Свет
Трамп: Поднесоа ново обвинение против мене, очекувам да ме уапсат

Поранешниот американски претседател Доналд Трамп изјави дека е под понатамошна истрага и дека планираат да го уапсат поради немирите на 6 јануари во Капитол и неговите обиди да ги оспори резултатите од изборите во 2020 година. Тој на социјалните мрежи објави дека во неделата вечерта, обвинителот Џек Смит го известил дека е дел од нивната истрага и дека треба да се пријави пред Големата порота, што речиси секогаш значи апсење и покренување обвинение.
Ова би било трето кривично обвинение против Трамп. Имено, Смит и неговиот тим веќе го обвинија Трамп дека ризикува да открие национална тајна со тоа што земал илјадници доверливи документи со себе кога ја напуштил Белата куќа во јануари 2021 година и ги чувал тие документи на неовластен начин во неговата Мар-а-Лагу на Флорида и во неговиот голф клуб во Њу Џерси, пишува Би-би-си.
Овие документи содржат информации за тајната американска нуклеарна програма и потенцијалните ранливости во случај на напад, според обвинението од 37 точки. Во него се наведува и дека Трамп ги лажел службениците кои се обиделе да ги земат документите. Трамп е обвинет и за фалсификување деловни записи поврзани со исплати на ѕвездата на филмови за возрасни Сторми Даниелс.
Инаку Трамп е главен кандидат за републиканската претседателска номинација во 2024 година, со двоцифрена предност во анкетите пред неговиот главен ривал, гувернерот на Флорида, Рон ДеСантис. Таа предност порасна во изминатите четири месеци и покрај објавувањето на обвиненијата. Трамп во повеќе наврати изјави дека политичките противници сакаат да го спречат неговото враќање во Белата куќа преку истраги и обвиненија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Неколкумина загинаа откако патнички воз излета од шините во југозападна Германија

Неколку лица загинаа, а многу други се повредени откако патнички воз излета од шините во југозападна Германија, јави ДПА, повикувајќи се на безбедносни извори.
Спасувачките тимови се на местото на настанот и го пребаруваат возот и околината во потрага по патници.
Свет
Тројца мажи завршија во болница поради топлотен удар во Кипар

Тројца мажи се хоспитализирани денеска во Лимасол и Никозија во Кипар поради топлотен удар, при што еден од нив е во критична состојба.
Во исто време, двајца постари мажи, на возраст од 78 и 89 години, се хоспитализирани во Никозија во сериозна, но стабилна состојба. Уште еден 88-годишен пациент бил примен со симптоми на топлинска исцрпеност и е надвор од животна опасност.
Се апелира населението, особено до ранливите категории, да избегнуваат директна изложеност на сонце, да бидат внимателни и да внесуваат доволно течности, поради екстремно високите температури што зафатија делови од островот.
Свет
Фон дер Лајен се сретна со Трамп во обид да се договорат околу царините

Претседателката на Европската комисија, Урсула фон дер Лајен попладнево во шкотското место Трнбери ќе се сретне со американскиот претседател Доналд Трамп, во обид да биде постигнат трговски договор во пресрет на истекот на крајниот рок – 1 август за воведување на царини од 30 отсто за извозот на европски производи во САД.
Најавувајќи ја средбата во објава на Икс, Фон дер Лајен наведе дека со Трамп ќе „разговараат за трансатлантските трговски односи и за тоа како тие може да се одржат силни“.
Американската администрација веќе воведе царина од 50 отсто за увозот на челик и алуминиум од ЕУ, од 25 проценти за автомобили и автомобилски делови, како и основен данок од 10 отсто за поголемиот дел европски производи, со кои е опфатен околу 70 проценти од вкупниот извоз на Унијата во САД.
Средбата се одржува во услови на зголемени надежи во ЕУ дека Европската комисија би можела да постигне договор со Вашингтон по примерот на оној постигнат претходно неделава меѓу САД и Јапонија за просечна царина од 15 отсто на извозот на јапонски стоки на американскиот пазар.
ЕУ се надева дека, исто така, ќе постигне договор со САД за царинска стапка од 15 проценти, која би ја вклучувала и просечната царина од 4,8 отсто што ја плаќаат европските извозници на американскиот пазар уште од пред враќањето на Трамп во Белата куќа во јануари годинава.
Средбата доаѓа откако во четвртокот Европската комисија усвои пакет контрамерки на увозот на американски стоки во ЕУ, како одговор на најавената царина од САД од 30 отсто.
Портпаролот на ЕК за економска безбедност, трговија и царини Олоф Гил во четвртокот изјави дека фокусот на ЕУ е на постигнување на договор со САД за царините, а доколку тоа не се случи усвоените контрамерки ќе стапат во сила на 7 август.