Свет
Талибанците побарале помош од Турција за управување со аеродромот во Кабул
Талибанците побараа од Турција техничка помош во управувањето со аеродромот во Кабул по заминувањето на странските војници, но останува и процесот на целосно повлекување на турската армија до крајот на рокот – 31 август, изјавија двајца турски официјални лица.
Еден од официјалните лица изјавил дека Анкара ја чека тешка одлука дали да ја прифати оваа работа, пишува „Ројтерс“.
Претежно муслиманската Турција беше дел од мисијата на НАТО во Авганистан и се уште има стотици војници на аеродромот во Кабул, а официјалните лица велат дека армијата е подготвена да се повлече во краток рок.
Владата на турскиот претседател Реџеп Таип Ердоган со месеци тврдеше дека може да го задржи присуството на аеродромот доколку тоа се побара од неа.
„ Талибанците испратија барање за техничка поддршка во управувањето со аеродромот во Кабул, а обезбедувањето безбедност на работниците без турските вооружени сили е ризична работа“ рече турскиот претставник.
Друг турски официјален претставник објасни дека одржувањето на аеродромот отворен откако странските сили ќе ја предадат контролата е од витално значење не само за да се задржи Авганистан поврзан со светот, туку „и за одржување на размената на набавки и помош“.
Портпаролот на талибанците, Забидула Муџахид вчера изјави дека сакаат добри односи со Турција, турската влада и муслиманскиот народ на турската нација.
„ Што се однесува до турските сили стационирани во Авганистан, тие не ни се потребни во нашата земја, а откако ќе заврши евакуацијата, сами ќе го обезбедиме аеродромот – рече Муџахид.
Турција беше одговорна за обезбедување на аеродромот во Кабул во времето на распоредување на НАТО и беше вклучена во напорите за евакуација во последните две недели.
Соединетите држави велат дека се координираат со регионалните партнери и Талибанците за идната операција на аеродромот во Кабул.
„Функционална држава, функционална економија, влада која има слични односи со остатокот од светот, има потреба од функционален комерцијален аеродром“, рече во понеделникот Едвард Прајс, портпарол на Стејт департментот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.