Свет
Трас во ОН: Путин очајно се обидува да ги оправда своите катастрофални неуспеси

Британската премиерка Лиз Трас го обвинува рускиот претседател Владимир Путин за „заканувачко штракање со оружјето“ за да ја прикрие неговата неуспешна инвазија на Украина. Таа на Генералното собрание на Обединетите нации рече дека се кршат нејзините основачки принципи поради агресијата на авторитарните држави.
Трас ја нарече војната во Украина битка за „вредностите и безбедноста на целиот свет“ и ја пофали покојната кралица Елизабета Втора како симбол на сè за што се залагаат Обединетите нации.
Одговарајќи на одлуката на Путин да ги мобилизира резервистите и дека ќе искористи сè што има на располагање за да ја заштити Русија – очигледно повикување на рускиот нуклеарен арсенал – Трас го обвини рускиот лидер дека „очајно се обидува да ги оправда своите катастрофални неуспеси“.
„Тој го зголемува ризикот испраќајќи уште повеќе резервисти во страшна судбина. Тој очајнички се обидува да ја преземе мантијата на демократијата за режим без човекови права и слободи. И тој дава повеќе лажни тврдења и заканувачки штрака со своето оружје“, рече тоа во својот говор.
„Тоа нема да функционира. Меѓународната алијанса е силна, Украина е силна“, смета Трас, пренесуваат агенциите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп: „Многу сум разочаран од Путин, ќе го скратам рокот од 50 дена“

Американскиот претседател Доналд Трамп денес во Шкотска изјави дека ја разгледува можноста за скратување на рокот од 50 дена што му го даде на рускиот претседател Владимир Путин за завршување на војната во Украина пред да воведе царини до 100 проценти за Русија и нејзините трговски партнери, објавува „Политико“.
„Разочаран сум од претседателот Путин, многу сум разочаран од него, па затоа ќе мора да ја разгледаме ситуацијата и ќе ги намалам 50-те дена што му ги дадов на помалку бидејќи мислам дека веќе го знам одговорот“, изјави Трамп пред новинарите во Тернбери, Шкотска.
Порано во јули Трамп му постави ултиматум на Путин предупредувајќи дека потенцијалните економски санкции против Москва и нејзините трговски партнери би биле катастрофални ако конфликтот не заврши до почетокот на септември.
„Мислевме дека сме го решиле тоа неколкупати, а потоа претседателот Путин излезе и почна да лансира ракети кон некој град како Киев и уби многу луѓе во дом за стари лица или нешто слично“, додаде Трамп во денешната изјава.
Фото: принтскрин
Регион
Русин и Германец снимале голи деца со мобилни телефони во камп на Истра

Полицијата на Истра во саботата уапси двајца мажи, еден Русин и еден Германец, кои тајно снимале голи деца во туристички камп. Двајцата беа однесени во полициската единица за притвор под сомнение за кривично дело експлоатација на деца за порнографија и беа обвинети за кривично дело.
Како што соопшти полицијата денес, во саботата, околу 12.45 часот, обезбедувач во туристички објект во областа Ровињ пронашол 56-годишен руски државјанин како тајно снима голи деца со својот мобилен телефон и го притворил додека не пристигнала полицијата.
Истиот ден околу 14.40 часот обезбедувач во истиот камп пронашол и 52-годишен германски државјанин како тајно снима голи деца со својот мобилен телефон и исто така го притворил додека не пристигнала полицијата.
Врз основа на налог од надлежниот суд полицијата ги претресе сместувачките единици, мобилните телефони со придружните мемориски картички што ги користеле осомничените и пронајде инкриминирачки материјал. Осомничените беа предадени на полициската единица за притвор во Истра вчера попладне со кривични пријави.
Свет
Сестрата на Ким го отфрла дијалогот со Сеул: „Ако се надеваат дека ќе ја свртат ситуацијата со неколку слатки зборови, нема полоша грешка од тоа“

Пјонгјанг нема причина да го продолжи дипломатскиот дијалог со Сеул, изјави денес сестрата на севернокорејскиот лидер Ким Џонг-ун и покрај изразената желба на новиот јужнокорејски претседател Ли Џе Мјунг да ја смири ситуацијата, објави севернокорејската агенција КЦНА.
„Уште еднаш го разјаснуваме официјалниот став, а тоа е дека, без оглед на политиката што ја усвојува Сеул или каков предлог е даден, ние не сме заинтересирани за тоа и нема причина за средба со Република Кореја или за каков било разговор со неа“, рече Ким Џо Џонг, која е исклучително влијателна личност во севернокорејската дипломатија.
Сестрата на Ким Џонг-ун зборуваше за неповратната некомпатибилност меѓу двете земји, кои технички сè уште се во војна. Нивниот конфликт заврши во 1953 година со примирје, но не и со мировен договор.
Нејзината изјава доаѓа откога јужнокорејскиот претседател Ли Џе-мјунг, кој дојде на власт на почетокот на јуни, вети дека ќе стапи во контакт со Пјонгјанг тврдејќи дека „без разлика каква е цената, мирот е подобар од војната“.
Сеул оттогаш престана да емитува антисевернокорејска пропаганда преку звучници по должината на границата. Набргу потоа Северна Кореја престана да емитува вознемирувачки звуци, што ги вознемируваа жителите на југот во близина на границата дење и ноќе.
Сепак, ова ублажување на тензиите не значи дека Јужна Кореја може да верува во дипломатско ублажување на притисокот, предупреди Ким Џо Џонг. Ако Сеул се надеваше дека ќе ја сврти ситуацијата „со неколку слатки зборови, нема полоша грешка од тоа“, додаде таа.
Новиот претседател на Јужна Кореја изјави дека сака прекуграничен дијалог, без предуслови.
Фото: принтскрин