Свет
Уби 77 луѓе, тврди дека му ја ограничуваат комуникацијата со надворешниот свет-Масовниот убиец Брејвик ќе ја тужи Норвешка
![](https://makfax.com.mk/wp-content/uploads/2017/06/brejvik.jpg)
Масовниот убиец Андерс Брејвик (44), кој уби 77 луѓе во 2011 година во масовно пукање на норвешкиот остров Утоја, има намера од судот во Норвешка да побара укинување на неговата изолација, но и да ја тужи таа земја за наводно ограничување на неговата комуникација со надворешниот свет.
Брејвик во 2011 година прво со автомобил уби осум лица во Осло, а потоа уби уште 69, главно тинејџери, во младинскиот камп на Лабуристичката партија на островот Утоја, а ова се смета за најголемото злосторство извршено во Норвешка.
Брејвик се наоѓа во затворот Рингерик, 70 километри северо-западно од Осло, а просторот што го користи има соба за вежбање, кујна, ТВ соба и бања, му е дозволено да чува три папагали како домашни миленици кои слободно летаат во областа, пренесува Ројтерс повикувајќи се на локалната агенција.
Адвокатот на Брејвик рече дека повеќе од една деценија во самица „без значајна интеракција“ имала разурнувачки ефект врз неговиот клиент, додавајќи дека Брејвик е самоубиствено настроен и зависен од лекот за депресија „Прозак“, кој го користи за да ги преживее затворските денови.
Адвокатите кои го застапуваат Министерството за правда велат дека Брејвик мора да биде одвоен од останатата затворска популација поради постојаната безбедносна закана што ја претставува и дека неговата изолација е „релативна“ со оглед на тоа што има контакт со чувари, свештеник, здравствени работници и , до неодамна надворешен волонтер, кого Брејвик повеќе не сака да го гледа.
Брејвик гледа и двајца затвореници по еден час секоја втора недела.
Како што тврдат адвокатите, контролата врз контактите на Брејвик со надворешниот свет е оправдана со ризикот тој да ги инспирира другите да вршат насилни дејствија. Ова особено се однесува на контакти со крајнодесничарски кругови, вклучително и луѓе кои сакаат да воспостават контакт со Брејвик како резултат на терористичките акти од 22 јули 2011 година, велат адвокатите, наведувајќи го како пример Брентон Тарант, кој инспириран од злосторството на Брејвик, уби 51 лице во две џамии во Крајстчерч, Нов Зеланд во 2019 година.
Брејвик е осуден на 21 година затвор, што е најдолгата казна што може да ја изрече норвешкиот суд, која може да биде продолжена се додека тој се смета за закана за општеството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Свет
„Ројтерс“: Трамп подобар кандидат за економски прашања, Бајден за зачувување на демократијата
![](https://makfax.com.mk/wp-content/uploads/2019/07/bajden-tramp.jpg)
Гласачите во Соединетите Американски Држави сметаат дека кандидатот на Републиканската партија на претстојните претседателски избори Доналд Трамп е подобар кандидат кога станува збор за економијата, но сметаат дека кандидатот на Демократската партија Џозеф Бајден е подобар кандидат кога станува збор за зачувување на демократијата.
Анкетата на Ројтерс и истражувачката агенција Ипсос покажа дека двете клучни прашања за гласачите во САД се состојбата на демократијата и економските проблеми, при што 47 отсто од испитаниците велат дека Трамп е подобар избор за тој проблем, додека 37 отсто рекле дека Бајден е подобар пренесува Танјуг.
Кога станува збор за прашањето за имиграцијата, 44 отсто од анкетираните сметаат дека Трамп е подобар избор, додека 31 отсто од нив веруваат дека Бајден е подобар, а Ројтерс додава дека во 2022 година 13,9 отсто од населението ќе бидат имигранти, што е највисок процент во овој век.
На Трамп се гледа и како подобар на кандидат во однос на надворешните конфликти и тероризмот со 40 отсто спрема 35, но Бајден е подобар кандидат кога станува збор за одговор на екстремизмот и заканите по демократијата, со 39 отсто наспроти 33, што според испитаниците е вториот најголем проблем во САД.
Бајден води и кога станува збор за здравствената заштита со 40 наспроти 29.
Во претходните анкети на Ројтерс и Ипсос, Бајден и Трамп беа главно изедначени, но зголемување на популарноста на Трамп беше забележано во некои сојузни држави.
Свет
(Видео) Џулијан Асанж е на слобода, стави крај на долгогодишната правна битка
![](https://makfax.com.mk/wp-content/uploads/2024/06/0035e2ff-aa42-462c-a6d2-94e1dafceaad.jpg)
Основачот на Викиликс, Џулијан Асанж, пред американскиот суд во Саипан се изјасни за виновен за прекршување на Законот за шпионажа на САД, во спогодбата со американскиот правосуден систем што стави крај на долгогодишната правна битка и ја остави судницата како слободен човек, известуваат светските агенции. Судијката Рамона Манглона ја одобри спогодбата со обвинителите, ставајќи крај на 14-годишната сага.
Julian Assange Free At Last!!! pic.twitter.com/Vpzcxr6lbi
— Stella Assange #FreeAssangeNOW (@Stella_Assange) June 26, 2024
Во согласност со спогодбата, таа го осуди на затворска казна, која тој веќе ја одлежа. Тој помина пет години во затвор во Обединетото Кралство.
Според написите, по читањето на пресудата, обвинителството веднаш го повлече барањето за екстрадиција на Асанж, што е голем момент со оглед на тоа што основачот на Викиликс поминал години на суд обидувајќи се да избегне екстрадиција во САД. Судијата рече дека американската влада се согласила да не води понатамошна кривична постапка.
Асанж се насмевна кога таа му честиташе роденден (наредната недела ќе наполни 53 години), велејќи дека се надева дека ќе го започне својот нов живот на позитивна нота.
На сослушувањето Асанж се изјасни за виновен по една точка од обвинението со кое се товари за заговор за добивање и објавување доверливи документи за одбрана на САД.
Тој сега е слободен човек и може да се врати во својата родна Австралија по години во егзил.
Вашингтон тврдеше дека Австралиецот ги загрозил животите на американските агенти и дека нема оправдување за неговите криминални дела. Неговите поддржувачи, од друга страна, го слават како херој кој беше обвинет за откривање американски злосторства.
Во 2010 година, Викиликс, меѓу другото, објави видео од американски воени хеликоптери кои убиваат цивили во главниот град на Ирак, како и информации за стотици цивили убиени за време на американската инвазија на Авганистан.
Британската полиција го уапси Австралиецот во 2019 година во амбасадата на Еквадор во Лондон, каде што престојуваше седум години.
Свет
Северна Кореја лансираше повеќе од 250 балони со ѓубре кон Јужна Кореја: затворен аеродромот во Сеул
![](https://makfax.com.mk/wp-content/uploads/2024/06/gubre2.jpg)
Во текот на ноќта Северна Кореја лансираше повеќе од 250 балони со ѓубре кон Јужна Кореја, соопшти денеска јужнокорејската армија.
Тоа е шесто вакво лансирање од крајот на минатиот месец, а поради него аеродромот во близина на Сеул беше затворен околу три часа, пренесува „Јонхап“.
Околу 100 балони, главно со отпадна хартија и друг отпаден материјал, слетале во Сеул и во северниот дел на провинцијата Ѓеонгги, соопшти Генералштабот на корејската армија.
Домашните и меѓународните летови беа запрени или одложени околу три часа на меѓународниот аеродром Инчеон, западно од Сеул, од 1:46 часот утринава по локално време, според „Јонхап“.
Анализата на балоните покажала дека тие не содржат отровни материи, се наведува во соопштението на јужнокорејската армија.
Со последната серија, Северна Кореја се проценува дека лансирала повеќе од 2.000 балони кои носат отпадоци од 28 мај, според „Јонхап“.
Како одговор, на 9 јуни, за прв пат по шест години, Јужна Кореја почна да емитува говори против владата на Пјонгјанг преку звучници во пограничната зона.