанокот на Советот за надворешни работи на ЕУ посветен на одбраната.

„Во моментот гледаме ескалација на војната бидејќи Русија во неа ја вклучи и Северна Кореја. Минатиот викенд видовме што се случи со нападот на Украина, кој беше масовен. Но, не навлегувам во тоа дали поединечните сојузници треба да дадат или не или што прават. На нив е да комуницираат ако сакаат. Генерално, би рекол да не комуницираме премногу и да не ги правиме противниците помудри отколку што е потребно“, изјави Руте, пренесува „Танјуг“.

Тој посочи дека денеска се одбележуваат 1.000 дена од војната во Украина и додаде дека за време на состанокот на Советот за надворешни работи на ЕУ посветен на одбраната ќе разговараат како да ѝ се помогне на Украина да победи. „Тоа значи повеќе помош, повеќе пари и мораме да им ги ставиме на располагање, особено сега кога Северна Кореја се вклучи, и знаеме дека Кина ѝ помага на Русија во воените напори. Знаеме и дека Иран ја поддржува Русија во воените напори. Како што знаеме, Путин мора да плати за ова“, рече Руте.

Илон Маск ја продолжи својата расправија со британската влада обвинувајќи ја дека навлегла во тотален сталинизам со зголемување на данокот на наследство на фарми вредни повеќе од 1 милион фунти. Ова е најновиот напад на сојузниците на Доналд Трамп врз британската лабуристичка влада и доаѓа додека Лондон се обидува да ги поправи односите со тимот на Трамп пред неговата инаугурација.

Коментарите на Маск се фокусираа на контроверзниот даночен план што лабуристите го претставија минатиот месец. Владата го укинува ослободувањето од данок на наследство за некои фарми, потег што Националниот сојуз на фармерите го нарече катастрофален. Во Лондон денеска се очекуваат големи протести на земјоделците, пишува „Политико“

Промените, кои стапуваат во сила во април 2026 година, ќе доведат до удар на оние што наследуваат фарми вредни повеќе од 1 милион фунти, со стапка на данок на наследство од 20 отсто. Британското Министерство за финансии вели дека, веројатно, ќе бидат погодени помалку од 500 фарми годишно и посочува дека данокот е половина од другите даноци на наследство.

„Британија оди во целосен сталинизам“, напиша Маск на „Икс“ и сподели напис на „Гардијан“ за планот на британската влада.

Сталин е советски диктатор, кој водеше брутална програма за колективизација на фармите, проследена со широко распространет глад.

Претседателката на Европската комисија, Урсула фон дер Лајен, денеска, по повод одбележувањето 1.000 дена од почетокот на војната во Украина, изјави дека ЕУ ќе биде на страната на Украина сè додека е потребно и дека земјата еден ден ќе биде дел од Унијата.

Таа рече дека денеска е ден на жалост, но и ден на ветување.

„Пред 1.000 дена Русија се обиде да ја избрише Украина од мапата. И 1.000 дена Русија пропадна поради отпорот на Украина и пожртвуваноста на вашите херои. Денеска е ден на жалост, но и ден на ветување. Ветуваме дека ќе бидеме на ваша страна онолку колку што е потребно“, истакна Фон дер Лејен. „Истовремено, таа најави дополнителни 65 милиони евра за поддршка на иницијативата за купување училишни оброци за украинските деца. И иднината на една земја почнува од нејзините деца. Русија сака да ја украде иднината на Украина. Тоа нема да го дозволиме. Затоа, давање право на образование на децата и обезбедување топол оброк на училиште е исто така форма на отпор“, рече Фон дер Лајен, пренесува „Танјуг“.

Таа посочи и дека Украина може да биде сигурна дека европската и западната поддршка за таа земја ќе продолжи и во тој контекст потсети дека до 2027 година ќе бидат обезбедени 50 милијарди евра од ЕУ, а до 2026 година 50 милијарди евра од земјите од Г7 и ЕУ, се вели во соопштението на Европската комисија.

Таа исто така посочи дека приходите од имобилизираните руски средства сега се користат за зајакнување на военото производство во Украина и за поправка на енергетската инфраструктура на земјата пред зимата.

„Затоа што Русија треба да плати за 1.000 дена криминал и уништување“, смета Фон дер Лајен. Таа додаде дека претстојната зима може да биде страшна, но истакна дека вистинските пријатели се појавуваат во бурните денови.

„И Европа е вашиот вистински пријател. Знаеме дека еден ден, кој не е толку далеку, ќе бидете дел од нашата Унија. Вашиот напредок кон придружувањето ни е импресивен, уште повеќе кога водите егзистенцијална војна. И јас сум убедена дека можеме да преминеме во следната фаза од нашите преговори“, рече Фон дер Лајен.

Таа истакна дека иднината на Украина е во Унијата. „Вашата слобода е наша слобода. А нашиот сојуз е вашиот дом“, заклучи претседателката на Комисијата. По повод 1.000 дена од почетокот на војната во Украина, и претседателката на Европскиот парламент, Роберта Мецола, најави дека ЕУ ќе биде со Украина сè додека е потребно. Таа додаде дека претходните 1.000 дена биле денови на храброст и пркос, денови на надминување на шансите, денови на заедништво како браќа и сестри.

„Како едно семејство што дели заедничка иднина“, изјавила Мецола на социјалната мрежа „Икс“. Претседателот на Европскиот совет, Шарл Мишел, им порача на украинските пријатели дека ЕУ е на нивна страна и е подготвена да ги поддржува сè додека е потребно наведувајќи дека претходните 1.000 дена биле обележани со агресија против Украина, жртви и страдање и храброст.