Свет
Украина: Путин почна да испраќа и жени во војната

Русија почнала да испраќа жени на фронтот во Украина, тврди украинската војска.
Поради големите загуби на фронтот, претседателот Владимир Путин „морал да бара алтернатива“ за да ги пополни редовите, додаваат Украинците, пренесува „Дејли мејл“.
„Минатата недела воз со резервирани места за затвореници се движеше кон регионот на Донецк. Еден вагон беше за жени“, велат тие.
Оваа недела се појавија непроверени извештаи дека Русија префрлила осуденички од Кушчевка во регионот Краснодар, кој е поблиску до воената зона. Овде некои затворенички, ослободени според шемата поврзана со воените напори, биле распоредени да работат на полињата, како и во оранжерии и амбари, веројатно назначени да ја снабдуваат војската.
Олга Романова од фондацијата „Русите зад решетки“ смета дека 100-ина жени биле испратени во Украина. Машките затвореници беа регрутирани во Русија, десетици илјади од нив, и им беше кажано дека казната ќе им биде укината ако отидат на фронтот и преживеат шест месеци.
Медиумите објавија како убијци, силувачи и многубројни криминалци отишле на фронтот и дека повеќето од нив ѝ се приклучиле на озлогласената група „Вагнер“.
Шефот на „Вагнер“, Евгениј Пригожин, минатиот месец изјави дека неговата група повеќе нема да регрутира затвореници да се борат во Украина, но не даде објаснување за одлуката. Наводно, сега има докази дека руското Министерство за одбрана директно ги повлекува осудениците.
Минатиот месец украинскиот Генералштаб соопшти дека Русија активно „се обидува да регрутира осудени жени да учествуваат во воените дејства“. Така тие „треба да ги надоместат загубите во работната сила“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Британскиот премиер: Светот каков што го знаевме повеќе не постои

Вo одговор за американските царини, британскиот премиер Кир Стармер рече: „Светот каков што го знаевме повеќе не постои“. Тој најави дека ќе продолжи да се обидува да постигне економски договор со САД за да се избегнат некои од царините, но ја покрена и можноста британската влада директно да интервенира за заштита на националните интереси.
Во статија за Сандеј Телеграф, Стармер изјави дека ќе продолжи да се обидува да постигне трговски договор со САД и најави можна интервенција на државата на пазарот.
„На некои можеби не им е пријатно – идејата државата директно да влијае на пазарот често беше исмејувана. Но, не можеме да се држиме до старите верувања додека светот се менува толку брзо“, рече тој.
Велика Британија беше меѓу земјите погодени од новата основна царина од 10 отсто, со дополнителни царини од 25 отсто за извозот на автомобили, челик и алуминиум. Некои земји се соочуваат со уште повисоки царини кои од 9 април ќе достигнат и до 50 проценти.
Британскиот производител на автомобили Jaguar Land Rover вчера објави дека ги паузира сите испораки во САД додека не ги прилагоди своите операции на новите трговски услови.
Минатата година, Велика Британија извезе речиси 60 милијарди фунти стоки во САД, главно машини, автомобили и фармацевтски производи.
Регион
(Видео) Загина поранешната „Мис Балкан“, пијана пеш бегала од полицијата и паднала од надвозник

Поранешната Мис на Балканот, 27-годишната Ѓулер Ердоган го загуби животот откако падна од надвозник на патот бегајќи од полициски контролен пункт, каде беше констатирано дека е во алкохолизирана состојба, пишува турски Хуриет.
Според „Хуриет“, несреќата се случила ноќта на 1 април. При проверката било констатирано дека била под дејство на алкохол, по што излегла од автомобилот и почнала да бега.
🔴 Ramazan Bayramı tatili için ailesinin yanına Giresun’a gelen Kosova Avrupa Güzeli ve model Güler Erdoğan, üst geçitten düşerek hayatını kaybetti.
📌 Genç kadının ölümü ile ilgili soruşturma başlatıldı. pic.twitter.com/EBtIK8c5gV
— Mynet (@mynet) April 3, 2025
Обидувајќи се да побегне, таа се качила на надвозникот, но паднала на патот и се здобила со тешки повреди. Потоа ја прегазил друг автомобил.
Медицински екипи пристигнале на местото на настанот по пријава од случаен минувач. Од прегледот било утврдено дека таа починала. Според Хуриет, познато е дека Ердоган имал психички проблеми. За овој случај е отворена истрага.
Свет
Околу 15 илјади луѓе се евакуирани во Германија поради сомнителни бомби од Втората светска војна

Главната железничка станица во северозападниот германски град Оснабрик беше затворена, а околината евакуирана откако беа пронајдени четири бомби за кои постои сомневање дека се од Втората светска војна, соопшти националната железничка компанија Дојче Бан (ДБ).
Ограничувањата што го засегаат меѓуградскиот, дневниот и товарниот сообраќај ќе останат во сила цел ден, а целата област околу станицата е зона за евакуација, соопшти ДБ. Околу 15.400 жители мораа да ги евакуираат своите домови рано утринава, откако истрагата откри сомнителни бомби на поранешниот товарен терминал, соопштија градските власти.
Доколку се утврди дека бомбите се неексплодирани, ќе бидат повикани експерти да ги деактивираат. Градот, кој се наоѓа на околу 70 километри источно од холандската граница, веќе има неколку евакуации откако беа пронајдени бомби од Втората светска војна.
„Колодвор беше масовно бомбардиран за време на војната како стратешка цел. Во голем дел од регионот, теренот воопшто не беше пребаруван, но таму се можни дополнителни пронајдоци“, објавија градските власти во февруари.
На местото на поранешната товарна станица се гради нов станбен простор.