Свет
Товарен брод со меѓународен екипаж киднапиран во Бенин

Товарниот брод „Томи Ритшер“, кој плови под португалско знаме, бил заземен од неидентификувани лица кај крајбржјето на Бенин, во понеделникот вечерта, објави службата „Драјад глобал“, која се занимава со безбедносни прашања на поморската навигација, пренесува ТАСС.
Според организацијата, мултинационалниот екипаж на бродот вклучува државјани на Русија, Украина, Филипини и на Бугарија. Единаесет членови на екипажот успеале да се сокријат во специјалната армирана кабина, а осуммина веројатно се заробени од напаѓачите.
Според „Драјад глобал“, нигериските власти испратиле патролен брод до пловилото. Барањата на напаѓачите сè уште не се познати. Руската амбасада во Бенин и Того останува во контакт со морнарицата на Бенин и администрацијата на пристаништето Котону за инцидентот.
„Околу 7-8 членови на екипажот се држат како заложници на бродот, а меѓу нив може да има и Руси. Амбасадата, од своја страна, ги верификува овие информации“, соопшти руската амбасада на својата страница на „Фејсбук“.
„Амбасадата го следи развојот на ситуацијата и одржува близок работен контакт со поморската команда на Бенин и администрацијата на градското пристаниште во Котону“.
Според дипломатите, бродот во моментот е блокиран од патролни чамци на морнарицата на Бенин во територијалните води на земјата. Веројатно, бродот го зазеле пирати.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Снаата на убиените во Чачак повикала полиција: пожарникарите влегле во станот низ прозорецот

Јован (77) и Милица (72) Баковиќ синоќа околу 22 часот се убиени во семејниот стан во Чачак.
За убиството е осомничен нивниот син Михајло, а како што дознаваат медиумите, неговата сопруга повикала полиција.
„Беа прекрасни луѓе, синот им доаѓаше секој ден, не разбираме што можеше да се случи. Слушнав дека на Михајло му се слошило, но не знам за што се работи. Синоќа му се јавила сопругата, тој не одговорил. Ниту тие не се јавиле, па таа дошла во станот. Таа тропнала на вратата, но никој не одговорил, не знаела што се случило и ја повикала полицијата, која ги пронашол телата во станот“, изјавил соседот за медиумите.
Убиениот Јован бил лекар во пензија, според написите.
Припадници на МВР во Чачак го приведоа М. Б. (41) од Чачак поради сомнение дека сторил кривично дело тешко убиство.
Како што беше дополнително соопштено, тој е осомничен за кривично дело тешко убиство и се сомничи дека со остар предмет ги убил родителите. По наредба на Вишото јавно обвинителство во Чачак, одредена му е мерка притвор до 48 часа, во кој рок со поднесување кривична пријава ќе биде изведен на распит во Обвинителството.
Свет
Папата Франциско: Болеста ми помогна појасно да ја видам апсурдноста на војната

Папата Франциско, кој беше хоспитализиран поради пневмонија, преку писмо повика на прекин на војните и на дипломатски решенија за конфликтите.
Во писмото до весникот „Кориере дела сера“ папата рече дека неговата долга болест му помогнала да му стане уште појасна апсурдноста на војната и го обновил својот повик до дипломатијата и меѓународните организации да најдат нова виталност и кредибилитет.
Папата укажа и на важноста на зборовите велејќи дека „мора да ги разоружаме зборовите, да ги разоружаме умовите и да ја разоружаме Земјата“. Претходно денеска, Бакингемската палата потврди дека кралот Чарлс ќе се сретне со папата Франциско меѓу 7 и 10 април и покрај болеста на католичкиот водач.
Папата (88) беше примен во римската болница „Гемели“ на 14 февруари со тешка респираторна инфекција и оттогаш не е виден во јавноста, пренесува „Танјуг“.
Регион
Во хрватскиот Сабор едноминутно молчење за загинатите во Македонија

Хрватскиот Сабор, денеска, со едноминутно молчење им оддаде почит на 59-те лица што завчера загинаа во пожарот во Кочани, Македонија.
„Загубени се многу млади животи и во име на хрватскиот Сабор сакам да изразам сочувство до семејствата на жртвите и да им посакам брзо закрепнување на повредените“, изјави претседателот на Собранието, Гордан Јандроковиќ.
Во пожарот што завчера избувна во „Пулс“ во Кочани загинаа 59 млади лица, а повеќе од 150 се повредени.