Свет
Уби 77 луѓе, тврди дека му ја ограничуваат комуникацијата со надворешниот свет-Масовниот убиец Брејвик ќе ја тужи Норвешка

Масовниот убиец Андерс Брејвик (44), кој уби 77 луѓе во 2011 година во масовно пукање на норвешкиот остров Утоја, има намера од судот во Норвешка да побара укинување на неговата изолација, но и да ја тужи таа земја за наводно ограничување на неговата комуникација со надворешниот свет.
Брејвик во 2011 година прво со автомобил уби осум лица во Осло, а потоа уби уште 69, главно тинејџери, во младинскиот камп на Лабуристичката партија на островот Утоја, а ова се смета за најголемото злосторство извршено во Норвешка.
Брејвик се наоѓа во затворот Рингерик, 70 километри северо-западно од Осло, а просторот што го користи има соба за вежбање, кујна, ТВ соба и бања, му е дозволено да чува три папагали како домашни миленици кои слободно летаат во областа, пренесува Ројтерс повикувајќи се на локалната агенција.
Адвокатот на Брејвик рече дека повеќе од една деценија во самица „без значајна интеракција“ имала разурнувачки ефект врз неговиот клиент, додавајќи дека Брејвик е самоубиствено настроен и зависен од лекот за депресија „Прозак“, кој го користи за да ги преживее затворските денови.
Адвокатите кои го застапуваат Министерството за правда велат дека Брејвик мора да биде одвоен од останатата затворска популација поради постојаната безбедносна закана што ја претставува и дека неговата изолација е „релативна“ со оглед на тоа што има контакт со чувари, свештеник, здравствени работници и , до неодамна надворешен волонтер, кого Брејвик повеќе не сака да го гледа.
Брејвик гледа и двајца затвореници по еден час секоја втора недела.
Како што тврдат адвокатите, контролата врз контактите на Брејвик со надворешниот свет е оправдана со ризикот тој да ги инспирира другите да вршат насилни дејствија. Ова особено се однесува на контакти со крајнодесничарски кругови, вклучително и луѓе кои сакаат да воспостават контакт со Брејвик како резултат на терористичките акти од 22 јули 2011 година, велат адвокатите, наведувајќи го како пример Брентон Тарант, кој инспириран од злосторството на Брејвик, уби 51 лице во две џамии во Крајстчерч, Нов Зеланд во 2019 година.
Брејвик е осуден на 21 година затвор, што е најдолгата казна што може да ја изрече норвешкиот суд, која може да биде продолжена се додека тој се смета за закана за општеството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Недостиг на лекови во Газа: ОН предупредува на катастрофа

Палестинските пациенти во Газа се во сè полоша ситуација поради израелската блокада, а недостигот од клучни лекови и медицински потрошен материјал доведува многу животи на работ на смртта.
Затворањето на граничните премини од 2 март ги исцрпи болничките залихи на основни потреби, создавајќи ситуации опасни по живот за сите на кои им е потребна терапија – од хронични болести до повреди од војната.
Министерството за здравство на Газа постојано предупредува на влошување на кризата поради недостиг на лекови, што дополнително ги оптоварува веќе слабите капацитети на здравствениот систем.
Во разговор за агенцијата Анадолија, Ала Хилес, директор на Одделот за болничка фармација при Министерството за здравство на Газа, изјави дека повеќе од 37 проценти од основните лекови и најмалку 59 проценти од медицинските потрошни материјали моментално не се достапни во магацините на министерството.
„Овој недостаток директно влијае на сите медицински услуги, вклучувајќи ги ракот и крвните заболувања“, рече Хилес, додавајќи дека 54 проценти од лековите за овие болести се исто така недостапни.
Тој исто така истакна дека повеќе од 24 проценти од лековите што им се потребни на пациентите на дијализа во моментов не се достапни.
Хилес изјави дека министерството редовно поднесува извештаи за недостиг на лекови до релевантни меѓународни организации, вклучувајќи го Меѓународниот комитет на Црвениот крст и Светската здравствена организација.
Во оваа криза, Министерството за здравство се обидува да најде медицински алтернативи за ублажување на последиците од недостигот и намалување на компликациите за пациентите. Но, Хилс предупредува дека овие алтернативи не се секогаш соодветни и дека менувањето на лековите може да претставува дополнителен ризик за здравјето на пациентите.
Обединетите нации во понеделникот одбележаа 50 дена откако Израел целосно ја блокираше хуманитарната помош за Газа, предупредувајќи на брзо влошување на ситуацијата што сериозно ги загрозува животите на цивилите.
„Денес се навршуваат 50 дена откако израелските власти целосно го запреа протокот на какви било залихи во Газа“, изјави портпаролот на ОН, Стефан Дужарик, на прес-конференција.
Повикувајќи се на Канцеларијата на ОН за координација на хуманитарни прашања (OCHA), Дужарик нагласи: „Од почетокот на март, на ниту еден камион што носи храна, гориво, лекови или други потребни работи не му е дозволено да влезе во Газа, без разлика колку се важни овие залихи за опстанокот на луѓето“.
Свет
Помошникот на Путин: Мировниот план на Трамп за Украина ќе влезе во руските учебници

Планот на американскиот претседател Доналд Трамп за прекин на војната во Украина ќе биде вклучен во руските училишни учебници, изјави Владимир Медински, помошник на претседателот на Руската Федерација и еден од авторите на учебникот и претседател на Руското военоисториско друштво, пишува „Данас“.
„Извонредните напори што новата американска администрација ги вложува за да се обиде разумно да го реши конфликтот во Украина и, генерално, неверојатните трансформации во американската внатрешна политика на кои сега сме сведоци, несомнено ќе се појават на страниците на учебниците за руска историја и светска историја кога ќе биде подготвено следното издание“, објави „Данас“.
Тука можеме да кажеме дека Трамп дефинитивно влезе во историјата“, рече Медински, пренесува „Данас“ за агенцијата ТАСС.
Тој додаде, како што е наведено, дека нема право да коментира за политиката на американскиот претседател, но истакна дека како набљудувач и историчар може да каже: „Живееме во историска ера“.
Пред тоа, како што напишаа „Волстрит џурнал“ (VSJ) и „Блумберг“, администрацијата на Трамп достави предлози до Украина и претставниците на Европската Унија за прекин на војната. Според планот, Киев треба да го признае Крим како руски и да одбие да се приклучи на НАТО, според овој медиум.
Во исто време, објави „Данас“, непријателствата ќе бидат запрени по линијата на контакт, а Русија ќе ја предаде нуклеарната централа Запорожје под американска контрола.
Се очекува украинските власти да одговорат на овие предлози на состанок во Лондон на крајот од неделата.
После тоа, според WSJ, како што објави „Данас“, специјалниот пратеник на американскиот претседател за Блискиот Исток, Стив Виткоф, би можел да ја посети Русија по четврти пат за да разговара за планот договорен со Украина и ЕУ со рускиот претседател Владимир Путин, објавува „Москва тајмс“.
Условите на мировниот договор предложени од Соединетите Американски Држави се блиски до барањата на Русија. Претходно, Путин побара од Киев да ги предаде регионите Луганск, Донецк, Запорожје и Херсон на Москва во рамките на нивните административни граници и да одбие да се приклучи на НАТО, се вели во текстот.
Тој, исто така, инсистираше, како што е наведено, на одржување претседателски избори во Украина, нагласувајќи дека руската страна не може да потпише мировен договор со „нелегитимниот“ претседател Володимир Зеленски.
Во исто време, САД предупредија дека, доколку мировните преговори не успеат, Вашингтон ќе се повлече од преговарачкиот процес, пишува „Данас“.
Свет
(Видео) Украинците спасија куче под урнатините по рускиот напад врз Суми

Во украинскиот град Билопиља во Сумската област, по ноќен воздушен напад од страна на руските сили, спасувачите извадија куче од под урнатините, како што објави Државната служба за вонредни состојби на Украина на Телеграм, пишува УНН.
Како што е наведено, Русите синоќа извршија воздушен напад врз градовите Билопилија и Ворожбјанска. Како резултат на нападот, едно лице е повредено, а девет приватни куќи се оштетени.
За време на извидување во областа на заедницата Билопилија, спасувачите одеднаш слушнале квичење: а меѓу урнатините забележале исплашено куче.
Спасувачите внимателно го извлекле животното од под урнатините и му го предале на сопственикот, се вели во соопштението, а објавено е и видео од спасувањето на кучето.