Свет
Триесет и една година од падот на Берлинскиот ѕид

9 ноември 1989 година е историски ден како за Германија така и за цела Европа. На тој ден падна ѕидот што го делеше Берлин на источен и на западен дел цели 28 години.
На годишнината од падот на ѕидот експертите велат дека разликите меѓу западниот и источниот дел и понатаму се забележуват.
„Многу разлики што постоеја меѓу двата дела на сега единствената држава, особено економските, се намалени, но и понатаму постојат силни разлики во ставовите и менталитетот. Разликата меѓу истокот и западот е голема кога стнува збор за тоа како луѓето ја гледат поранешна Германска Демократска Република, колку веруваат во демократските институции, како гледаат на елитата, на медиумите, како и во односите кон Русија“, рекол Штефен Мау, професор по социологија на берлинскиот Универзитет „Хумболт“, за Си-ен-ен.
Тој додал дека повеќето западни Германци би рекле дека повеќе не постојат разлики, дека сè е избришано во текот на трансформацијата, но повеќето источни Германци би рекле дека и понатаму постојат впечатливи разлики меѓу истокот и западот на земјата.
Железната завеса, како што го нарекувале ѕидот, го делел Берлин на два дела. Бил изграден во 1961 година од комунистичкиот режим на Источна Германија за да се оддели Западен Берлин, кој бил под контрола на западните сојузници, од источниот дел на градот и од остатокот од Источна Германија, која била под силно влијание на СССР. Sидот станал највпечатлив симбол на Студената војна.
Sидот ги разделувал Источна и Западна Германија точно 28 години и еден ден. Источна Германија ја почнала изградбата на ѕидот на 13 август 1961. Ненадејната градба на ѕидот предизвикала многу семејства да останат поделени. Sидот бил целосно урнат кон крајот на 1989, освен дел кој и денес стои како спомен на тоа време.
Во текот на 28-годишната поделба најмалку 136 луѓе биле убиени од граничните единици на Источна Германија обидувајќи се да пребегнат во Западен Берлин. Некои тврдат дека таа бројка изнесува повеќе од 200. Источногерманската власт им дала наредба на граничарите да пукаат на бегалците.
Имало неколку службени премини, а интересно е што имињата почнувале со првите букви од азбуката: Алфа, Браво…
Најпознат бил т.н. Check Point Charlie, која и денеска симболично е обележан. Таму стражарат актери облечени како американски војници. Тој премин бил наменет за дипломати, за сојузничките воени сили и за странци.
Кога на 9 ноември 1989, по неколкунеделни граѓански немири, власта во Источна Германија објавила дека сите нејзини граѓани може да ги посетат Западна Германија и Западен Берлин, источногерманците се искачувале и го преминувале ѕидот прославувајќи ја слободата на другата страна. Во текот на следните неколку недели делови од ѕидот биле искорнати од одушевениот народ и од ловци на сувенири, а по неколку недели ѕидот речиси целосно бил отстранет со градежна механизација.
Падот на Берлинскиот ѕид бил првиот чекор во обединувањето на Германија, кое завршило на 3 октомври 1990 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Хрватска е подготвена да прифати деца од Газа

Хрватска ги отвора вратите за децата од Појасот Газа, објави Министерството за надворешни и европски работи, со акцент на „психосоцијална помош и едукација за опасноста од експлозивни направи“, објавија хрватските медиуми.
„Република Хрватска ќе ги отвори вратите за децата од Газа на ист начин како што ги отвори за децата од Украина, фокусирајќи се на психосоцијална помош и едукација за опасноста од експлозивни направи“, објави денес Министерството.
Во соопштението се нагласува дека Хрватска има искуство во ова од Татковинската војна и дека има меѓународно признато знаење за дејствување против мини.
Министерството пишува дека државата е подготвена да прифати деца доколку се појават можности, за што верува дека ќе се појават, и нагласува дека континуирано спроведува проекти поврзани со украинските деца, од кои околу 700 се згрижени во Хрватска, преку јавен повик.
Планот го објави државниот секретар на Министерството за надворешни работи за политички прашања, Франо Матушиќ, на меѓународната конференција за мирно решение на палестинското прашање и спроведување на решение за две држави во седиштето на ОН.
Свет
Русија го нападна Киев – најмалку шест загинати, меѓу нив и шестгодишно дете

Најмалку шест лица беа убиени, а десетици ранети во руските ракетни и напади со беспилотни летала врз Киев во зори утрово, неколку часа пред клучното гласање во украинскиот парламент – Врховната рада, за укинување на контроверзниот закон против корупција.
„Ноќеска, непријателот го нападна главниот град со ракети и беспилотни летала. Една ракета погоди станбена зграда, од која еден дел беше уништен“, објави министерот за внатрешни работи Игор Клименко на Телеграм, осудувајќи го „најновото воено злосторство“.
Во тој напад беа погодени 27 локации во градот, најмалку шест лица ги загубија животите, а 52 беа ранети, објави шефот на воената администрација на Киев, Тимур Ткаченко.
„Службите за итни случаи досега потврдија шест смртни случаи. Меѓу загинатите има дете, шестгодишно момче“, објави Ткаченко на Телеграм.
Градоначалникот на Киев, Виталиј Кличко, објави дека прозорците на педијатриското одделение во болницата биле скршени поради силата на експлозиите, но дека никој не е повреден.
Руските сили ги засилија нападите врз Украина во последните денови, откако американскиот претседател Доналд Трамп му даде рок од 10 дена на својот руски колега Владимир Путин во вторникот да ги прекине нападите под закана од нови санкции.
По последниот бран напади врз украинската престолнина, се очекува членовите на парламентот да гласаат за поништување на законот со кој се укинува независноста на антикорупциските тела и кој наиде на силни критики и отпор од јавноста и Европската Унија. Пратениците ќе го искажат своето мислење за новиот закон, кој им враќа целосна автономија на антикорупциските тела.
Законот донесен на 22 јули, кој подоцна го потпиша претседателот Володимир Зеленски, предвидува ставање на Националната агенција за борба против корупцијата (НАБУ) и Специјализираното обвинителство за борба против корупцијата (САПО) под надлежност на Генералниот обвинител, кој го назначува самиот шеф на државата.
Соочен со жестоки критики од граѓанското општество и Европската унија, претседателот Зеленски на крајот предложи нов нацрт-закон за враќање на независноста на двете агенции, за кој Врховната рада ќе гласа денес.
Министерот за надворешни работи Андриј Сибиха доцна во среда објави дека се работи на измена на законот.
„Украина има силно граѓанско општество и активна младина. Тие го искажаа своето мислење, украинските власти ги слушнаа нивните гласови и гласовите на нашите партнери“, рече тој.
Тој оцени дека „прилагодувањата“ се неопходни за да се заштитат антикорупциските тела од политички игри, особено од „руските“.
Свет
Орбан: Го почитувам Зеленски, но мислам дека направи грешки

Унгарскиот премиер Виктор Орбан во интервју за полскиот телевизиски канал wPolsce24 изјави дека се обидува да се однесува со почит кон украинскиот претседател Володимир Зеленски.
Орбан го нарече конфликтот во Украина „војна меѓу Западот и Русија“. Тој верува дека војната нема да заврши без средба меѓу лидерите на двете спротивставени страни, американскиот претседател Доналд Трамп и рускиот претседател Владимир Путин.
Тој нагласи дека се води од принципот на почит во меѓународните односи, кој важи и за Украина и украинскиот претседател Володимир Зеленски.
„Украинците го избраа. Секогаш се обидувам да се однесувам правилно, што е неопходно ако сакате да имате добри односи со некого. Затоа го почитувам претседателот Зеленски, но мислам дека направи грешки“, додаде унгарскиот премиер.
Тој тврди дека една од тие грешки била отфрлањето на неговата понуда за мир минатата година.
„Зеленски потоа го отфрли моето мислење дека времето е на страната на Русија, но денес го имаме она што го имаме. Ситуацијата на претседателот Зеленски не е лесна. Многу е тешко да се обединат луѓето во безнадежна војна“, тврдеше Орбан.
Односите меѓу Киев и Будимпешта се напнати во последните месеци. Унгарија го блокира почетокот на преговорите за пристапување на Украина во Европската Унија. Покрај тоа, новиот нацрт-буџет на ЕУ предизвика негодување во Унгарија. Главниот проблем за Унгарците е што буџетот вклучува над 100 милијарди евра за Украина.