Свет
Топлотниот бран во северна Индија однесе 166 животи: жителите се плашат да излезат надвор

За време на топлотниот бран во северна Индија, 166 лица починаа, а многумина се во болници поради топлотен удар, соопштија властите, кои велат дека ситуацијата се влошува поради прекините на струја.
Индискиот метеоролошки оддел соопшти дека температурата достигнала 43,5 степени Целзиусови во северна Индија. Топлотен бран официјално е прогласен во Индија ако температурата е над 45 степени Целзиусови или ако е најмалку 4,5 степени Целзиусови над нормалата за одредена област.
Во државата Утар Прадеш на северот на Индија, 119 лица го загубија животот поради екстремни горештини, додека 47 смртни случаи се регистрирани во соседен Бихар.
Работник во погребално претпријатие во градот Деорија изјавил дека толку многу луѓе умираат од жештината што тој и неговите колеги работат континуирано.
Жителите на градовите погодени од топлотниот бран велат дека се плашат да излезат надвор.
Најголемата болница во областа Балија во Утар Прадеш повеќе не може да прима пациенти. Мртовечницата е преполна затоа што на жештините починале 54 стари лица, иако од различни причини.
Министерот за здравство Брајеш Патак синоќа изјави дека двочлен тим ќе испита што е причината за големиот број смртни случаи и колку од нив се директно поврзани со горештините.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русија обвинува: НАТО со трупи во Романија, цел е Молдавија

Руската надворешна разузнавачка служба (СВР) тврди дека НАТО концентрира воени единици во Романија во близина на границата со Молдавија и дека постои план за истоварување и во украинската Одеската област. Според соопштението, целта е окупација на Молдавија и притисок врз регионот Приднестровје.
Разузнавањето наведува дека први војници од Франција и од Велика Британија веќе пристигнале, а Европската Унија наводно е „одлучна да ја задржи Молдавија во рамките на својата политика по секоја цена“.
Инаку, во недела во Молдавија ќе се одржат парламентарни избори, на кои граѓаните ќе избираат меѓу европскиот пат и поблиски врски со Москва.
Приднестровје е сепаратистички регион што се одвои од Молдавија во 1992 година со поддршка од Москва и функционира како де факто независна држава со своја власт, армија и валута.
Свет
Откриен по 30 години: ноќниот предатор призна вина за сексуалните напади во Сиднеј

Австралиецот Глен Гери Камерон (61), познат како ноќниот предатор, призна вина за серија сексуални напади врз жени во Сиднеј на почетокот од 90-тите.
Камерон беше уапсен минатата година на аеродромот во Сиднеј кога полицијата со нови ДНК-анализи ги поврза старите случаи. Тој се изјасни виновен за 13 од вкупно 36 дела, меѓу кои – 11 обвинувања за тешки сексуални напади со закана со оружје.
Жртвите, осум жени на возраст од 17 до 45 години, најчесто биле мамени со лажни понуди за работа и нападнати во близина на железнички станици и паркови. Пресудата се очекува следниот месец.
Фото: судски цртач/суд во Сиднеј
Свет
Птичји грип потврден во Полска

Полска пријави појава на високопатоген птичји грип H5N1 на две живинарски фарми, објави вчера Светската организација за здравје на животните (WOAH).
Вирусот е откриен на фарма за гуски и на фарма за мисирки во градот Суш и уби приближно 4.000 птици, објави WOAH повикувајќи се на извештај од полските власти.
Во мај Варшава го потисна вирусот H5N1, според WOAH.
Во меѓувреме, вирусот повторно почна да се шири во Европа и од крајот на август Норвешка, Германија, Португалија и Бугарија пријавија појава на птичји грип. Во средината на јули болеста се појави и на фарма за мисирки во Шпанија.
Птичјиот грип обично се шири меѓу живината во Европа на почетокот на есента, забележува „Ројтерс“.
Варшава минатата недела изјави дека се надева дека ќе ги продолжи испораките во Кина во рок од еден месец по потпишувањето на договорот со Пекинг. Извозот беше суспендиран поради ширењето на птичјиот грип во 2023 година.
Вредноста на извозот на полска живина во Кина се проценува на две милијарди злоти (470,69 милиони евра).