Свет
Смртната казна е легална во 56 држави
Смртната казна е легална во 56 држави, а единствена европска земја којашто ја спроведува казната е Белорусија, се наведува во извештајот на Светската организација за заштита на човековите права „Амнести интернешнл“.
Според извештајот на организацијата, изрекување смртна казна е можно и во ентитетот Република Српска во БиХ, во чиј устав е пропишано дека смртна казна може да се изрече само за најтешки облици на казниви дела.
Земјите од регионот, како што се наведува во извештајот, ја укинале смртната казна во периодот од 1989 до 2007 година.
,,Во европските земји оваа пракса е укината, освен во Белорусија, каде минатата година се убиени двајца луѓе. Во државата од 1990 година е спроведена ваква казна врз повеќе од 200 лица”, се додава во извештајот на „Амнести интернешнл“.
Во некои држави во светот смртната казна и понатаму е редовна пракса. Во Кина се изрекуваат највеќе смртни казни, иако државата никогаш не објави податоци за бројот на смртни пресуди и егзекуции. Според податоците што се достапни во јавноста, во Кина секоја година се извршуваат илјадници егзекуции.
Повеќе од половината, односно 51 отсто од смртните казни, ако се одземат податоците од Кина, се извршени во Иран, кој заедно со Саудиска Арабија, Ирак и Пакистан сочинува 84 отсто од сите смртни казни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
„Макрон сакаше да страдаме поради Брегзит“ – Борис Џонсон со експлозивни тврдења во неговите мемоари
Францускиот претседател, Емануел Макрон, се обиде да ја натера Британија да страда поради напуштањето на Европската унија, напиша поранешниот британски премиер Борис Џонсон во своите нови мемоари.
Во најновиот извадок од неговите мемоари „Oслободен“, Џонсон го обвини францускиот претседател дека ја користел нередовната миграција како „оружје“ за да го поткопа Брегзит, објави „Политико“.
Тој рече дека Макрон изгледал подготвен да замижи пред бандите кои шверцуваат луѓе преку Каналот и тврди дека францускиот лидер го гледал Брегзит како „ужасно навредлив потег за ЕУ и неговиот поглед на светот“.
Двајцата лидери имаа ладен однос кога Џонсон беше на функцијата, со остри несогласувања околу Брегзит, војната во Украина и правата за риболов, меѓу другите прашања.
Свет
Путин потпиша указ со кој повика 133.000 Руси на задолжителна воена служба
Рускиот претседател Владимир Путин потпиша указ со кој се повикуваат 133.000 Руси на задолжителна воена служба оваа есен, според веб-страницата за правни информации.
Во уредбата се наведува дека граѓаните на возраст помеѓу 18 и 30 години, кои ги исполнуваат условите за воена служба и не се во резервни единици, се поканети да бидат регрутирани од 1 октомври до 31 декември.
Уредбата ги иззема војниците, кои веќе ја отслужиле воената служба, пренесе ТАСС.
Генералштабот на руските вооружени сили нагласи дека оние што ќе бидат регрутирани оваа есен нема да учествуваат во војната во Украина.
Свет
Зеленски: Путин се плаши да користи нуклеарно оружје
Владимир Путин се плаши да користи нуклеарно оружје затоа што го сака својот живот и ги контролира животите на другите, изјави украинскиот претседател, Володимир Зеленски.
Рускиот претседател на 25 септември изјави дека ја менува руската нуклеарна доктрина и може да ги прошири околностите под кои може да се користи такво разорно оружје.
Но, Зеленски рече дека не мисли оти Путин ќе ризикува да користи нуклеарно оружје.
„Никој не знае што навистина има во главата на Путин. Тој може да користи нуклеарно оружје за да нападне која било земја во секое време. Или не. Не сум сигурен дека ќе го стори тоа. Споделувам со вас што мислам, но јас не сум Путин. Не можам да знам точно. Тој ги сака својот живот и својот начин на живеење и управување со животите на другите“, рече Зеленски.
Во саботата рускиот министер за надворешни работи, Сергеј Лавров, му порача на Вашингтон да ја подготви Европа за самоубиствен потфат поради бесмисленоста и опасноста од самата идеја за борба до победа со нуклеарна сила како Русија.