Свет
Трамп: Можно е Путин да е вмешан во смртта на Навални

Поранешниот американски претседател Доналд Трамп објави дека верува оти е можно рускиот претседател Владимир Путин да бил вмешан во смртта на рускиот опозициски лидер Алексеј Навални.
„Не знам, но можеби, мислам би можел да кажам веројатно, не знам. Беше млад човек, па статистички ќе беше жив долго време, веројатно се случило нешто необично“, изјави Трамп во интервју за „Фокс њуз“.
Трамп, исто така, најави дека ќе ја прекине помошта за Украина и ќе го принуди Киев да седне на преговарачка маса со Русија, а како што пренесува „Политико“, таа позиција ја подгрева вознемиреноста кај западните сојузници дека републиканскиот кандидат би можел да добие втор мандат во ноември.
Трамп додаде дека се надева дека нема да мора да избира помеѓу победа на Русија во Украина и испраќање помош за Киев и посочи дека војната во Украина никогаш немаше да се случи доколку тој беше претседател кога избувна конфликтот во февруари 2022 година.
Инаку, Трамп во првата реакција за смртта на Навални одби да му припише одговорност на Путин, а тој исто така инсинуираше дека зад тоа стои Западот.
Руските власти објавија дека Навални, најистакнатиот критичар на претседателот Владимир Путин, починал од природна смрт во затвор на 16 февруари.
Тој одлежа 30-годишна затворска казна, меѓу другото, за, како што се наведува во една од пресудите на рускиот суд, „основање и финансирање на екстремистичка организација и нејзините активности“.
Неговите поддржувачи, вклучително и неговата вдовица Јулија, тврдат дека Навални е убиен, но Кремљ негираше каква било вмешаност во смртта на опозицискиот лидер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Американскиот потпретседател: Бајден, Обама и Буш го прикриваа случајот Епштајн

Американскиот потпретседател Џеј Ди Венс денес изјави дека претседателот Доналд Трамп сака целосна транспарентност во случајот со Џефри Епштајн.
Тој додаде дека поранешните претседатели Џо Бајден, Барак Обама и Џорџ В. Буш „го прикриле овој случај“.
„Претседателот (Трамп) му наложи на државниот обвинител да ги објави сите веродостојни информации и, искрено, да пронајде дополнителни веродостојни информации поврзани со случајот Џефри Епштајн. Тој е неверојатно транспарентен во врска со овие работи, но дел од тоа бара време“, изјави Венс при обраќање во Кантон, Охајо, пренесува „Си-ен-ен“.
Венс додаде дека „постојано“ е во контакт со државната обвинителка Пем Бонди, која во моментов, како што рече, „вредно работи на ова прашање“.
Тој посочи дека администрациите на Обама и Буш биле „млаки“ во однос на Епштајн, кого го нарече посрамен финансиски магнат и „педофилски олош“.
„Ниту целосно го истражија случајот, ниту покажаа некакво вистинско интересирање за него, а сега Доналд Трамп бара од своето Министерство за правда да покаже целосна транспарентност – и некако тоа станува критика за Трамп, наместо за Обама и Буш“, рече Венс.
Во времето на администрацијата на Буш, американскиот обвинител Алекс Акоста – кој подоцна служеше и во првата администрација на Трамп како министер за труд – одби да го гони Епштајн, што му овозможи да избегне федерални обвиненија.
Свет
Трамп тврди: Моето претседателство спречи шест големи војни

Американскиот претседател, Доналд Трамп, изјави дека неговото присуство во Белата куќа, односно тоа што е на позицијата претседател на САД, спречило избувнување на шест големи војни низ целиот свет, вклучувајќи и потенцијален вооружен конфликт меѓу Индија и Пакистан.
„Да не бев тука, ќе имавте шест големи војни во моментов. Индија ќе се бореше против Пакистан“, рече Трамп во Шкотска, пред средбата со британскиот премиер Кир Стармер, тврдејќи дека неговата администрација одиграла клучна улога во деескалацијата на кризите во неколку глобални жаришта, пишува Гардијан.
Како пример, тој го наведе спорот меѓу Тајланд и Камбоџа, за кој посочи дека благодарение на неговата интервенција, вклучително и заканата за прекин на трговските преговори, е постигнато примирје.
Трамп, исто така, посочи на придонесот на неговата администрација за намалување на тензиите и поддршка на мировните напори меѓу Руанда и Демократска Република Конго.
Свет
ЕУ тврди дека „Тему“ не ја спречува продажбата на нелегални производи

Европската комисија соопшти дека популарната кинеска онлајн платформа „Тему“ ги крши прописите на Европската унија, бидејќи не презема доволно мерки за да ја спречи продажбата на нелегални и небезбедни производи на своите корисници. Доколку овие обвинувања се потврдат, „Тему“ би можел да се соочи со висока парична казна која може да достигне до 6 проценти од вкупниот нивен годишен глобален приход.
„Постојат големи ризици потрошувачите во ЕУ да наидат на нелегални производи преку платформата“, стои во официјалното соопштение, пренесува „Ројтерс“. Наводно, било откриено дека купувачите на „Тему“ лесно можат да дојдат до производи што не ги исполнуваат стандардите – особено детски играчки и мали електронски уреди кои може да бидат опасни.
Според Комисијата, „Тему“ има слаба внатрешна проценка на ризик, бидејќи се потпира на општи индустриски податоци наместо да анализира конкретни закани поврзани со сопствената платформа. Ако овие прелиминарни наоди се потврдат, „Тему“ ќе се смета за прекршител на Законот за дигитални услуги – клучниот пакет правила на ЕУ за онлајн платформи.
Таквата одлука, покрај паричната казна, може да вклучува и задолжителни мерки кои „Тему“ ќе мора да ги преземе за да ги реши проблемите.
Од „Тему“ велат дека во целост ќе соработуваат со Комисијата, и дека ќе одговорат на официјалните наоди во наредните недели, но не прецизираа точен рок.
Наодите за небезбедни производи се само еден дел од пошироката истрага против „Тему“. Платформата е исто така под сомнение дека ги прекршува правилата на ЕУ во однос на користење дизајн што поттикнува зависност од купување, нетранспарентни системи за препорака на производи, како и ограничување на пристапот до податоци за независни истражувачи.