Свет
Тајландските момчиња во пештерата останале смирени преку техники за медитација што ги научиле од својот тренер

Кога 12-те тајландски момчиња, кои беа заробени во пештера, биле првично пронајдени од страна на британските нуркачи пред една недела, тие, наводно, медитирале.
„Тие мирно седеа во пештерата чекајќи. Никој не плачеше и не беше премногу вознемирен. Тоа беше зачудувачки“, изјави мајката на едно од момчињата за агенцијата АП алудирајќи на објавеното видео од моментот кога момчињата беа пронајдени.
Се покажа дека нивниот тренер, Екапол Чантавонг, кој ги водел на прошетка во пештерата што се поплави на 23 јуни, една деценија изучувал медитација како будистички монах, а потоа станал фудбалски тренер. Според повеќе извори, тој ги подучил момчињата, на возраст од 11 до 16 години, да медитираат во пештерата со цел да се смират и да ја зачуваат својата енергија во текот на двонеделното тешко искушение.
„Тој може да медитира и по еден час“, изјавила тетката на Екапол, Там Чантавонг, за АП. „Тоа дефинитивно му помогнало нему, а веројатно и на момчињата за да останат смирени“, додала таа.
Дваесет и петгодишниот Екапол отишол да живее во манастир на возраст од 12 години бидејќи останал сирак. Како што пренесуваат тајландските медиуми, тој се обучувал да биде монах 10 години во манастирот „Мае Саи“, но морал да замине за да се грижи за својата болна баба. Потоа бил ангажиран да биде асистент на тренерот на тимот, познат како „Диви свињи“.
Тренерот Аке, како што е познат кај младите фудбалери, сè уште одржува блиски контакти со манастирот. Тамошниот игумен за „Волстрит џурнал“ изјавил дека станува збор за одговорен млад човек кој редовно медитира.
Не е изненадување дека медитацијата е корисна практика во екстремно стресни ситуации. Будистичката медитација е стара речиси 2600 години, а Буда почнал да ја учи како алатка за постигнување јасност и мир на умот и како крајна цел – ослободување од страдањето.
Неодамна научните студии во клинички услови покажаа дека медитацијата може да ги намали анксиозноста и депресијата, како и болката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) „Таа е неверојатна, ама не сакам да влезам во неволја“- Трамп за сопругата на британскиот премиер

Американскиот претседател Доналд Трамп упати пофалби за Викторија Стармер, сопругата на британскиот премиер Кир Стармер, за време на средбата на двајцата државници во Тернбери, Шкотска.
Иако звукот од гајдите го надвладеа Трамп, се слушна како американскиот претседател вели: „Сакаме да го усреќиме премиерот.“
Говорејќи за Викторија Стармер, Трамп додаде:
„Таа е почитувана личност низ целите Соединети Американски Држави. Не знам што работи тој, но таа е многу почитувана, подеднакво почитувана како и тој. Не сакам да кажам повеќе, ќе влезам во неволја. Но, таа е многу, таа е прекрасна жена и многу е почитувана“, пренесува Express.
🚨🇬🇧🇺🇸 Trump welcomes Britains most hated Prime Minister ever & all round Global Communist Keir Starmer along with his estranged Wife to his Residence in Turnberry, Scotland pic.twitter.com/3T9a4oB4hh
— Concerned Citizen (@BGatesIsaPyscho) July 28, 2025
По долгиот разговор помеѓу премиерот и претседателот на врвот од скалите, Трамп се сврти да одговори на новинарските прашања додека гајдите продолжија да свират гласно.
Меѓу другото, едно прашање се однесуваше на царините на виски.
„Ќе разговараме за тоа, не знаев дека вискито е проблем. Не сум голем љубител на виски, но можеби треба да бидам“, рече Трамп.
За време на кратката средба пред официјалниот разговор, лидерите се осврнаа на теми од нелегална миграција до војната во Газа.
Свет
Американскиот потпретседател: Бајден, Обама и Буш го прикриваа случајот Епштајн

Американскиот потпретседател Џеј Ди Венс денес изјави дека претседателот Доналд Трамп сака целосна транспарентност во случајот со Џефри Епштајн.
Тој додаде дека поранешните претседатели Џо Бајден, Барак Обама и Џорџ В. Буш „го прикриле овој случај“.
„Претседателот (Трамп) му наложи на државниот обвинител да ги објави сите веродостојни информации и, искрено, да пронајде дополнителни веродостојни информации поврзани со случајот Џефри Епштајн. Тој е неверојатно транспарентен во врска со овие работи, но дел од тоа бара време“, изјави Венс при обраќање во Кантон, Охајо, пренесува „Си-ен-ен“.
Венс додаде дека „постојано“ е во контакт со државната обвинителка Пем Бонди, која во моментов, како што рече, „вредно работи на ова прашање“.
Тој посочи дека администрациите на Обама и Буш биле „млаки“ во однос на Епштајн, кого го нарече посрамен финансиски магнат и „педофилски олош“.
„Ниту целосно го истражија случајот, ниту покажаа некакво вистинско интересирање за него, а сега Доналд Трамп бара од своето Министерство за правда да покаже целосна транспарентност – и некако тоа станува критика за Трамп, наместо за Обама и Буш“, рече Венс.
Во времето на администрацијата на Буш, американскиот обвинител Алекс Акоста – кој подоцна служеше и во првата администрација на Трамп како министер за труд – одби да го гони Епштајн, што му овозможи да избегне федерални обвиненија.
Свет
Трамп тврди: Моето претседателство спречи шест големи војни

Американскиот претседател, Доналд Трамп, изјави дека неговото присуство во Белата куќа, односно тоа што е на позицијата претседател на САД, спречило избувнување на шест големи војни низ целиот свет, вклучувајќи и потенцијален вооружен конфликт меѓу Индија и Пакистан.
„Да не бев тука, ќе имавте шест големи војни во моментов. Индија ќе се бореше против Пакистан“, рече Трамп во Шкотска, пред средбата со британскиот премиер Кир Стармер, тврдејќи дека неговата администрација одиграла клучна улога во деескалацијата на кризите во неколку глобални жаришта, пишува Гардијан.
Како пример, тој го наведе спорот меѓу Тајланд и Камбоџа, за кој посочи дека благодарение на неговата интервенција, вклучително и заканата за прекин на трговските преговори, е постигнато примирје.
Трамп, исто така, посочи на придонесот на неговата администрација за намалување на тензиите и поддршка на мировните напори меѓу Руанда и Демократска Република Конго.