Свет
Трамп ја пофали „разумната“ одлука на Путин да се воздржи од протерување на дипломатите

Избраниот американски претседател Доналд Трамп во петокот ја пофали „многу паметната“ одлука на рускиот претседател Владимир Путин да не возврати со иста мерка, откако американскиот претседател на заминување Барак Обама нареди во четвртокот протерување на 35 руски дипломати од САД и други санкции против Русија поради наводното мешање во изборниот процес што му овозможило на Трамп да стане 45-от претседател.
Рускиот претседател Владимир Путин, наспроти сите очекувања, во петокот изјави дека нема да ги протерува американските дипломати, дека тие и нивните деца кои ги покани на новогодишна и божикна прослава во Кремљ можат да се движат каде што сакаат, откако американскиот претседател Барак Обама кој се наоѓа на одмор на Хаваи во четвртокот нареди протерување на 35 руски дипломати, воведе санкции за двете разузнавачки служби на Русија, и против две правни и девет физички лица за кои неговата администрација верува дека се вмешани во американските претседателски избори.
„Извонреден потег со воздржувањето (на Владимир Путин) – отсекогаш знаев дека е многу паметен!“, напиша избраниот американски претседател Доналд Трамп кој на должноста стапува на 20-ти јануари.
„Русија никого нема да протерува“, рече Путин, иако шефот на руската дипломатија Сергеј Лавров претходно во интервју за руската државна телевизија во петокот изјави дека на претседателот ќе му предложи да ги протера и да ги прогласи за непожелни американски дипломати до амбасадата во Москва и конзулатот во Санкт Петерург.
„Следните чекори кон обновувањето на руско-американските односи ќе се градат на политиката каква што ќе ја спроведува претседателот Трамп“, порача Путин, но додаде дека сепак Русија „го задржува правото“ да преземе одредени мерки.
Трамп повеќепати во текот на кампањата го фалеше Путин и во својот тим именуваше луѓе за кои се тврди дека се блиски на Москва, но не се знае дали ќе ги промени одлуките кои ги донесе администрацијата на Обама за време на коишто односите со Русија паднаа на нивото од Студената војна, а се влошија и со најблискиот блискоисточен сојузник Израел, како и со стратешкиот партнер Турција.
Обама тврди дека мерките за протерување и нови санкции против Русија се затоа што 35-те дипломати биле осомничени за шпионирање и помагале во наводното руско хакирање на серверите на неговата Демократска партија пред претседателските избори годинава. Неговата администрација ја обвинува Москва дека преку хакери раководени од неа украла десетици доверливи електронски преписки меѓи функционерите на партијата.
Лавров одговори дека ваквите американски обвинувања немаат основа и оти се без доказ, и порача дека санкциите нема да минат без одговор на заканите на Обама дека можни се други чекори против Русија „кои не мора да бидат јавно објавени“.
Рускиот премиер Дмитриј Медведев изрази жалење што администрацијата на Обама својот мандат го завршува со „антируска агонија“.
Трамп изјави дека следната седмица ќе се сретне со челниците на американските тајни служби. Од нив, а претходно месецов изрази отворено сомневање во нивните компетенции по тврдењата од нивна страна дека Русите му помогнале да стане американски претседател, очекува да го информираат за фактите./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Медведев: Чекор по чекор, Австрија ја напушта неутралноста и станува транзитна база на НАТО

Заменик-претседателот на Советот за безбедност на Русија, Дмитриј Медведев, изјави дека прикрадната „НАТО-изација“ и милитаризација на Република Австрија се одвиваат во сенка на зајакнувањето на одбранбената компонента на Европската Унија.
„Виена активно учествуваше во иницијативата на НАТО „Партнерство за мир“, во суштина веќе интегрирајќи се во логиката на блокот. Австрија доби статус на клучна транзитна земја за НАТО. Само во 2024 година, повеќе од 3.000 воени транспортни авиони поминаа низ нејзината територија, а авионите на алијансата извршија над 5.000 летови во нејзиниот воздушен простор“, нагласи Медведев.
Тој потсети дека локалните ревизионисти со децении работат на поткопување на уставно загарантираната неутралност на Австрија. „Од 1990-тите, тие почнаа да воспоставуваат воени врски под маската на учество во заедничката безбедносна и одбранбена политика на ЕУ. До 2009 година, кога стапи во сила Лисабонскиот договор, сè се сведуваше на општи зборови за координација на воениот развој на земјите од ЕУ, но без конкретни обврски“, рече заменик-претседателот на Советот за безбедност на Русија.
Медведвед додаде дека австрискиот естаблишмент сè повеќе охрабрува јавна дебата за напуштање на неутралниот статус и приклучување кон НАТО, што според него претставува директен напад врз долгогодишниот принцип на државна неутралност, кој беше основа на политичкиот идентитет на современа Австрија.
Фото: принтскрин
Свет
Пензиските системи во неколку европски земји се на работ на колапс, велат експерти

Сиромаштијата во староста ќе стане правило за голем дел од населението на Европа, освен ако не се реформираат сегашните политики за пензионирање. „Еден од пет Европејци веќе е изложен на ризик од живеење во сиромаштија во старост“, рече Петра Хиелкем, раководител на Европскиот орган за осигурување и професионални пензии (EIOPA) со седиште во Франкфурт.
„А потоа, ако ги погледнете само жените, нивниот ризик е за 30 проценти поголем“, изјави Хиелкем за „Политико“. И станува уште полошо: населението на Европа брзо старее, а за четириесет години ќе има само 1,5 работници на секој пензионер. Тоа е половина од сегашниот сооднос.
Еден одговор е да се создадат комплементарни приватни или професионални пензиски системи, така што луѓето ќе имаат личен фонд на пензиски заштеди на кои ќе можат да се потпрат во пензија. Скандинавските земји се најдобро подготвени за претстојната криза.
Тие имаат различни извори за пензионерите: системи „плаќај по употреба“, професионални пензиски фондови, што значи дека штедите за пензија додека работите, и дополнителни инвестиции во пензиски производи.
Но, многу земји, особено во источна и јужна Европа, главно се потпираат на државни пензии и имаат ниски пензии во однос на платите. Во многу случаи, граѓаните не се навистина свесни за својата ситуација бидејќи јавните власти и работодавците не им даваат целосен преглед на нивните пензиски права, според медиумот.
Брисел може да направи малку повеќе од тоа да дава препораки бидејќи надлежноста е на национално ниво. Сепак, Хиелкем, Холанѓанка која го води органот за професионални пензии од 2021 година, е убедена дека постои „моментум“ за голема промена што би ѝ дала на EIOPA поголема улога.
„Прво, гледаме дека проблемот станува сè поголем, а истото го гледаат и некои влади. И второ, да бидеме искрени, зошто пензиите се на дневен ред? Затоа што ни требаат повеќе инвестиции, а еден начин да ги зголемиме е да ги префрлиме заштедите од банкарски сметки во инвестициски производи“, рече Хиелкем.
До крајот на годината, Европската комисија ќе предложи владите да постават дигитални штедни и инвестициски сметки достапни за секој граѓанин, системи за следење на пензиите, контролни табли за комуникација на пензиските права и даночни олеснувања за да го направат штедењето за пензионирање попривлечно. Исто така, ќе ги разгледа правилата на ЕУ за пензиските фондови и пензиските инвестициски производи.
Клучна мерка во пакетот е систем за автоматско запишување на луѓе во професионални пензиски фондови, сличен на оној што веќе постои во Велика Британија, Полска и Италија. „Автоматски, ќе бидете вклучени во пензиските фондови ако работите. Ако не сакате, мора сами да се откажете.“
Во моментов, рече Хиелкем, луѓето можат да изберат да се одлучат за професионална пензија, но поради инерција, малкумина го прават тоа. „Претпоставката е дека инерцијата ќе работи и во спротивна насока“, рече шефот на EIOPA, што значи дека малку луѓе би се откажале. Таму каде што постои, механизмот функционира и води кон тоа повеќе луѓе да штедат за своето пензионирање преку работа.
Фото: принтскрин
Свет
Руте: Шокирани сме, нападот докажува дека не смееме да бидеме наивни во врска со Русија

Генералниот секретар на НАТО, Марк Руте, денес изјави дека руските напади врз Киев синоќа, кои ги погодија цивилните области и дипломатската мисија на ЕУ во Киев и убија најмалку 18 лица, покажуваат дека рускиот претседател Владимир Путин е подготвен да ја продолжи војната.
„Сите сме шокирани од она што се случи, пред сè затоа што станува збор за напади кои не се врз воени цели, ова се цивилни цели. Додека се обидуваме да направиме сè за да го поддржиме американскиот претседател Доналд Трамп да ја заврши оваа војна, во меѓувреме, рускиот претседател Путин е подготвен да продолжи со неа, да продолжи да напаѓа невини цивили во Украина“, рече тој на прес-конференција во германскиот град Вирцбург.
Тој истакна дека денес се консултирал со претседателката на Европската комисија, Урсула фон дер Лајен, и високата претставничка за надворешни работи, Каја Калас, по рускиот напад врз претставништвото на ЕУ во Киев, објави германската Н-ТВ.
„Нападот уште еднаш докажува дека не смееме да бидеме наивни во врска со Русија“, предупреди Руте.
Сепак, тој рече дека Русија е способна за хибридна војна.
„Доколку сметаат дека е потребно, можат дури и да извршат атентат“, нагласи Руте.
Според него, Русија се обидува да го наруши и цивилниот воздушен сообраќај, на пример во Германија и балтичките држави.
Фото: принтскрин