Свет
Стано: Војната што ја започна Русија ќе биде завршена според условите на Украина
Европската унија има јасен и дефиниран став на сите 27 земји-членки во однос на руската инвазија на Украина и ќе го поддржува Киев до победа, изјави портпаролот на ЕУ, Петер Стано, додавајќи дека Украина, како жртва на руската агресија, ќе ги одреди условите под кои оваа војна ќе заврши.
„Она што е навистина важно е ставот на ЕУ, кој е договорен меѓу сите 27 земји-членки. Оваа позиција подразбира поддршка на Украина онолку долго колку што е потребно до нејзината легитимна победа во оваа легитимна одбранбена војна. Токму тоа е ставот на Европската унија“, нагласи Стано на прес-конференција во Брисел, коментирајќи го пишувањето на некои западни медиуми за можноста за размена на членството на Украина во ЕУ и НАТО за територијални отстапки за сметка на привремено окупирани територии од Русија, пренесува „Укринформ“.
Портпаролот на ЕУ истакна дека овој конфликт на крајот ќе го најде своето решение на еден или друг начин. Но, како што наведе, такво решение треба да се најде под условите на Украина.
„Украина е жртва на криминална руска агресија. Значи, Украина е таа која ќе одлучи кога ќе дојде вистинскиот момент да се зборува за какви било отстапки, услови или што било друго. Сето ова е целосно во рацете на Украина. Европската унија стои до Украина, заедно со Украина, и продолжува да ѝ дава на Украина секаква можна помош за да победи во оваа легитимна одбранбена војна“, додаде Стано.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вучиќ за гласањето на Резолуцијата за Сребреница: Ќе има разочарувачки вести за ставовите на некои земји за кои не очекувавме „да ни забијат нож во грб“
Претседателот на Србија, Александар Вучиќ денеска најави дека при гласањето на Резолуцијата за геноцидот во Сребреница ќе има „разочарувачки вести“ во однос на позициите на некои земји.
„Ги добивме податоците, секако дека ќе има разочарувачки вести во однос на ставовите на некои земји за кои не очекувавме „да ни забијат нож во грб“, но очекувавме голем притисок и знаевме дека ќе има промени во ставовите. Цело време молчеа, но застанаа на страната на оние кои се големи и силни“, изјави Вучиќ на новинарите во обраќањето од Њујорк.
Тој изјави и дека верува оти „многумина кои ќе гласаат за Резолуцијата за геноцидот во Сребреница утре ќе кажат дека таа е за доброто на Србија“.
„Ќе ја повторат празната приказна дека не е колективна вина на српскиот народ“, рече претседателот на Србија.
Вучиќ рече дека ќе има „и такви кои ќе го издржат притисокот“.
„Парадоксално е што седницата на Генералното собрание на Обединетите нации ќе ја отворат Германците, повторно ќе ни судат, ќе одговорам и ќе возвратам на секој удар, а ќе имаме доволно пријатели кои ќе се појават во четврток навечер“, изјави Вучиќ.
Регион
(Видео) Силно невреме ја зафати Србија: жена загина во Сомбор
Силно невреме го погоди Сомбор околу 17 часот, а на социјалните мрежи кружат фотографии од соборени дрвја во овој град.
Исто така, како што соопшти српското МВР, една жена настрадала кога дрво паднало врз автомобилот во кој се наоѓала.
Поројни дождови и град ги погодија и Нови Пазар, Ивањица, Чачак.
Силно невреме денеска околу 15 часот го зафати Нови Пазар и околината, предизвикувајќи прекин на електричната енергија во неколку населени места, јавува Танјуг.
Fallen branches and trees at northwestern Serbia due to convective wind gusts on this evening, in Kucura near town Vrbas (first photo), and in town Sombor (2nd and 3rd photo).
Source – Facebook page: https://t.co/wDYT1MhWyc pic.twitter.com/7CB9lfJcJL
— Milos Milic (@skomimaster) May 21, 2024
Силен дожд и град со големина на ореви паѓаа со часови без престан, пренесуваат српските медиуми.
Поради обилните врнежи, на улиците се појавија големи количества вода, што го отежна движењето на автомобилите.
Европа
Русија почна со вежби со тактичко нуклеарно оружје
Руските сили ја почнаа првата фаза од вежбите кои вклучуваат „практична обука за подготовка и употреба на нестратешко нуклеарно оружје“, соопшти денеска руското Министерство за одбрана.
Претседателот Владимир Путин ги нареди вежбите претходно овој месец. Москва ги поврза со, како што ги нарече, „милитантните изјави“ на западните официјални лица за кои рече дека претставуваат безбедносна закана за Русија.
Предупредување на Путин до Западот
Руското Министерство за надворешни работи ги цитираше коментарите на францускиот претседател Емануел Макрон, кој ја покрена можноста за испраќање европски сили да се борат против Русија во Украина, и британскиот министер за надворешни работи Дејвид Камерон, кој рече дека Украина има право да користи оружје обезбедено од Лондон за напад на цели во Русија.
Безбедносните аналитичари велат дека вежбата е предупредување на Путин до Западот повеќе да не се вклучува во војната во Украина, на која и испорачува оружје и разузнавачки информации, но се воздржа од испраќање војници.
Министерството за одбрана соопшти дека во првата фаза од вежбата се вклучени ракетите Искандер и Кинжал.
Вежбите се одржуваат во Јужниот воен округ на Русија долж украинската граница и делови од Украина под контрола на Русија.
Белорусија, каде Русија распореди тактичко нуклеарно оружје минатата година, исто така ќе биде вклучена во вежбите, соопштија двете земји.
Тактичкото или нестратешкото нуклеарно оружје е помалку моќно од стратешкото оружје дизајнирано да избрише цели непријателски градови, но сепак има огромен деструктивен потенцијал.