Свет
Талибанците го забранија шахот

Талибанските власти во Авганистан привремено го забранија играњето шах наведувајќи загриженост дека играта би можела да биде форма на коцкање. Како што објавија службените лица, забраната останува во сила до понатамошно известување, односно додека не се утврди дали шахот е во согласност со исламскиот закон.
Шахот е најновиот во низата спортови што талибанците одлучија да ги ограничат. За потсетување, во пракса, на жените речиси целосно им е забрането да спортуваат. По враќањето на власт во август 2021 година, талибанците постепено воведуваат закони и прописи што го одразуваат нивното строго толкување на шеријатскиот закон.
Во неделата, портпаролот на спортскиот директорат на талибанците, Атал Машвани, изјави дека шахот се смета за средство за коцкање според исламскиот закон.
„Постојат религиозни сомнежи кога станува збор за шахот“, изјави тој за АФП. „Додека не се разјаснат, шахот во Авганистан останува суспендиран“.
Сопственик на кафуле во Кабул, кој организирал неформални шаховски турнири во последните години, вели дека ќе ја почитува одлуката, но признава дека тоа ќе му наштети на бизнисот.
„Младите луѓе денес немаат многу начини да го поминуваат времето, па затоа доаѓаа тука секој ден“, рече Азизула Гулзада. „Тие пиеја чај и играа шах со пријателите“. Тој додаде дека шахот нормално се игра во многу други муслимански земји.
Минатата година талибанците ги забранија и борачките вештини, како што е ММА, тврдејќи дека се премногу насилни и некомпатибилни со исламските принципи. „Утврдено е дека овој спорт е проблематичен во контекст на шеријатот и содржи многубројни елементи што се спротивставуваат на исламските учења“, изјави тогаш портпаролот на талибанската влада. ММА-натпреварите ,всушност, беа укинати во 2021 година кога беше воведен закон со кој се забранува удирање во лице.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Иран ја потврди смртта на уште еден нуклеарен научник убиен во израелски напади

Иран денес потврди дека уште еден нуклеарен научник е убиен во неодамнешните израелски напади.
Според новинската агенција Тасним, иранскиот Универзитет за наука и технологија соопшти дека инженерот Сулејман Солејмани, дипломиран на Одделот за хемиско инженерство, е убиен во израелските напади.
Потврдата доаѓа откако Израел соопшти дека убил 11 нуклеарни експерти и дека погодил неколку истражувачки центри поврзани со нуклеарната програма на Иран во 12-дневната воена операција.
Техеран не објави дополнителни детали за околностите на смртта на Солејмани или точната локација на нападот.
12-дневниот конфликт меѓу Израел и Иран избувна на 13 јуни, откако Израел изврши воздушни напади врз ирански воени, нуклеарни и цивилни цели, при што загинаа најмалку 606 лица, а 5.332 беа повредени, според иранското Министерство за здравство.
Техеран возврати со ракетни и беспилотни летала напади врз Израел, во кои загинаа најмалку 29 лица, а повеќе од 3.400 беа повредени, според Еврејскиот универзитет во Ерусалим.
Борбите беа прекинати со прекин на огнот што стапи на сила на 24 јуни, посредувано од САД, кои претходно ги таргетираа нуклеарните постројки на Иран.
Свет
Германија најавува промени: ја зголемува минималната плата по час на 14,60 евра

Германија постепено ќе ја зголемува минималната плата по час на 14,60 евра од сегашните 12,82 евра до 2027 година, според предлозите на владината комисија, кои беа објавени денес.
Планирано е минималната плата по час да се зголеми на 13,90 евра на почетокот на 2026 година, а од минатата година, Германија има највисока минимална плата во Европската унија, по Луксембург, кој пропишува месечен минимум од 2.638 евра.
Три други земји од ЕУ имаат национална минимална плата над 2.000 евра месечно – Белгија, Холандија и Ирска, објавува Ројтерс.
Овој предлог на комисијата, која ја сочинуваат работодавачи и претставници на синдикатите, мора да го спроведе германското Министерство за труд.
Свет
Рама: Велика Британија e во многу темна состојба по Брегзит

Албанскиот премиер Еди Рама ја критикуваше британската политика за азил, тврдејќи дека земјата е „во многу темна состојба“ по Брегзит.
Во интервју за Гардијан, Рама ја обвини Велика Британија дека бара „места за испраќање имигранти“ инсистирајќи на формирање центри во трети земји, во кои би ги испраќале одбиените баратели на азил кои ги исцрпиле сите законски опции, објавува „Политико“.
Британскиот премиер Кир Стармер потврди минатиот месец дека Велика Британија преговара со други земји за овој план, но не кажа во кои земји. Стармер го објави ова за време на неговата прва официјална посета на Албанија.
Рама потоа рече дека Албанија сигурно нема да биде дел од тој план, бидејќи е „лојална на договорената соработка со Италија“.
„Фактот дека ова не само што е замисливо денес, туку веќе се случува, не е поради тоа што Стармер или Риши Сунак прават нешто скандалозно, туку затоа што Велика Британија е во многу темна состојба“, изјави Рама за Гардијан.
Албанскиот премиер изјави дека предлозите на Стармер се дел од „работите што се кажуваат, пишуваат или се прифаќаат како нормален дел од дискурсот во денешна Британија“ и посочи дека пред Брегзит тоа „би било целосно неприфатливо, смешно и срамно“.
Медиумот анализира дека за време на претходната конзервативна влада на Велика Британија, Лондон и Тирана потпишаа заедничка изјава и формираа работна група за борба против нелегалната миграција, што доведе до враќање на повеќе од 1.000 албански државјани од Велика Британија.
И покрај ова, односите меѓу двете земји честопати беа затегнати поради реториката на политичарите во Лондон за тоа како албанските баратели на азил ја „напаѓаат“ Велика Британија.
На крајот од интервјуто, Рама рече дека Стармер е „многу пристојна и прекрасна личност“ и јасно стави до знаење дека британскиот премиер јавно не побарал Албанија да се приклучи на неговата програма.